ປະທານປະເທດ ລົງຊຸກຍຸ້ການຜະລິດ ແລະທ່ອງທ່ຽວ 2 ເມືອງຂອງ ນວ

  ວັນທີ 3 ກັນຍາ 2020 ທ່ານ ບຸນຍັງ ວໍລະຈິດ ປະທານປະເທດພ້ອມຄະນະໄດ້ລົງຢ້ຽມຢາມຊຸກຍູ້ການຜະລິດ ແລະການທ່ອງທ່ຽວຢູ່ເມືອງໄຊທານີ ແລະເມືອງປາກງື່ມ ນະຄອນຫຼວງວຽງຈັນ ໂດຍໄດ້ຮັບການຕ້ອນຮັບຈາກ ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ພ້ອມດ້ວຍອຳນາດການປົກຄອງເມືອງໄຊທານີ ແລະເມືອງປາກງື່ມ ພະແນກການ ແລະພາກສ່ວນກ່ຽວຂ້ອງ.

   ການລົງຢ້ຽມຢາມຄັ້ງນີ້ຄະນະໄດ້ເດີນທາງໄປຢ້ຽມຢາມບໍລິສັດລາວໂຄຄາ-ໂຄລາ ບ໊ອຕຕລິງ ຈໍາກັດຢູ່ບ້ານໄຮ່ ເມືອງໄຊທານີ ຊຶ່ງທ່ານ ລີແອນໂດມາຕີນ ຄາຊາເຣຕ້າຜູ້ ບໍລິຫານບໍລິສັດດັ່ງກ່າວໄດ້ລາຍງານວ່າ: ນັບແຕ່ປີ 2012 ບໍລິສັດລາວໂຄ ຄາ-ໂຄລາ ບ໊ອຕຕລິງ ຈໍາກັດ ໄດ້ນໍາຜະລິດຕະພັນໂຄຄາໂຄລາເຂົ້າມາຈໍາໜ່າຍຢູ່ ສປປ ລາວ ມາຮອດປີ 2015 ໄດ້ສ້າງຕັ້ງໂຮງງານຜະລິດຢູ່ປະເທດລາວສາມາດຜະລິດໄດ້ 22.000 ແພັກຕໍ່ວັນ ໂດຍມີສາງຈໍາໜ່າຍຢູ່ແຂວງສະຫວັນນະເຂດ,ຫຼວງພະບາງ, ຈໍາປາສັກ ແລະນະຄອນຫຼວງວຽງຈັນ, ມີຕົວແທນຈໍາ ໜ່າຍ 24 ຫົວໜ່ວຍທົ່ວປະເທດ ຊຶ່ງບໍລິສັດໄດ້ໃຫ້ບູລິມະສິດຮັບແຮງງານພາຍ ໃນນອກຈາກຈຳໜ່າຍພາຍໃນແລ້ວຍັງໄດ້ສົ່ງອອກໄປຕ່າງປະເທດຈຳນວນໜຶ່ງ, ໃນໄລຍະການລະບາດຂອງພະຍາດໂຄວິດ-19 ບໍລິລັດ ໄດ້ເອົາໃຈໃສ່ປ້ອງກັນພະຍາດຢ່າງເຂັ້ມງວດເປັນຕົ້ນການວັດແທກອຸນຫະພູມ, ແນະນຳໃຫ້ພະນັກງານປ້ອງກັນດ້ວຍການໃສ່ຜ້າອັດປາກ, ໝັ່ນລ້າງມື ແລະ ຮັກສາໄລຍະຫ່າງຊຶ່ງບໍລິສັດໄດ້ສະແດງຄວາມໝັ້ນໃຈຕໍ່ການຊີ້ນຳຂອງລັດຖະ ບານທີ່ໄດ້ເອົາໃຈໃສ່ວາງມາດຕະການປ້ອງກັນ ແລະໂຕ້ຕອບພະຍາດດັ່ງກ່າວເຮັດໃຫ້ ສປປ ລາວ ມີຜູ້ຕິດເຊື້ອໜ້ອຍທີ່ສຸດ ແລະບໍ່ມີຜູ້ເສຍຊີວິດ.

 ຫຼັງຈາກນັ້ນກໍ່ໄດ້ສືບຕໍ່ໄປຢ້ຽມຢາມ ແລະຊຸກຍູ້ການຜະລິດຢູ່ຟາມລ້ຽງງົວຄອນສະຫວັນເພັດພູທອງຢູ່ບ້ານໂພນໄຮ່ຄຳ ເມືອງໄຊທານີ ໂດຍໄດ້ຮັບການຕ້ອນຮັບຈາກທ່ານ ຄອນສະຫວັນ ເພັດພູທອງ ເຈົ້າຂອງຟາມດັ່ງກ່າວພ້ອມທັງໄດ້ຮັບຟັງການລາຍງານວ່າ: ຟາມລ້ຽງງົວຄອນສະຫວັນເພັດພູທອງສ້າງຕັ້ງປີ 2015 ເພື່ອລ້ຽງງົວຊີ້ນຈຳ ໜ່າຍ ໂດຍເອົາງົວຈ່ອຍມາທອມໃຫ້ຕຸ້ຍປະຈຸບັນ ມີງົວ 263 ໂຕ ເມື່ອຮອດປີ 2025 ຈະຂະຫຍາຍການລ້ຽງງົວໃຫ້ໄດ້ 800 ໂຕ ແລະຈະມີແຜນຂະຫຍາຍການລ້ຽງ ງົວເພີ່ມຂຶ້ນເລື້ອຍໆ ເນື້ອທີ່ລວມຂອງຟາມ 11 ກວ່າເຮັກຕາ ໃນນີ້ມີເນື້ອທີ່ປູກຫຍ້າ 5 ເຮັກຕາ, ໜອງປາ, ເນື້ອທີ່ນາ ແລະສິ່ງປຸກສ້າງອື່ນໆ.

   ຈາກນັ້ນຄະນະກໍ່ໄດ້ໄປຢ້ຽມຊົມສະຖານທີ່ທ່ອງທ່ຽວນໍ້າປຽນຢໍລະປາຢູ່ບ້ານຊຽງແລ່ທ່າ ເມືອງປາກງື່ມ ໂດຍໄດ້ຕ້ອນຮັບຈາກທ່ານ ສົມເພັດ ມ້າວປະເສີດ ປະທານສະ ຖານທີ່ທ່ອງທ່ຽວນໍ້າປຽນຢໍລະປາພ້ອມທັງໄດ້ຮັບການລາຍງານວ່າ: ສະຖານທີ່ທ່ອງທ່ຽວແຫ່ງນີ້ເລີ່ມພັດທະນາໃນຕົ້ນປີ 2019 ໂດຍເອົາຮູບແບບການພັດທະນາມາ ຈາກສະຖານທີ່ທ່ອງທ່ຽວນໍ້າກັດຢໍລະປາ ແຂວງອຸດົມໄຊ ໂດຍແບ່ງເປັນ 3 ໄລຍະໃນນີ້ໄລຍະທໍາອິດໄດ້ພັດທະນາການທ່ອງທ່ຽວໄດ້ສໍາເລັດໂດຍພື້ນຖານປະກອບມີສວນ ນໍ້າ, ຂົວອູ່, ຈຸດຖ່າຍຮູບວິວຕ່າງໆ ໄຕ່ຂົວອູ່ເທິງປາຍໄມ້25 ຂົ່ວ, ຂີ່ໂລເລີ້, ຂີ່ສະລິງໂດຍຜ່ານການໄຕ່ຕາໜ່າງຂົວອູ່ຊົມນໍ້າຕົກ, ໄປຢືນຖ່າຍຮູບໂດຍຜ່ານຕາໜ່າງຂົວອູ່, ນໍ້າຕົກ, ຂີ່ຕາໜ່າງແມງມຸມ, ຂີ່ລຸກ, ຊຶ່ງເປັນລົດນ້ອຍທ່ຽວຊົມທຳມະຊາດ ແລະຂີ່ລົດເອທີວີນອກນີ້ຍັງມີກິດຈະກຳທ່ອງທ່ຽວອື່ນໆໄວ້ບໍລິການລາຄາເລີ່ມຕົ້ນ 30 ພັນກີບຂຶ້ນໄປປະຈຸບັນໄດ້ເປີດໃຫ້ບໍລິການເປັນທາງການ ແລະ ໄດ້ຮັບການຕອບຮັບເປັນຢ່າງດີສ່ວນແຜນໃນຕໍ່ໜ້າຈະພັດທະນາໃຫ້ມີຣີສອດບ້ານຊົນເຜົ່າ ແລະ ສວນພຶກສາ ສາດ ແລະອື່ນໆອີກ.

แชร์