ປາກອູ ຕິດຕັ້ງໄຟເຍືອງທາງສຳເລັດເດືອນນີ້

  ເມືອງປາກອູແຂວງຫຼວງພະບາງ ກຽມຕິດຕັ້ງໄຟເຍືອງທາງແຕ່ສາມແຍກທາງເຂົ້າບ້ານສົມສະນຸກຫາໂຮງໝໍເມືອງປາກອູ ແລະສ້ອມແປງໄຟເຍືອງທາງຂົວນໍ້າອູທາງເລກ 13 ເໜືອ ໂດຍແມ່ນບໍລິສັດເພັດມະນີກໍ່ສ້າງ ແລະ ສ້ອງແປງໄຟຟ້າຈໍາກັດຜູ້ດຽວເປັນຜູ້ຮັບເໝົາກໍ່ສ້າງລວມມູນຄ່າ 100 ລ້ານກວ່າກີບ ແລະ ທ້າຍເດືອນກັນຍາ 2020 ນີ້ໃຫ້ສໍາເລັດ.

  ທ່ານ ໜໍ່ຈັນ ພົມມະປັນຍາ ຫົວໜ້າຫ້ອງການພະລັງງານ-ບໍ່ແຮ່ ເມືອງປາກອູໄດ້ຜ່ານຮ່າງສັນຍາຂອງໂຄງການກໍ່ສ້າງ ແລະຕິດຕັ້ງໄຟເຍືອງທາງຮູ້ວ່າ: ສໍາລັບມູນຄ່າຂອງໂຄງການນີ້ແມ່ນ 105,39 ລ້ານກີບ ເປັນທຶນຂອງລັດ 100% ໂດຍນໍາໃຊ້ເງິນພັດທະນາທ້ອງຖິ່ນປີ 2020 ຂອງໂຄງການຂຸດຄົ້ນ ແລະ ປຸງແຕ່ງແຮ່ຄໍາຜາປົ່ນ, ໃຊ້ເວລາການກໍ່ສ້າງ 90 ວັນ ໃຫ້ສໍາເລັດຊຶ່ງເລີ່ມມາແຕ່ວັນທີ 1 ກໍລະກົດ ແລະທ້າຍເດືອນກັນຍາ 2020 ນີ້.

  ສ່ວນການຈັດຕັ້ງປະຕິບັດໜ້າວຽກໂດຍລວມມາຮອດປະຈຸບັນແມ່ນສໍາເລັດແລ້ວ 50%, ການຕິດຕັ້ງໄຟເຍືອງທາງສາມແຍກເຂົ້າບ້ານສົມສະນຸກຫາໂຮງໝໍເມືອງໄດ້ຕິດຕັ້ງເສົາ 10 ຕົ້ນໄລຍະຫາງ 500 ແມັດ, ເປັນເສົາເຫຼັກເຄືອບກາວາໄນ ມີຄວາມສູງ 6 ແມັດ, ໃຊ້ໄຟ LED ຂະໜາດດອກ 90ວັດ, ຕີນເສົາເທເບຕົງເສີມເຫຼັກ ແລະສ້ອມແປງໄຟເຍືອງທາງຂົວນໍ້າອູທາງເລກທີ 13 ເໜືອບ້ານສົມສະນຸກຈໍານວນ 4 ຕົ້ນການຕິດຕັ້ງແມ່ນນໍາໃຊ້ໄຟຟ້າທາງຫຼວງ 220 ໂວນ.

ຈາກນັ້ນຜູ້ເຂົ້າຮ່ວມໄດ້ປະກອບຄໍາເຫັນໃສ່ຮ່າງສັນຍາເພື່ອເຮັດໃຫ້ມີເນື້ອໃນຄົບຖ້ວນຈະແຈ້ງ ແລະມີຄວາມເອກະພາບກັນທັງພາກລັດແລະບໍລິສັດຜູ້ຮັບເໝົາກໍ່ສ້າງ ແລະພ້ອມກັນລົງນາມເຊັນສັນຍາຮ່ວມກັນລະຫວ່າງຫົວໜ້າຫ້ອງການພະລັງງານ-ບໍ່ແຮ່ ເມືອງປາກອູກັບຫົວໜ້າບໍລິສັດເພັດມະນີກໍ່ສ້າງ ແລະສ້ອງແປງໄຟ້າຈໍາກັດຜູ້ດຽວ ໂດຍຊ້ອງໜ້າທ່ານ ສີມອນ ສະເຫຼີມສັກ ຮອງເຈົ້າເມືອງປາກອູ, ມີຫ້ອງການທີ່ກ່ຽວຂ້ອງອ້ອມຂ້າງເມືອງ, ວິຊາການຂອງບໍລິສັດ ແລະແຂກຖືກເຊີນເຂົ້າຮ່ວມເປັນສັກຂີພິຍານ, ຊຶ່ງພິທີຈັດຂຶ້ນໃນວັນທີ 1 ກັນຍາ 2020 ທີ່ຫ້ອງປະຊຸມຫ້ອງວ່າການປົກຄອງເມືອງປາກອູ.

   ໂອກາດນີ້ທ່ານຮອງເຈົ້າເມືອງຍັງໄດ້ເນັ້ນໜັກໃຫ້ເຈົ້າຂອງໂຄງການຕ້ອງກວດກາ, ວາງແຜນໃຫ້ຖືກຕ້ອງຕາມເຕັກນິກວິຊາການ, ການກວດກາປະເມີນຄຸນນະພາບຮຽກຮ້ອງໃຫ້ບໍລິສັດຕ້ອງມີການວາງມາຕະການເພື່ອຄວາມປອດໄພໃນການປະຕິບັດໜ້າທີ່, ຕ້ອງຮັບປະກັນດ້ານປະລິມານ ແລະຄຸນນະພາບທັງຮັບປະກັນການຊົມໃຊ້ທີ່ຍາວນານ.

-------------

ຂ່າວ:  ສີສຸວັນ

ໜັງສືພິມເສດຖະກິດ-ສັງຄົມ

แชร์