ທ່ຽວຊົມນໍ້າຕົກຕາດນໍ້າສະນາມ

 ນໍ້າຕົກຕາດນໍ້າສະນາມຕັ້ງຢູ່ໃນເຂດປ່າສະຫງວນພູຫີນປູນ ບ້ານຄູນຄຳ ເມືອງຄູນຄຳ ແຂວງ ຄຳມ່ວນ, ນໍ້າຕົກຕາດຫ່າງຈາກ ຕົວເມືອງ 3 ກິໂລແມັດ, ສາມາດຂີ່ລົດເຂົ້າໄປໄດ້ປະມານ 2 ກິໂລ ແມັດ, ຈາກນັ້ນເຮົາກໍ່ຍ່າງຂຶ້ນພູ ເຂົາດິນທີ່ມີປ່າໄມ້ອຸດົມສົມບູນມີ ນົກ, ສັດປ່າຫຼາຍຊະນິດພັນ, ໄລຍະທາງດັ່ງກ່າວນີ້ກໍ່ປະມານ 1 ກິໂລ ແມັດ ກໍ່ຈະເຖິງຈຸດນໍ້າຕົກຕາດນໍ້າ ຕົກຕາດເປັນນໍ້າທີ່ໄຫຼມາຈາກຮ່ອມ ພູນັ້ນຜ່ານໂງ່ນຫີນທີ່ເກາະກ່າຍກັນ ເປັນຊັ້ນໆ ຈຶ່ງເຮັດໃຫ້ນໍ້າຕົກຕາດ ນໍ້າສະນາມ ເປັນນໍ້າຕົກຕາດທີ່ມີ ຫຼາຍຊັ້ນສະລັບລຽງລາຍກັນ, ນໍ້າທີ່ໄຫຼທີ່ຕົກລົງມາຈາກໜ້າຜາ ລົງສູ່ອ່າງນໍ້າທີ່ກວ້າງໃຫ່ຍຢູ່ດ້ານລຸ່ມເຮັດໃຫ້ເກີດເປັນລະອອງນໍ້າກະຈາຍໄປທົ່ວບໍລິເວນອ້ອມຮອບ ແລະເມື່ອປະສານກັບແສງແດດທີ່ສາດ ສ່ອງລົງມາຈະເກີດແສງເຫຼື້ອມລະຍິບລະຍັບຄ້າຍຄືກັບສາຍຮຸ້ງທີ່ງົດງາມໜ້າສະອອນໃຈ.

    ນໍ້າຕົກຕາດນໍ້າສະນາມ ເໝາະກັບການໄປນັ່ງກິນເຂົ້າປ່າ ແລະລົງ ຫຼີນນໍ້າທີ່ໃສເຢັນສະບາຍເພາະວ່າ ຕາດແຫ່ງນີ້ມີຈຸດຫຼິ້ນນໍ້າທີ່ປອດໄພ ຫຼາຍບ່ອນພ້ອມກັນນີ້ທ່ານຍັງສາມາດຢ່າງຊົມທຳມະຊາດອ້ອມຮອບ ທີ່ຖືກປົກຫຸ່ມດ້ວຍປ່າໄມ້ຕຶບໜາທີ່ ເຕັມໄປດ້ວຍຕົ້ນໄມ້ໃຫຍ່ທີ່ຂຽວສົດງົດງາມ ແລະຜືນປ່າທີ່ຍັງຄົງມີຄວາມອຸດົມສົມບູນຂອງຊີວະນາໆ ພັນປະກອບກັບຄວາມງາມຂອງ ດອກໄມ້ປ່າຫຼາຍຊະນິດທີ່ເກີດຂຶ້ນຕາມທຳມະຊາດຊະນິດຕ່າງໆທີ່ກຳ ລັງບານແຢ້ມຢູ່ເທີງໜ້າຜາມີຫຼາຍ ສີສະຫຼັບຊັບຊອນກັນກາຍສີສັນໃຫ້ ຕາດແຫ່ງນີ້ຍິ່ງມີຄວາມງົດງາມ ຫຼາຍຂຶ້ນ, ນອກນັ້ນຖ້າຫາກເຮົາ ເຂົ້າໄປໃນຍາມເຊົ້າ ໂດຍບໍ່ໃຊ້ສຽງ ດັງໂອກາດເຮົາຈະເຫັນຝູງລີງ, ໂຄ່ງ, ຂາແດງມາກິນນໍ້າ ໂດຍສະເພາະ ແລ້ວໃນຍາມເວລາປະມານ 8:00 ໂມງ.

----------

ໂດຍ: ວົງມະນີ

 

แชร์