ໂຄງການກໍ່ສ້າງສະໜາມບິນໜອງຄ້າງ ຄືບໜ້າ 92,34%

  ເມື່ອອາທິດຜ່ານມາຄະນະລົງເຄື່ອນໄຫວຊຸກຍູ້ຕິດຕາມກວດກາການຈັດຕັ້ງປະຕິບັດວຽກງານງົບປະມານ 6 ເດືອນຕົ້ນປີແລະແຜນດັດແກ້ 6 ເດືອນ ທ້າຍປີ 2020 ຂອງກະຊວງການເງິນ, ໄດ້ລົງຢ້ຽມຢາມໂຄງການກໍ່ສ້າງສະໜາມບິນໜອງຄ້າງ, ໂດຍການນໍາພາຂອງທ່ານ ນາງ ວັນພອນ ພົມມະສອນ ຫົວໜ້າຄັງເງິນແຫ່ງຊາດ, ທ່ານ ຫົງທອງ ຈັນທາຈິດ ຫົວໜ້າພະແນກການເງິນແຂວງຫົວພັນ, ຫົວໜ້າສ່ວຍສາອາກອນປະຈໍາແຂວງພ້ອມດ້ວຍຄະນະ, ໂດຍການຕ້ອນຮັບຂອງທ່ານ ສີນະຄອນໄຊຍະວັນສີ ຮອງຫົວໜ້າຄຸ້ມຄອງໂຄງການກໍ່ສ້າງສະໜາມບິນໜອງຄ້າງ.

  ທ່ານ ສີນະຄອນ ໄຊຍະວັນສີ ຮອງຫົວໜ້າຄຸ້ມຄອງໂຄງການກໍ່ສ້າງສະໜາມບິນໜອງຄ້າງໄດ້ລາຍງານໃຫ້ຮູ້ສະພາບການຈັດຕັ້ງປະຕິບັດໂຄງການໃນໄລຍະຜ່ານມາ, ຊຶ່ງມາຮອດປະຈຸບັນຄວາມຄືບໜ້າໂຄງການກໍ່ສ້າງສະໜາມບິນໜອງຄ້າງ 92,34% ໃນຂະນະດຽວກັນການຈັດຕັ້ງປະຕິບັດຕົວ ຈິງໂຄງການດັ່ງກ່າວໄດ້ເກີດມີວຽກ ເພີ່ມຈໍານວນໜຶ່ງທີ່ມີບໍລິມາດເກີນຢູ່ໃນສັນຍາ, ຊຶ່ງມີຄວາມຈໍາເປັນຕ້ອງໄດ້ຈັດຕັ້ງປະຕິບັດເພື່ອຮັບປະກັນໃຫ້ມີຄວາມປອດໄພໃນການນໍາໃຊ້ສະໜາມບິນ, ຊຶ່ງຈະຕ້ອງລໍຖ້າຝ່າຍເຈົ້າຂອງໂຄງການອະນຸມັດບັນດາໜ້າວຽກ ແລະມູນຄ່າວຽກເພີ່ມດັ່ງກ່າວຍ້ອນສາເຫດບວກກັບການລະບາດຂອງພະຍາດໂຄວິດ-19 ບໍລິສັດຜູ້ຮັບເໝົາກໍ່ ສ້າງ, ຈຶ່ງຢຸດຕິການກໍ່ສ້າງຊົ່ວຄາວເລີ່ມແຕ່ທ້າຍເດືອນມີນາ 2020 ຈົນມາຮອດປະຈຸບັນ.

  ສາເຫດທີ່ພາໃຫ້ມີວຽກເພີ່ມໃນເວລາລົງມືຈັດຕັ້ງປະຕິບັດການສໍາຫຼວດ-ອອກແບບ ໃນເບື້ອງຕົ້ນເຫັນວ່າບໍລິສັດທີ່ປຶກສາໂຄງການໄດ້ສໍາຫຼວດເກັບກໍາຂໍ້ມູນໃນຂອບເຂດ ບໍລິເວນພື້ນທີ່ການກໍ່ສ້າງໂຄງລ່າງຂອງສະໜາມບິນເທົ່ານັ້ນລວມທັງການອອກແບບສໍາລັບການບິນຂຶ້ນ-ລົງຂອງ ເຮືອບິນໃນທິດທາງດຽວເປັນຫຼັກ, ຊຶ່ງໄລຍະນັ້ນແມ່ນມີຄວາມຫຍຸ້ງຍາກໃນການເຂົ້າຫາພື້ນທີ່ເພື່ອດໍາເນີນການສໍາຫຼວດ, ຍ້ອນພື້ນທີ່ເປັນພູສູງບໍ່ສາມາດດໍາເນີນການສໍາຫຼວດເກັບກູ້ລະເບີດບໍ່ທັນແຕກ.

  ພາຍຫຼັງໄດ້ດໍາເນີນການກໍ່ສ້າງມາໄດ້ໄລຍະໜຶ່ງແລ້ວຈຶ່ງໄດ້ມີການປະເມີນຄວາມສ່ຽງໃນການບໍລິການສະໜາມບິນໃນອະນາຄົດ, ຈຶ່ງມີຄວາມຈໍາເປັນຕັດພູຢູ່ຕາມແລວທາງຂຶ້ນ-ລົງຂອງເຮືອບິນທັງສອງເບື້ອງທີ່ເປັນອຸປະສັກແກ່ການປະຕິບັດການບິນ,ເພື່ອເຮັດໃຫ້ສະໜາມບິນຂຶ້ນ-ລົງໄດ້ ທັງສອງທິດທາງຕາມມາດຕະຖານສະໜາມບິນ Code 3C ຂອງອົງການການບິນພົນລະເຮືອນສາກົນ.

  ຜ່ານການກວດສອບພາກສະໜາມຕົວຈິງບັນດາໜ້າວຽກ ແລະມູນຄ່າເພີ່ມແມ່ນມີຄວາມຈິງ, ມີແບບແຕ້ມເຕັກນິກກໍ່ສ້າງລະອຽດຖືກຕ້ອງເໝາະສົມຕາມການຄິດໄລ່ຂອງບໍລິສັດທີ່ປຶກສາໂຄງການ ແລະ ຮັບຮອງຈາກຫົວໜ້າໂຄງການ, ຈໍານວນບໍລິມາດຕັດດິນທີ່ເປັນວຽກເພີ່ມທັງໝົດ 4.795.230 ແມັດກ້ອນຕົກເປັນມູນຄ່າ 13,47 ລ້ານ ໂດລາ ແລະວຽກເພີ່ມຕິດຕັ້ງດອກໄຟຟັງລົງໜ້າທາງແລ່ນຂຶ້ນ-ລົງຕົກເປັນມູນຄ່າ 6.017 ໂດລາ, ກໍ່ສ້າງລະບົບນໍ້າປະປາຕົກເປັນມູນຄ່າ 13,38 ຕື້ກີບ ຫຼືປະມານ 1,5 ລ້ານໂດລາ ຊຶ່ງລວມບັນດາໜ້າວຽກດັ່ງກ່າວມູນຄ່າທັງໝົດ 14,98 ລ້ານໂດລາ.

  ນອກຈາກນັ້ນ, ກໍ່ຍັງມີເງິນຄັງແຮໂຄງການລວມກັບໜ້າວຽກທີ່ບໍ່ໄດ້ຈັດຕັ້ງປະຕິບັດແມ່ນຍັງມີຈໍານວນ 5 ລ້ານກວ່າໂດລາ ສະນັ້ນ, ເມື່ອຫັກລົບແລ້ວຍັງເຫັນວ່າມູນຄ່າວຽກທັງໝົດຂອງໂຄງການກໍ່ສ້າງສະໜາມບິນໜອງຄ້າງແມ່ນຍັງບໍ່ພຽງພໍຈໍານວນ 9,53 ລ້ານໂດລາ ຕໍ່ກັບຄວາມຕ້ອງການທາງດ້ານງົບປະມານຜູ້ຮັບຜິດຊອບໂຄງການຈຶ່ງສະເໜີລັດຖະບານພິຈາລະນາ ແລະ ອະນຸມັດມູນຄ່າເພີ່ມທີ່ບໍ່ພຽງພໍຈໍານວນ 9,53 ລ້ານໂດລາ ແລະ ທັງຊຸກຍູ້ໃຫ້ ບໍລິສັດ ທາໂກ ສືບຕໍ່ສະໜອງທຶນໃຫ້ບໍລິສັດ ຮຸ້ນສ່ວນ ຮວ່າງແອງ ຢາລາຍ ເພື່ອໃຫ້ມີງົບປະມານສືບຕໍ່ປະຕິບັດໂຄງການດັ່ງກ່າວ.

แชร์