ເມົາແລ້ວຂັບປັບໃໝ 20 ເທົ່າ, ຢຶດໃບຂັບຂີ່ເລີຍ 1 ປີ ແລ້ວຈຶ່ງໄປເສັງເອົາໃໝ່ ທົ່ວນະຄອນຫຼວງວຽງຈັນ

 ເລີ່ມໃຊ້ຢ່າງເປັນທາງການແລ້ວສຳລັບ ມາດຕະການຫຼຸດຜ່ອນອຸບັດເຫດ ແລະ ການຮັກສາຄວາມປອດໄພຕາມຖະໜົນທົ່ວນະຄອນຫຼວງວຽງຈັນ ລົງວັນທີ 21 ທັນວາ 2018 ເຊິ່ງຫາກໍຖືກເຜີຍແຜ່ລົງຈົດໝາຍເຫດທາງລັດຖະການ ເມື່ອວັນທີ 11 ກຸມພາ 2019 ທີ່ຜ່ານມາ ໂດຍຂໍ້ຕົກລົງສະບັບນີ້ໄດ້ກຳນົດມາດຕະການທີ່ກ່ຽວຂ້ອງກັບການສັນຈອນຕາມທ້ອງຖະໜົນໃນນະຄອນຫຼວງຂອງລາວ ໂດຍມີເປົ້າໝາຍເພື່ອຫຼຸດຜ່ອນການສູນເສຍທາງຮ່າງກາຍ ແລະ ຊັບສິນຈາກການຈະລາຈອນຕາມຖະໜົນຫຼວງ ແລະ ມີຄວາມປອດໄພ.

  ເຊິ່ງໜຶ່ງໃນຫົວຂໍ້ທີ່ມີຜູ້ສົນໃຈເປັນຈຳນວນຫຼາຍ ແລະ ເປັນສາເຫດທີ່ພາໃຫ້ເກີດອຸບັດເຫດຢູ່ຕະຫຼອດຄື ການເມົາແລ້ວຂັບ ຫຼື ດື່ມສິ່ງມຶນເມົາແລ້ວຂັບ ເຊິ່ງໃນຂໍ້ຕົກລົງສະບັບດັ່ງກ່າວນີ້ໄດ້ກຳນົດມາດຕະການຕໍ່ຜູ້ທີ່ລະເມີດໄວ້ສູງພໍສົມຄວນ ໂດຍໃນມາດຕາທີ 13 ໄດ້ລະບຸໄວ້ສູງສຸດຢູ່ທີ່ 20 ເທົ່າຂອງອັດຕາປັບໃໝປົກກະຕິ.

    >> ມີທາດເຫຼົ້າໃນຮ່າງກາຍສໍ່າໃດ ຈຶ່ງຖືວ່າຜິດກົດໝາຍກ່ຽວກັບການເມົາແລ້ວຂັບ?

ເນື້ອໃນຂອງມາດຕະການຕາມມາດຕາຂ້າງເທິງກຳນົດໄວ້ວ່າ ເມື່ອກວດພົບທາດເຫຼົ້າ ຫຼື ສິ່ງມຶນເມົາໃນຮ່າງກາຍຂອງຜູ້ຂັບຂີ່ຍານພາຫະນະເກີນປະລິມານທີ່ກົດໝາຍກຳນົດໃຫ້ປະຕິບັດດັ່ງນີ້:

1. ຄັ້ງທີ 1 ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 1 ເດືອນ ແລະ ປັບໃໝຕໍ່າສຸດຕາມມາດຕາ 5 ຂອງດຳລັດເລກທີ 188/ນຍ ລົງວັນທີ 3 ກໍລະກົດ 2007 ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນຄັ້ງທີ 4 ຂອງສະພາປະຊາຊົນນະຄອນຫຼວງວຽງຈັນຊຸດທີ 1 ສະບັບເລກທີ 028/ສປນວ ລົງວັນທີ 6 ກັນຍາ 2018 ເຊິ່ງນັ້ນໝາຍຄວາມວ່າຈະຖືກປັບໃໝດັ່ງນີ້:

  • - ລົດຖີບ 10,000 ກີບ
  • - ລົດຈັກ, ລົດສາມລໍ້ 50,000 ກີບ
  • - ລົດເບົາ: ເກັງ ກະບະ ຈິບ ຕູ້ 100,000 ກີບ
  • - ໂດຍສານ 4 ລໍ້ 250,000 ກີບ
  • - ລົດບັນທຸກ 6 ລໍ້ 500,000 ກີບ
  • - ລົດໂດຍສານ 1,000,000 ກີບ

2. ຄັ້ງທີ 2 ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 3 ເດືອນ ແລະ ປັບໃໝ 10 ເທົ່າ ຕາມມາດຕາທີ 5 ຂອງດຳລັດເລກທີ 188/ນຍ ລົງວັນທີ 3 ກໍລະກົດ 2007 ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນຄັ້ງທີ 4 ຂອງສະພາປະຊາຊົນນະຄອນຫຼວງວຽງຈັນຊຸດທີ 1 ສະບັບເລກທີ 028/ສປນວ ລົງວັນທີ 6 ກັນຍາ 2018 ເຊິ່ງນັ້ນໝາຍຄວາມວ່າຈະຖືກປັບໃໝດັ່ງນີ້:

  • - ລົດຖີບ 100,000 ກີບ
  • - ລົດຈັກ, ລົດສາມລໍ້ 500,000 ກີບ
  • - ລົດເບົາ: ເກັງ ກະບະ ຈິບ ຕູ້ 1,000,000 ກີບ
  • - ໂດຍສານ 4 ລໍ້ 2,500,000 ກີບ
  • - ລົດບັນທຸກ 6 ລໍ້ 5,000,000 ກີບ
  • - ລົດໂດຍສານ 10,000,000 ກີບ

3. ຄັ້ງທີ 3 ຂຽນໃບຮັບສາລະພາບລະເມີດກົດຈະລາຈອນ, ກັກໃບຂັບຂີ່ 6 ເດືອນຫາ 1 ປີ ແລະ ປັບໃໝ 20 ເທົ່າ ຕາມມາດຕາທີ 5 ຂອງດຳລັດເລກທີ 188/ນຍ ລົງວັນທີ 3 ກໍລະກົດ 2007 ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນຄັ້ງທີ 4 ຂອງສະພາປະຊາຊົນນະຄອນຫຼວງວຽງຈັນຊຸດທີ 1 ສະບັບເລກທີ 028/ສປນວ ລົງວັນທີ 6 ກັນຍາ 2018 ເຊິ່ງນັ້ນໝາຍຄວາມວ່າຈະຖືກປັບໃໝດັ່ງນີ້:

  • ລົດຖີບ 200,000 ກີບ
  • - ລົດຈັກ, ລົດສາມລໍ້ 1,000,000 ກີບ
  • - ລົດເບົາ: ເກັງ ກະບະ ຈິບ ຕູ້ 2,000,000 ກີບ
  • - ໂດຍສານ 4 ລໍ້ 5,000,000ກີບ
  • - ລົດບັນທຸກ 6 ລໍ້ 10,000,000 ກີບ
  • - ລົດໂດຍສານ 20,000,000 ກີບ

4. ຄັ້ງທີ 4 ຂຽນໃບຮັບສາລະພາບລະເມີດກົດຈະລາຈອນ, ຢຶດໃບຂັບຂີ່ໄວ້ເລີຍ 1 ປີ ຈຶ່ງອະນຸຍາດໃຫ້ສອບເສັງເອົາໃບຂັບຂີ່ຄືນໃໝ່ ແລະ ປັບໃໝ 20 ເທົ່າ ຕາມມາດຕາທີ 5 ຂອງດຳລັດເລກທີ 188/ນຍ ລົງວັນທີ 3 ກໍລະກົດ 2007 ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນຄັ້ງທີ 4 ຂອງສະພາປະຊາຊົນນະຄອນຫຼວງວຽງຈັນຊຸດທີ 1 ສະບັບເລກທີ 028/ສປນວ ລົງວັນທີ 6 ກັນຍາ 2018 ເຊິ່ງນັ້ນໝາຍຄວາມວ່າຈະຖືກປັບໃໝດັ່ງນີ້:

  • - ລົດຖີບ 200,000 ກີບ
  • - ລົດຈັກ, ລົດສາມລໍ້ 1,000,000 ກີບ
  • - ລົດເບົາ: ເກັງ ກະບະ ຈິບ ຕູ້ 2,000,000 ກີບ
  • - ໂດຍສານ 4 ລໍ້ 5,000,000 ກີບ
  • - ລົດບັນທຸກ 6 ລໍ້ 10,000,000 ກີບ
  • - ລົດໂດຍສານ 20,000,000 ກີບ

  ທັງນີ້ຖ້າຫາກການເມົາແລ້ວຂັບຂອງຜູ້ຂັບຂີ່ຄົນໃດເປັນຕົ້ນເຫດໃຫ້ເກີດອຸບັດເຫດແມ່ນໃຫ້ນຳໃຊ້ມາດຕະການສູງສຸດຕາມຄັ້ງທີ 4 ຂ້າງເທິງພ້ອມທັງດຳເນີນຄະດີຕາມກົດໝາຍທີ່ກ່ຽວຂ້ອງ.

 ຫວັງວ່າຂໍ້ມູນທີ່ກ່າວມານີ້ຈະເປັນປະໂຫຍດ ແລະ ສ້າງຄວາມຕື່ນຕົວໃນການປະຕິບັດກົດຈະລາຈອນ ແລະ ຢ່າລືມວ່າ ເມົາບໍ່ຄວນຂັບຍານພາຫະນະ ຫຼື ຖ້າເປັນໄປໄດ້ແທ້ ຖ້າຫາກເປັນຜູ້ຂັບ ກໍບໍ່ຄວນດື່ມເຫຼົ້າເລີຍຈະດີທີ່ສຸດ ເພື່ອຄວາມປອດໄພຂອງຕົນເອງ ແລະ ຄົນອ້ອມຂ້າງທີ່ໃຊ້ຖະໜົນຮ່ວມກັນຈະດີກວ່າ.

แชร์