ສາລະວັນ ເສີມທັກສະຜູ້ນຳທ່ຽວ

    ພາຍຫຼັງໄດ້ເປີດບັ້ນຝຶກອົບຮົມພະນັກງານນຳທ່ຽວພື້ນທີ່ສະເພາະຢູ່ແຂວງສາລະວັນເພື່ອຍົກລະດັບຄວາມຮູ້,ຄວາມສາມາດໃຫ້ແກ່ພະນັກງານນຳທ່ຽວ,ຝຶກແອບທັກສະໃຫ້ມີຄວາມຊຳນິຊຳນານເປັນມືອາຊີບຫຼາຍຂຶ້ນ, ມາໃນວັນທີ 1 ກັນຍາ 2020 ກໍ່ໄດ້ສຳເລັດລົງ, ຊຶ່ງໄດ້ຈັດຂຶ້ນຢູ່ທີ່ຫ້ອງປະຊຸມຂອງພະແນກຖວທແຂວງສາລະວັນ, ໂດຍການເປັນປະທານຂອງ ທ່ານ ມະໄລວອນ ສີປະເສີດ ຮັກສາການຫົວໜ້າພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວແຂວງ, ໃຫ້ກຽດເຂົ້າຮ່ວມມີຄະນະພະແນກ, ຫົວໜ້າຂະແໜງທ່ອງທ່ຽວ, ປະທານສະມາຄົມການທ່ອງທ່ຽວແຂວງ, ພ້ອມດ້ວຍພະກັນງານ ແລະສຳມະນາກອນເຂົ້າຮ່ວມ.

  ທ່ານ ນາງມະນີສາຄອນ ທຳມະວົງໄຊ ຫົວໜ້າພະແນກປະຊາສຳພັນການທ່ອງທ່ຽວກົມໂຄສະນາການທ່ອງທ່ຽວກໍ່ໄດ້ຜ່ານບົດລາຍງານຂອງການຝຶກອົບຮົມຄັ້ງນີ້, ມີຜູ້ເຂົ້າຮ່ວມທັງໝົດ 14 ຄົນ ແລະມີຄະນະຮັບຜິດຊອບຈາກສູນກາງ 6 ຄົນ, ມີ 2 ຫົວຂໍ້ທີ່ນຳມາຝຶກອົບຮົມ ເປັນຕົ້ນແມ່ນພື້ນຖານການຕ້ອນຮັບ ແລະການບໍລິການທີ່ດີ, ການຕ້ອນຮັບທີ່ປະທັບໃຈເຊັ່ນ: ການຍີ້ມ, ການທັກທາຍທີ່ປະທັບໃຈ,ການຖາມຄວາມຕ້ອງການຂອງແຂກ,ການໃຫ້ຂໍ້ມູນທີ່ແຂກຕ້ອງການ ແລະການຕອບສະໜອງຄວາມຕ້ອງການ, ຫົວຂໍ້ທີ 2 ເຕັກນິກການນຳທ່ຽວພື້ນທີ່ສະເພາະແມ່ນຄວາມຮູ້ກ່ຽວກັບການນຳທ່ຽວ, ຄຸນສົມບັດ, ມາລະຍາດຂອງພະນັກງານນຳທ່ຽວ ແລະລະດັບພະນັກງານນຳທ່ຽວ, ໜ້າທີ່ ແລະຄວາມຮັບຜິດຊອບຂອງພະນັກງານນຳທ່ຽວຂັ້ນບ້ານ.

  ຈຸດປະສົງຂອງການຝຶກອົບຮົມຄັ້ງນີ້ກໍ່ເພື່ອເຮັດໃຫ້ພະນັກງານນຳທ່ຽວມີຄວາມຮູ້, ຄວາມສາມາດ ແລະຄຸນສົມບັດກ່ຽວກັບການເປັນພະນັກງານນຳທ່ຽວສະເພາະພື້ນ ທີ່ ແລະ ເພື່ອເປັນການຝຶກແອບທັກສະການເປັນພະນັກງານນຳທ່ຽວສະເພາະພື້ນທີ່ໃຫ້ມີຄວາມຊຳນານແລະເປັນມືອາຊີບຫຼາຍຂື້ນ ແລະ 1 ທັງເປັນການໃຫ້ຄວາມຮູ້ກ່ຽວກັບວິຊາສະເພາະຂອງພະນັກງານນຳທ່ຽວສະເພາະພື້ນທີ່, ຜ່ານການຝຶກອົບຮົມສາມາດປະເມີນໄດ້ບັນດາສຳມະນາກອນມີຄວາມກະຕືລືລົ້ນ, ພ້ອມທັງມີສ່ວນຮ່ວມໃນການປະກອບຄຳຄິດ, ຄຳເຫັນ ແລະ ມີຄວາມຫ້າວຫັນໃນການລົງພາກປະຕິບັດຕົວຈິງ, ຊຶ່ງຊຸດຝຶກອົບຮົມດັ່ງກ່າວນີ້ຈັດຂຶ້ນໂດຍພາຍໃຕ້ໂຄງການພັດທະນາໂຄງລ່າງພື້ນຖານເພື່ອສົ່ງເສີມການນຳທ່ຽວໄລຍະ 2 .

  ຈາກນັ້ນທ່ານ ມະໄລວອນ ສີປະເສີດ ຮັກສາການຫົວໜ້າພະແນກ ຖວທ ແຂວງສາລະວັນກໍ່ໄດ້ມອບໃບຢັ້ງຢືນ, ພ້ອມທັງໃຫ້ທິດຊີ້ນຳໃນການຈັດຕັ້ງປະຕິບັດວຽກງານດັ່ງກ່າວ, ກ່ອນອື່ນທ່ານກໍ່ໄດ້ຍ້ອງຍໍຊົມເຊີຍທຸກພາກສ່ວນທີ່ກ່ຽວຂ້ອງທີ່ເຮັດໃຫ້ບັນຝຶກອົບຮົມໃນຄັ້ງນີ້ເກີດຂື້ນໄດ້ ແລະສຳເລັດໄປດ້ວຍດີ, ໂດຍສະເພາະກໍ່ແມ່ນກະຊວງ ຖວທ ແລະກົມໂຄສະນາການທ່ອງທ່ຽວທີ່ໄດ້ເປີດຊຸດຝຶກອົບຮົມໃຫ້ຄວາມຮູ້ແກ່ພະນັກງານນຳທ່ຽວຂອງແຂວງ ແລະຂັ້ນບ້ານໂດຍສະເພາະບ້ານຄຳທອງ, ບ້ານປາກປົ່ງແລະບ້ານຕະແຫຼວ, ໃນ 3 ບ້ານດັ່ງກ່າວນີ້ແມ່ນເປັນບ້ານທີ່ຕິດກັບແຫຼ່ງທ່ອງທ່ຽວພູຜາສຸກ ແລະເປັນແຫ່ງທ່ອງທ່ຽວໜຶ່ງທີ່ສຳຄັນອີກແຫ່ງໜຶ່ງຂອງແຂວງ, ຜ່ານມາອົງການປົກຄອງແຂວງກໍ່ໄດ້ສຸມໃສ່ໃນການລົງທຶນ, ການພັດທະນາຢ່າງຫຼວງຫຼາຍ ແລະ ໄດ້ເນັ້ນໃຫ້ໄກນຳທ່ຽວຂັ້ນບ້ານຈົ່ງເປັນຫູ, ເປັນຕາໃຫ້ການຈັດຕັ້ງ, ພ້ອມທັງອະນຸລັກຮັກສາສິ່ງແວດລ້ອມໃນເຂດແຫຼ່ງທ່ອງທ່ຽວດັ່ງກ່າວໃຫ້ມີຄວາມສວຍງາມ, ຫ້າມທຳລາຍ ແລະເອົາໃຈໃສ່ປະຕິບັດໜ້າທີ່ຂອງຕົນໃນການເປັນໄກນຳທ່ຽວທີ່ດີເພື່ອໃຫ້ກາຍເປັນໄກນຳທ່ຽວແບບມືອາຊີບ.

------------

ຂ່າວ: ສິດຕາ ເພັດວົງສາ

ໜັງສືພິມເສດຖະກິດ-ສັງຄົມ

แชร์