ເປີດນໍາໃຊ້ເສັ້ນທາງເບຕົງບ້ານດົງເຫັນ

  ການກໍ່ສ້າງເສັ້ນທາງເບຕົງເສີມເຫຼັກຈຳນວນ 3 ເສັ້ນພາຍໃນບ້ານດົງເຫັນ ເມືອງອາດສະພັງທອງ ແຂວງສະຫວັນນະເຂດ ໂດຍໄດ້ຮັບການສະໜັບສະໜູນດ້ານທຶນຮອນຈາກທ່ານ ສາຍສະໝອນ ກວານເມືອງຈັນ ຜູ້ອຳນວຍການສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳພັນ (ສກຈຮສ) ພ້ອມຄອບຄົວມູນຄ່າ 462 ລ້ານກວ່າກີບ ແລະທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມ-ນໍ້າກ້ອນໂລມາຄຳ ອີກຈຳນວນ 47 ລ້ານກວ່າກີບ ມາຮອດປະຈຸບັນໂຄງການກໍ່ສ້າງເສັ້ນທາງດັ່ງກ່າວແມ່ນໄດ້ສຳເລັດ 100% ຊຶ່ງໄດ້ສ້າງຄວາມດີອົກດີໃຈແກ່ປະຊາຊົນທີ່ຈະໄດ້ນຳໃຊ້ເສັ້ນທາງໃໝ່ທີ່ສະດວກສະບາຍກວ່າເກົ່າ ແລະ ກາຍເປັນໃບໜ້າໃໝ່ແຫ່ງການ ພັດທະນາຂອງບ້ານດົງເຫັນ.

 ພິທີມອບ-ຮັບ ແລະເປີດນຳໃຊ້ເສັ້ນທາງປູເບຕົງເສີມເຫຼັກບ້ານດົງເຫັນໄດ້ຈັດຂຶ້ນຢ່າງເປັນທາງການໃນວັນທີ 29 ສິງຫາ2020 ໂດຍການເປັນກຽດເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ອຸໄພ ວັນໄຊຍະວົງ ເຈົ້າເມືອງອາດສະພັງທອງ, ທ່ານ ສາຍສະໝອນ ກວານເມືອງຈັນ, ທ່ານ ເກຍ ອູ໊ສິດທິເດດ, ມີການນຳຂອງເມືອງອ້ອມຂ້າງ,ພະແນກການກົມກອງອ້ອມຂ້າງແຂວງ, ຫ້ອງການອ້ອມຂ້າງເມືອງຈາກນີ້ກໍ່ມີນັກທຸລະກິດ-ຜູ້ປະກອບການຫ້າງຮ້ານຕ່າງໆ, ອຳ ນາດການປົກຄອງຂັ້ນຕ່າງໆຂອງເມືອງຕະຫຼອດຮອດປະຊາຊົນພາຍໃນບ້ານດົງເຫັນເຂົ້າຮ່ວມຢ່າງພ້ອມພຽງ.

  ທ່ານ ຈັນທະບານ ຄໍາມະຫາລາດ ຫົວໜ້າຫ້ອງການໂຍທາທິການ ແລະຂົນສົ່ງ ເມືອງອາດສະພັງທອງ ໄດ້ລາຍງານໃຫ້ຮູ້ໂດຍສັງເຂບວ່າ: ໂຄງການກໍ່ສ້າງເສັ້ນທາງປູດ້ວຍເບຕົງເສີມເຫຼັກ ບ້ານ ດົງເຫັນ ແມ່ນນອນຢູ່ໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງເມືອງອາດສະພັງທອງ, ຊຶ່ງການກໍ່ສ້າງເສັ້ນທາງເບຕົງເສີມເຫຼັກພາຍໃນບ້ານດົງເຫັນທີ່ນອນໃນເຂດເທສະບານເມືອງໃນໄລຍະທີ 1 ແມ່ນມີແຜນກໍ່ສ້າງຈໍານວນ 3 ເສັ້ນຄື: ເສັ້ນທີ 1 ແມ່ນເລີ່ມແຕ່ແຍກເຕົາດິນຈີ່ຫາຕະ ຫຼາດລວງຍາວ 315 ແມັດ ມູນຄ່າ 297 ລ້ານກວ່າກີບ, ເສັ້ນທີ 2 ແມ່ນຕໍ່ຈາກທາງເລກທີ 9 ຫາ ຫ້ອງການບ້ານດົງເຫັນ, ມີລວງຍາວ 170 ແມັດ, ມູນຄ່າ 170,42 ລ້ານກີບ ໂດຍທາງສອງເສັ້ນນີ້ແມ່ນໄດ້ຮັບທຶນກໍ່ສ້າງຈາກທ່ານ ສາຍສະໝອນ ກວານເມືອງຈັນ ພ້ອມຄອບຄົວ ແລະເສັ້ນທີ 3 ແມ່ນຕໍ່ຈາກເສັ້ນທາງເລກ 9 ຂ້າງເດີ່ນບານ (ເສັ້ນເຕົາດິນຈີ່), ລວງຍາວ 70 ແມັດ ມູນຄ່າ 47,66 ລ້ານກີບ ແມ່ນໄດ້ຮັບທຶນກໍ່ສ້າງຈາກທ່ານ ເກຍ ອູ໊ສິດທິເດດ, ຊຶ່ງທັງ 3 ເສັ້ນທາງດັ່ງກ່າວ ມີລວງຍາວທັງໝົດ 555 ແມັດ, ໜ້າທາງກວ້າງ 5 ແມັດ, ໜາ 15 ຊັງຕີແມັດ, ບ່າທາງກວ້າງສະເລ່ຍ 20-30 ຊັງຕີແມັດ, ມີຮ່ອງລະບາຍນໍ້າກວ້າງ 30-40 ຊັງ ຕີແມັດ, ເລິກ 30-40 ຊັງຕີແມັດ, ກໍ່ສ້າງດ້ວຍເບຕົງເສີມເຫຼັກທີ່ສາມາດຮັບນໍ້າໜັກໄດ້ 7 ໂຕນ, ລວມມີມູນຄ່າກໍ່ສ້າງທັງໝົດ 514,49 ລ້ານກີບ, ໄດ້ເລີ່ມລົງມືກໍ່ ສ້າງແຕ່ຕົ້ນເດືອນພຶດສະພາຮອດທ້າຍເດືອນກໍລະກົດ 2020 ຈຶ່ງໄດ້ສໍາເລັດ 100%.

 ໂອກາດນີ້, ທ່ານເຈົ້າແຂວງສະຫວັນນະເຂດກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ແລະຂອບໃຈຕໍ່ທ່ານ ສາຍສະໝອນ ກວານເມືອງຈັນ ແລະທ່ານ ເກຍ ອູ໊ສິດທິເດດ ທີ່ໄດ້ປະກອບສ່ວນຊ່ວຍເຫຼືອໃນການກໍ່ສ້າງພື້ນຖານໂຄງລ່າງໃຫ້ບ້ານດົງເຫັນໃນຄັ້ງນີ້ພ້ອມນີ້, ທ່ານກໍ່ໄດ້ຮຽກຮ້ອງໃຫ້ອຳນາດການປົກຄອງຂັ້ນຕ່າງໆ ພາຍ ໃນເມືອງອາດສະພັງທອງພ້ອມກັນປະຕິບັດແນວທາງປ່ຽນແປງໃໝ່ຂອງພັກ, ສືບຕໍ່ຫັນລົງກໍ່ສ້າງຮາກຖານການເມືອງເພື່ອແກ້ໄຂຄວາມທຸກຍາກ ຂອງປະຊາຊົນ, ປຸກລະດົມຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງຈາກນີ້ກໍ່ໃຫ້ພ້ອມກັນສ້າງຜົນງານເພື່ອຂໍ່ານັບຮັບຕ້ອນກອງປະຊຸມໃຫຍ່ຂອງອົງຄະນະ ພັກແຂວງຄັ້ງທີ IX ທີ່ຈະໄຂຂຶ້ນໃນໄວໆນີ້.  

แชร์