ອັດຕະປື ເສຍຊີວິດ 29 ຄົນ ຍ້ອນອຸບັດເຫດ

  ໄລຍະ 8 ເດືອນທີ່ຜ່ານມາຂອງປີ 2020 ທົ່ວແຂວງອັດຕະປືມີອຸບັດເຫດເກີດຂຶ້ນທັງໝົດ 116 ລາຍ, ລວມມູນຄ່າເສຍຫາຍສູງເຖິງ 2 ຕື້ກວ່າກີບ, ໂດຍອີງຕາມການໃຫ້ສໍາພາດໃນວັນທີ 1 ກັນຍາ 2020 ຂອງທ່ານ ຮ້ອຍເອກ ບົວໄລ ປານຄຳ ຫົວໜ້າກອງຄະດີອຸບັດເຫດກອງບັນຊາການປ້ອງກັນຄວາມສະຫງົບແຂວງອັດຕະປື ໃຫ້ຮູ້ວ່າ: ໃນໄລຍະ 8 ເດືອນປີ 2020 ທົ່ວແຂວງອັດຕະປືມີອຸບັດເຫດເກີດຂຶ້ນທັງໝົດ 116 ລາຍ, ທຽບໃສ່ໃນໄລຍະດຽວກັນຂອງປີຜ່ານມາຫຼຸດລົງ 22 ລາຍ ແຕ່ເມື່ອທຽບໃສ່ຜູ້ເສຍຊີວິດເພີ່ມຂຶ້ນ 6 ລາຍ, ອຸບັດເຫດທີ່ເກີດຂຶ້ນນັ້ນໄດ້ມີພາຫະນະເປ່ເພ 204 ຄັນ,ເປ່ເພເລັກນ້ອຍ 96 ຄັນ, ເປ່ເພສົມຄວນ 100 ຄັນ ແລະໃຊ້ການບໍ່ໄດ້ມີ 8 ຄັນ, ອຸບັດເຫດທີ່ເກີດຂຶ້ນມີລົດຈັກຕຳລົດຈັກ45 ລາຍ, ລົດຈັກຕຳລົດໃຫຍ່ 37 ລາຍ, ລົດໃຫຍ່ຕຳລົດໃຫຍ່ 8 ລາຍ, ລົດໃຫຍ່ ປີ້ນເອງ 9 ລາຍ, ລົດຈັກຕຳສັດລ້ຽງ 5 ລາຍ, ລົດໃຫຍ່ຕຳສັດລ້ຽງ2 ລາຍ, ລົດຈັກຕຳຄົນຍ່າງ 2 ລາຍ, ມີຄົນໄດ້ຮັບບາດເຈັບທັງໝົດ 216 ຄົນ,ບາດເຈັບເລັກນ້ອຍ 91 ຄົນ, ບາດເຈັບສົມຄວນ 86 ຄົນ, ເຈັບສາຫັດ 10 ຄົນ ແລະເສຍຊີວິດ 29 ຄົນ, ຍິງ 2 ຄົນ, ລວມມູນຄ່າເສຍຫາຍທັງໝົດ 2 ຕື້ກວ່າກີບ, ສ່ວນສາເຫດຂອງການເກີດອຸບັດເຫດສ່ວນໃຫຍ່ຍ້ອນນັກຂັບຂີ່ບໍ່ປະຕິບັດກົດລະບຽບຈໍລະຈອນເປັນຕົ້ນ, ແມ່ນເກີດຈາກການດື່ມສິ່ງມືນເມົາແລ້ວຂັບຂີ່ລວມທັງສະພາບເຕັກນິກຂອງລົດບໍ່ຄົບຖ້ວນ.

 ທ່ານ ຮ້ອຍເອກ ບົວໄລ ປານຄຳ ໃຫ້ຮູ້ຕື່ມອີກວ່າ: ໃນໄລຍະຜ່ານມາພະແນກຈໍລະຈອນແຂວງໄດ້ສຸມໃສ່ເຄື່ອນໄຫວສະກັ້ນສະພາບອຸບັດເຫດບົນທ້ອງຖະໜົນດ້ວຍຫຼາຍວິທີເປັນຕົ້ນໄດ້ລົງເຮັດວຽກໂຄສະນາຕາມສຳນັກງານອົງການ, ໂຮງຮຽນ ແລະ ສະຖານທີ່ຊຸມຊົນ, ທັງຈັດສັນລະບຽບການສັນຈອນຕາມທ້ອງຖະໜົນຫຼວງ ແລະ ກວດກາຕາມປ້ອມດ່ານພ້ອມທັງເຮັດວຽກສຶກສາອົບຮົມກ່າວເຕືອນຜູ້ຂັບຂີ່ລົດໄວ,ໃຊ້ສຽງດັງ,ການຂີ່ລົດເປັນກຸ່ມເປັນແພທີ່ສ່ຽງຕໍ່ການເກີດອຸບັດເຫດ ແລະບຸກຄົນທີ່ດື່ມສິ່ງມຶນເມົາພ້ອມທັງໃຊ້ມາດຕະການກັກຍຶດຍານພາຫະນະເພື່ອປັບໃໝຕາມສະຖານໜັກ, ເບົາແຕ່ກໍຍັງເຫັນວ່າສະພາບການເກີດອຸບັດເຫດຍັງປາກົດມີໃຫ້ເຫັນຢູ່.

  ໂອກາດດັ່ງກ່າວທ່ານ ຮ້ອຍເອກ ບົວໄລ ປານຄໍາ ຫົວໜ້າກອງຄະດີອຸບັດເຫດກອງບັນຊາການປ້ອງກັນຄວາມສະຫງົບ ແຂວງອັດຕະປື ຍັງໄດ້ຮຽກຮ້ອງເຖິງບັນດາຜູ້ຂັບຂີ່ ແລະນຳໃຊ້ຍານພາຫະນະທຸກປະເພດໃນທ້ອງຖະໜົນຕ້ອງເອົາໃຈໃສ່ປະຕິບັດກົດລະບຽບຈໍລະຈອນວາງອອກຢ່າງເຂັ້ມງວດເພື່ອຫຼີກລ້ຽງການເກີດອຸບັດເຫດ.

------------

ຂ່າວ: ວັດທະນາ ຫຼວງອາໄພ 

แชร์