ທະນາຄານການຄ້າຈີນກຳໄລຫຼຸດລົງໜັກສຸດໃນຮອບ 10 ປີ

  ຂະນະທີ່ທະນາຄານແຫ່ງຊາດ ສປ ຈີນ ກຳລັງອັດສີດເງິນ 20 ຕື້ຢວນ ເຂົ້າສູ່ລະບົບທະນາຄານໃນວັນທີ 31 ສິງຫາທີ່ຜ່ານມາທະນາຄານອິນດັສເທຍ ແອນ ຄອມ ເມີເຊຍ ແບງ ອອຟ ໄຊນາ (ICBC) ຊຶ່ງເປັນທະນາຄານການຄ້າລາຍໃຫຍ່ທີ່ສຸດຂອງຈີນປະກາດຜົນກຳໄລຫຼຸດລົງໜັກສຸດໃນຮອບ 10 ປີ ຈາກຜົນກະທົບຈາກໂຄວິດ ແລະໜີ້ທີ່ເພີ່ມສູງຂຶ້ນ.

   ຕາມຂ່າວຕ່າງປະເທດລາຍງານວ່າທະນາຄານການຄ້າລາຍໃຫຍ່ຂອງຈີນມີຜົນກຳໄລຫຼຸດລົງຢ່າງໜັກໃນຮອບ 10 ປີ ເນື່ອງຈາກບັນຫາໜີ້ທີ່ເພີ່ມສູງຂຶ້ນຂະນະດຽວ ກັນກໍຕ້ອງປະເຊີນກັບແຮງກົດດັນຈາກຂໍ້ຮຽກຮ້ອງລັດຖະບານໃຫ້ເຂົ້າມາຊ່ວຍຊຸກຍູ້ເສດຖະກິດຊຶ່ງໄດ້ຮັບຜົນກະທົບຢ່າງໜັກຈາກການແຜ່ລະບາດຂອງເຊື້ອພະຍາດໂຄວິດ-19, ຊຶ່ງທະນາຄານ ICBC ເປັນທະນາຄານລາຍໃຫຍ່ສຸດ, ທະນາຄານ ໄຊນ່າ ຄອນສະ ຕຣັກຊັນ ແບງ (CCB), ທະນາຄານ ອະກຣິຄັລເຈີຣັລ ແບງ ອອຟ ໄຊນ່າ (ABC) ແລະທະນາຄານ ແບງ ອອຟໄຊນ່າ ຕ່າງກໍອອກມາເປີດເຜີຍຜົນກຳໄລຫຼຸດລົງໃນໄລຍະ 6 ເດືອນຕົ້ນປີ ໂດຍຈາກຂໍ້ມູນພົບວ່າທະນາຄານເຫຼົ່ານີ້ມີກຳໄລ ຫຼຸດລົງຢ່າງໜ້ອຍ 10% ຂະນະທີ່ໜີ້ເພີ່ມສູງຂຶ້ນລະຫວ່າງ 27-97%. ທະນາຄານການຄ້າລາຍໃຫຍ່ຂອງຈີນກ່າວວ່າເສດຖະກິດໂລກຕ້ອງປະເຊີນກັບພາວະທີ່ບໍ່ເອື້ອອຳນວຍເນື່ອງຈາກການຫົດຕົວຂອງການຄ້າ ແລະການລົງທຶນທົ່ວໂລກຄວາມປັ່ນປ່ວນໃນຕະຫຼາດການເງິນ ແລະອື່ນໆ.

   ຢ່າງໃດກໍຕາມເພື່ອຮັກສາສະພາບຄ່ອງໃຫ້ກັບລະບົບທະນາຄານໃຫ້ພຽງພໍທະນາຄານກາງຂອງຈີນໄດ້ອັດສີດເງິນ 20 ຕື້ຢວນ (ປະມານ 2,9 ຕື້ໂດລາສະຫະລັດ ) ເຂົ້າລະບົບໃນວັນທີ 31 ສິງຫາທີ່ຜ່ານມາຜ່ານຂໍ້ຕົກລົງ reverse repos ປະເພດອາຍຸ 7 ວັນ ທີ່ອັດຕາດອກເບ້ຍ 2,2%.

แชร์