ສະຫຼອງວັນຊາດຫວຽດນາມຄົບຮອບ 75 ປີ

   ວັນທີ 2 ກັນຍາ 2020 ທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໄດ້ມີພິທີໂຮມຊຸມນຸມສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 75 ປີ (2 ກັນຍາ1945-2 ກັນຍາ 2020) ໂດຍການໃຫ້ກຽດເຂົ້າຮ່ວມຂອງທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ທ່ານ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມປະຈຳ ສປປ ລາວ ພ້ອມດ້ວຍການນຳພັກ-ລັດ ແລະ ພາກສ່ວນກ່ຽວຂ້ອງລາວ ແລະຫວຽດນາມເຂົ້າຮ່ວມ.

  ໃນໂອກາດດັ່ງກ່າວທ່ານ ນາງ ປານີ ຢາທໍ່ຕູ້ ໄດ້ກ່າວຄຳປາໄສສະແດງຄວາມປິຕິຊົມຊື່ນເປັນຢ່າງຍິ່ງ ແລະເປັນກຽດຢ່າງສູງທີ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ລັດຖະບານ, ສະພາແຫ່ງຊາດແຫ່ງ ສປປ ລາວ, ແນວລາວສ້າງຊາດ, ອົງການປົກຄອງນະຄອນຫຼວງວຽງຈັນ, ສະມາຄົມມິດຕະພາບລາວ-ຫວຽດນາມຂັ້ນສູນກາງໄດ້ຈັດຕັ້ງພິທີໂຮມຊຸມນຸມໃນຄັ້ງນີ້ເພື່ອຂໍ່ານັບຮັບຕ້ອນ ແລະ ຊົມເຊີຍວັນຄົບຮອບ 75 ປີ ແຫ່ງການສະຖາປະນາເປັນປະເທດສາທາລະນະລັດສັງຄົມນິຍົມຫວຽດນາມ ຊຶ່ງເປັນລັດກໍາມະກອນ-ຊາວນາລັດທໍາອິດຢູ່ອາຊີອາຄະເນ, ພ້ອມນີ້ທ່ານປະທານສະພາແຫ່ງຊາດໄດ້ຢໍ້າວ່າ: ຫວຽດນາມແມ່ນຊາດວິລະຊົນ, ປະຊາຊົນຫວຽດນາມແມ່ນປະຊາຊົນວິລະຊົນໃນການຕໍ່ສູ້ປົດປ່ອຍຊາດ, ການປົກປັກຮັກສາ ແລະສ້າງສາປະເທດຊາດຕາມເສັ້ນທາງສັງຄົມນິຍົມ, ພ້ອມທັງໄດ້ທົບທວນຄືນບັນດາຂີດໝາຍປະຫວັດສາດທີ່ສຳຄັນຂອງຫວຽດນາມຕະຫຼອດໄລຍະ 75 ປີຜ່ານມາ.

  ທ່ານ ນາງ ປານີ ຢາທໍ່ຕູ້ ຍັງໄດ້ຕີລາຄາສູງທີ່ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຫວຽດນາມສາມາດຍາດໄດ້ໄຊຊະນະ ແລະຜົນງານໃຫຍ່ຫຼວງຮອບດ້ານ ແລະ ມີລັກສະນະປະຫວັດສາດ, ໃນການຕໍ່ສູ້ຢ່າງທໍລະຫົດອົດທົນຈົນສາມາດປົດປ່ອຍຕົນເອງໃຫ້ຫຼຸດພົ້ນອອກຈາກແອກຄອບຄອງຂອງພວກຈັກກະພັດລ່າເມືອງຂຶ້ນທັງເກົ່າ ແລະໃໝ່, ນຳພາປະເທດດຳເນີນພາລະກິດປ່ຽນແປງໃໝ່ ແລະສາມາດເຮັດໃຫ້ປະເທດຫຼຸດພົ້ນອອກຈາກສະຖານະພາບປະເທດທຸກຍາກ ແລະດ້ອຍ ພັດທະນາ, ຖານະບົດບາດ ແລະຊື່ສຽງຂອງປະເທດຫວຽດນາມໄດ້ດັງກ້ອງໄກອອກໄປທົ່ວໂລກ, ພ້ອມນີ້, ຍັງໄດ້ຕີລາຄາສູງ ແລະຕາງໜ້າພັກ-ລັດຖະບານ ແລະປະຊາ ຊົນລາວບັນດາເຜົ່າສະແດງຄວາມຮູ້ບຸນຄຸນຢ່າງເລິກເຊິ່ງ ແລະຄວາມຂອບໃຈຢ່າງຈິງໃຈມາຍັງພັກ, ລັດຖະບານ ແລະປະຊາຊົນຫວຽດນາມທີ່ໄດ້ໃຫ້ການສະໜັບສະໜູນຢ່າງແຮງກ້າ, ການຊ່ວຍເຫຼືອອັນໃຫຍ່ຫຼວງ, ລໍ້າຄ່າ, ທັນການ ແລະມີປະສິດທິຜົນແກ່ພາລະກິດຕໍ່ສູ້ປົດປ່ອຍໃນເມື່ອກ່ອນກໍ່ຄືໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງປະຊາຊົນລາວໃນປະຈຸບັນ ແລະໃຫ້ຄຳໝັ້ນສັນຍາວ່າ ສປປ ລາວ ຈະຮ່ວມກັບ ສສ ຫວຽດນາມ ປົກປັກຮັກສາ ແລະ ເສີມຂະຫຍາຍສາຍພົວ ພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານທີ່ປະທານໂຮ່ຈິມິນຜູ້ຍິ່ງໃຫຍ່ ແລະປະທານ ໄກສອນພົມວິຫານທີ່ແສນເຄົາລົບຮັກເປັນຜູ້ສ້າງຕັ້ງ ແລະເພີ່ມພູນຄູນສ້າງຊຶ່ງໄດ້ກາຍເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງປະເທດລາວ-ຫວຽດນາມ, ທັງເປັນແບບຢ່າງທີ່ຫາຍາກໃນການພົວພັນສາກົນໃຫ້ຈະເລີນງອກງາມຕະຫຼອດໄປ ແລະກາຍເປັນມູນມໍລະດົກອັນລໍ້າຄ່າໃຫ້ແກ່ຮຸ່ນລູກຮຸ່ນຫຼານຂອງພວກເຮົາສືບທອດຕໍ່ໄປ.

  ຈາກນັ້ນ, ທ່ານ ຫງວຽນ ບ໋າ ຮຸ່ງ ໄດ້ກ່າວຄໍາເຫັນ ໂດຍໄດ້ຍົກໃຫ້ເຫັນເຖິງບັນດາຜົນງານ, ໄຊຊະນະຂອງຫວຽດນາມໃນຕະຫຼອດໄລຍະ 75 ປີຜ່ານມາ, ພາຍໃຕ້ການນນຳພາອັນປີຊາສາມາດ, ສະຫຼາດສ່ອງໃສຂອງພັກກອມມູນິດຫວຽດນາມພ້ອມທັງຕີລາຄາສູງເຖິງມູນເຊື້ອແຫ່ງການພົວພັນແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດຫວຽດນາມ-ລາວ ແລະໄດ້ສະແດງຄວາມຮູ້ບຸນຄຸນຕໍ່ການນຳພັກ-ລັດຖະບານ ແລະປະຊາຊົນລາວທີ່ຍາມໃດກໍໃຫ້ການສະໜັບສະໜູນຊ່ວຍເຫຼືອພັກ-ລັດຖະບານ ແລະປະຊາຊົນຫວຽດນາມຕະຫຼອດມາ ແລະ ຈະເຮັດທຸກຄວາມສາມາດເພື່ອປົກປັກຮັກສາ ແລະ ເສີມຂະຫຍາຍ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ-ລາວໃຫ້ນັບມື້ແຕກດອກອອກຜົນແລະມີຜົນປະໂຫຍດຮ່ວມ ກັນຂອງສອງຊາດຫວຽດນາມ-ລາວ.

   ພາຍໃນງານດັ່ງກ່າວບັນດາແຂກຍັງໄດ້ຮ່ວມເດີນຊົມງານວາງສະແດງຮູບພາບການຮ່ວມມືລາວ-ຫວຽດນາມ ພາຍໃຕ້ຫົວຂໍ້ສາຍພົວພັນລາວ-ຫວຽດນາມ, ຫວຽດ ນາມ-ລາວ ເພື່ອເຫຼີມສະຫຼອງວັນຊາດແຫ່ງ ສສ ຫວຽດນາມ ຄົບຮອບ 75 ປີ (2 ກັນຍາ 1945-2 ກັນຍາ 2020) ໂດຍກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວຮ່ວມກັບສະຖານທູດ ສສ ຫວຽດນາມ ນາມປະຈຳລາວຈັດຂຶ້ນ.

แชร์