ວັນທີ 31 ສິງຫາ 2020 ພະແນກຄຸ້ມຄອງຄົນຕ່າງປະເທດຫ້ອງສັນຕິບານ ປກສ ແຂວງ ສົມທົບກັບດ່ານ ຕມ ສາກົນປາກຊັນ ແຂວງບໍລິຄໍາໄຊ ສປປ ລາວ ຈັດພິທີມອບ-ຮັບ ຜູ້ຖືກຫາຊື່ ທ້າວ ມາລຸດ ສິດທິຍາ  ຄົນເຊຶ້ອຊາດ-ສັນຊາດ ໄທກັບຄືນປະເທດ, ໂດຍການເຊັນບົດບັນທຶກມອບ-ຮັບລະຫວ່າງທ່ານ ຮ້ອຍເອກ ຄໍາພັນ ພົມມົນ ຕີ ຮອງຫົວໜ້າດ່ານ ຕມ ສາກົນປາກຊັນແລະທ່ານ ຮ້ອຍໂທ ຊັດໄຊ ສຸກງາມ ຮອງຕໍາຫຼວດກວດຄົນເຂົ້າ-ອອກເມືອງ ດ່ານ ຕມ ສາກົນ ບຶງການປະເທດໄທ, ມີພະນັກງານວິຊາສະເພາະ 2 ຝ່າຍເຂົ້າຮ່ວມ.

   ເຈົ້າໜ້າທີ່ດ່ານ ຕມ ສາກົນປາກຊັນໃຫ້ຮູ້ວ່າ: ໃນໄລຍະປີ 2009 ທ້າວ ມາລຸດ ສິດທິຍາ ອາຍຸ 38 ປີ, ອາຊີບຊາວນາ, ປະຈຸບັນຢູ່ບ້ານໂພນແພງ, ເມືອງວານອນ ແຂວງສະກົນນະຄອນ, ເປັນຄົນເຊື້ອ ຊາດ-ສັນຊາດໄທ ໄດ້ພົບກັບນາງ ເພັນ ອິນທະວົງ ເຊື້ອຊາດ-ສັນຊາດລາວ, ທີ່ ໄປເຮັດວຽກຢູ່ຮ້ານຂາຍເຄື່ອງມີໄຊ ເມືອງວານອນ ແຂວງສະກົນນະຄອນ, ພວກກ່ຽວທັງ 2 ເປັນພະນັກງານຢູ່ຮ້ານຂາຍເຄື່ອງດັ່ງກ່າວ, ຈາກນັ້ນ ທ້າວ ມາລຸດ ແລະນາງ ເພັນ ກໍ່ໄດ້ລົມ ແລະຮັກແພງກັນແບບ່າວສາວ, ຕໍ່ມາພວກກ່ຽວທັງ 2 ກໍ່ໄດ້ຕັດສີນໃຈຢູ່ກິນຮ່ວມກັນແບບຜົວ-ເມຍ, ຕົກມາຮອດເດືອນກຸ່ມພາ ປີ 2010 ນາງ ເພັນ ໄດ້ພາ ທ້າວມາລຸດ ລັກຂ້າມມາ ສປປ ລາວ ໂດຍບໍ່ມີໜັງສືຜ່ານແດນ ແລະບໍ່ໄດ້ເຂົ້າຜ່ານປະ ຕູດ່ານຕາມທີ່ທາງການອະນຸຍາດ ໂດຍລັກຂ້າມເຂດບ້ານຫົວຫາດ (ຝັ່ງໄທ) ມາຫາບ້ານນາຫຼວງ ເມືອງປາກກະດິງ ແຂວງບໍລິຄໍາໄຊ ແລ້ວໄປພັກຢູ່ເຮືອນຂອງນາງ ເພັນ ບ້ານທົ່ງຮາບ ເມືອງປາກກະດິງ ແຂວງບໍລິຄໍາໄຊ, ນາງ ເພັນ ໄດ້ເກີດລູກຊາຍ 1 ຄົນປະຈຸບັນລູກມີອາ ຍຸໄດ້ 9 ປີ, ພາຍ ຫຼັງເກີດລູກພວກກ່ຽວທັງສອງກໍ່ໄດ້ດໍາລົງຊີວິດຢູ່ບ້ານທົ່ງຮາບ ເມືອງປາກກະດິງ ມາຮອດ ປີ 2017 ເຈົ້າໜ້າທີ່ຕໍາຫຼວດ ປກສ ເມືອງປາກກະດິງໄດ້ລົງກວດພົບເຫັນທ້າວ ມາລຸດ ຈາກນັ້ນຈຶ່ງໄດ້ນໍາຕົວຜູ້ກ່ຽວສົ່ງພະແນກຄຸ້ມຄອງຄົນຕ່າງປະເທດ ປກສ ແຂວງສືບສວນ-ສອບສວນ ຜ່ານການກວດກາຕົວຈິງເຫັນວ່າຜູ້ກ່ຽວແມ່ນໄດ້ລັກ ຢູ່ກິນກັບພົນລະເມືອງລາວໂດຍບໍ່ຖືກ ຕ້ອງຕາມລະບຽບກົດໝາຍ ແລະຈັດສົ່ງຜູ້ກ່ຽວກັບຄືນປະເທດໄທ,ຫຼັງຈາກນັ້ນຜູ້ກ່ຽວກໍ່ໄດ້ໄປແລ່ນເອກະສານຂໍເຮັດໜັງສືຜ່ານແດນເພື່ອເຂົ້າມາ ດ່ານສາກົນ ປາກຊັນ ເພື່ອໄປຫາເມຍຢູ່ບ້ານທົ່ງຮາບ, ຈາກນັ້ນກໍ່ມີແຕ່ໄປຈໍ້າເຂົ້າ-ອອກເມືອງຢູ່ ດ່ານສາກົນປາກຊັນ, ຈົນມາຮອດ ວັນທີ 20 ສິງຫາ 2020 ທາງເຈົ້າໜ້າທີ່ ປກສ ເມືອງປາກກະດິງ ຈຶ່ງໄດ້ເຊີນຜູ້ກ່ຽວໃຫ້ມາປະກອບເອກະສານຂໍແຕ່ງດອງຜ່ານການກວດກາເຫັນວ່າຜູ້ກ່ຽວແມ່ນບໍ່ທັນໄດ້ປະກອບເອກະ ສານເທື່ອຈຶ່ງກັກຕົວຜູ້ກ່ຽວສົ່ງໃຫ້ເຈົ້າໜ້າທີ່ ປກສ ແຂວງສົ່ງຜູ້ກ່ຽວກັບຄືນປະເທດ.

 ເຈົ້າໜ້າທີ່ຍັງໃຫ້ຮູ້ຕື່ມອີກວ່າ: ທ້າວ ມາລຸດ ແມ່ນໄດ້ກະຜິດຕໍ່ດໍາລັດ ເລກທີ 198/ນຍ ລົງວັນທີ 19 ທັນວາ 1994 ວ່າດ້ວຍການແຕ່ງດອງລະຫວ່າງພົນລະເມືອງລາວກັບຄົນຕ່າງປະເທດ, ສະນັ້ນໃນຕອນເຊົ້າ ວັນທີ 31 ສິງຫາ 2020 ນີ້ ທາງເຈົ້າໜ້າທີ່ຈຶ່ງໄດ້ຈັດພິທີມອບ-ສົ່ງ ຜູ້ກ່ຽວໃຫ້ເຈົ້າໜ້າທີ່ດ່ານ ຕມ ສາກົນບຶງການນໍາຕົວຜູ້ກ່ຽວໄປສຶກສາອົບຮົມ ແລະປະກອບເອກະສານຂໍແຕ່ງດອງໃຫ້ຖືກຕ້ອງຕາມລະບຽບກົດໝາຍຂອງສອງປະເທດ.

-------------

ຂ່າວ: ພອນສະຫວັນ  

 

แชร์