ໂຮງຮຽນ ມສ ຕະໂອ້ຍ ເປີດສົກຮຽນໃໝ່

  ວັນທີ 1 ກັນຍາ 2020 ທີ່ ໂຮງຮຽນ ມສ ຕະໂອ້ຍ ເມືອງຕະໂອ້ຍ ແຂວງສາລະວັນ ໄດ້ຈັດພິທີໄຂສົກຮຽນໃໝ່ສົກຮຽນປີ 2020- 2021 ໂດຍການເປັນປະທານ ຂອງທ່ານ ແສງຄອນ ແກ້ວລັດທະວົງ ຜູ້ອຳນວຍການໂຮງຮຽນ ມສ ຕະໂອ້ຍ, ທ່ານ ເພັດສະໝອນ ຫຼວງລາດ ຮອງເຈົ້າເມືອງຜູ້ຊີ້ນຳຂົງເຂດວຽກງານວັດທະນະທຳ-ສັງຄົມໃນທົ່ວເມືອງ, ທ່ານ ສົມພາ ບຸບຜາວົງ ຕ່າງໜ້າຈາກຫ້ອງການສຶກສາທິການ ແລະກີລາເມືອງຕະໂອ້ຍ ຫົວໜ້າໜ່ວຍງານບໍລິຫານຫ້ອງການ, ມີບັນດາທ່ານຄູ-ອາຈານ, ເລຂາພັກນາຍບ້ານໃນ 2 ບ້ານຄື: ບ້ານເທສະບານ, ບ້ານຕະຫຼຸງ-ລະລາວ ແລະຕະຫຼອດຮອດນ້ອງໆນັກຮຽນເຂົ້າຮ່ວມ.

  ທ່ານ ວໍລະໄຊ ບຸນຍະວົງສີ ຮອງອຳນວຍການໂຮງຮຽນ ມສ ຕະໂອ້ຍ ໄດ້ຜ່ານບົດສະຫຼຸບປະຈຳສົກຮຽນ 2019-2020 ແລະ ທິດທາງແຜນການສົກຮຽນ 2020-2021 ດ້ານການຈັດການຮຽນ-ການສອນຄູສອນແຕ່ລະຄົນແມ່ນ ໄດ້ເອົາໃຈໃສ່ຂຶ້ນຫ້ອງສອນ, ສ້າງ ແຜນການສອນ, ແຕ່ງບົດສອນ ແລະຜະລິດສື່ການຮຽນ-ການສອນ ກ່ອນຂຶ້ນຫ້ອງສອນໃນນັ້ນນັກຮຽນ ຕົ້ນປີແຕ່ ມ1-ມ7 ມີທັງໝົດ 733 ຄົນ, ຍິງ 286 ຄົນ, ປະລະ 39 ຄົນ, ຍິງ 18 ຄົນ, ໂຈະການຮຽນ 12 ຄົນ, ຍິງ 3 ຄົນ, ຍົກຍ້າຍອອກ 4 ຄົນ, ຍິງ 3 ຄົນ, ຍົກຍ້າຍເຂົ້າ 1 ຄົນ, ນັກຮຽນຕົວຈິງປະຈຸບັນທັງໝົດມີ 679 ຄົນ, ຍິງ 262 ຄົນ, ຊຸກຍູ້ການແຕ່ງບົດສອນ, ສ້າງສື່ ການຮຽນ-ການສອນ, ເຊັນບົດສອນ, ກວດກາແຜນການສອນໄລຍະຍາວ, ຕິດຕາມຊຸກຍູ້ຈັດການ ຮຽນ-ການສອນຂອງຄູ-ອາຈານ ສັບຊ້ອນຄູ-ອາຈານສອນຖືກຕ້ອງຕາມສາຍວິຊາຮຽນ ແລະຈັດຕາຕະລາງການຮຽນ-ການສອນ, ກວດໃບປະກາດ ມ4-ມ7 ແລະກວດເອກະສານນັກຮຽນຍົກຍ້າຍປະຈຳສົກຮຽນ 2019-2020, ສຳເລັດການນິເທດພາຍໃນ 100%, ສຳເລັດການສອບເສັງພາກຮຽນທີ 1 ແລະພາກຮຽນທີ 2 ສົກຮຽນ 2019-2020, ໄດ້ມີການບຳລຸງນັກຮຽນເກັ່ງຂັ້ນເມືອງໄດ້ທີ 1 (ສາຍພາສາລາວ,ສາຍຄະນິດສາດ) ແລະຂັ້ນແຂວງສາມາດຍາດໄດ້ທີ 2 ຂອງແຂວງ (ສາຍຄະນິດສາດ), ໄດ້ມີການມອບຂອງຂວັນໃຫ້ນັກຮຽນເກັ່ງຂັ້ນຫ້ອງໃນແຕ່ ລະເດືອນ, ຫຼັກສູດແຕ່ລະວິຊາແມ່ນສອນທັນຕາມແຜນການໂຄງການຫຼັກສູດຂອງກະຊວງທິການ ແລະກີລາວາງອອກ.

 ສໍາລັບທິດທາງແຜນການໃນສົກຮຽນ 2020-2021 ຈະເລັງໃສ່ສຶກສາອົບຮົມຜັນຂະຫຍາຍມະຕິຄຳສັ່ງ, ເຊື່ອມຊຶມເອກະສານຕ່າງໆຂອງຂັ້ນເທິງໃຫ້ພະນັກງານ ຄູ-ອາຈານພາຍໃນໂຮງຮຽນມີສະຕິຕື່ນຕົວສູງ, ພັດທະນາການຮຽນ-ການສອນຂອງຄູ ແລະນັກຮຽນໃຫ້ມີທາງດ້ານປະລິມານ ແລະຄຸນນະພາບສູງຂຶ້ນເທື່ອລະກ້າວ, ສຶກ ສາສະພາບບັນຫາ, ຄວາມຕ້ອງການທາງດ້ານບຸກຄະລາກອນ ແລະມາດຕະຖານຂອງຄູທີ່ມີຢູ່,ແນໃສ່ການພັດທະນາວຽກງານການສຶກສາຂອງໂຮງຮຽນ ມສ ຕະໂອ້ຍ ເພື່ອສ້າງຄວາມເຂັ້ມແຂງດ້ານການຈັດຕັ້ງພາຍໃນການສະຫຼຸບສັງລວມ, ສຸມໃສ່ສ້າງໂຮງຮຽນຕົວແບບດ້ານພາລະສຶກສາ ແລະ ສີລະປະສຶກສາຕິດພັນກັບການສ້າງກົດລະບຽບ, ພັດທະນາທັກສະການຮຽນຮູ້ສົ່ງເສີມການຮຽນ-ການອ່ານ, ການນຳໃຊ້ສື່ການຮຽນ-ການສອນໃຫ້ຫຼາຍຂຶ້ນເປັນລະບົບ ແລະຕໍ່ເນື່ອງ, ກຳນົດຊຸມຊົນອຳນາດການປົກຄອງບ້ານມີສ່ວນຮ່ວມການພັດທະນາໂຮງຮຽນ ແລະຮ່ວມກັນແກ້ໄຂບັນຫາປະກົດການຫຍໍ້ທໍ້ໃຫ້ມີຄວາມເອກະພາບ ແລະສອດຄ່ອງ.

 

แชร์