ປະກາດຈັດຕັ້ງຄະນະອຳນວຍການລັດວິສະຫະກິດນໍ້າມັນເຊື້ອໄຟລາວ

  ວັນທີ 1 ກັນຍາຜ່ານມາທີ່ສຳນັກງານໃຫຍ່ລັດວິສາຫະກິດນໍ້າມັນເຊື້ອໄຟລາວ (ລນລ) ໄດ້ມີພິທີປະກາດການຈັດຕັ້ງຄະນະອຳນວຍການລັດວິສາຫະກິດນໍ້າມັນເຊື້ອໄຟລາວໂດຍເຂົ້າຮ່ວມຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະການຄ້າ, ພ້ອມດ້ວຍຄະນະອຳນວຍການລັດວິສາຫະກິດນໍ້າມັນເຊື້ອໄຟລາວ,ກົມຈັດຕັ້ງ ແລະພະນັກງານກະຊວງການເງິນ, ພະນັກງານ ລນລ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

 ໃນພິທີໄດ້ຜ່ານຂໍ້ຕົກລົງຂອງລັດຖະມົນຕີກະຊວງການເງິນເລກທີ 2209/ກງ ລົງວັນທີ 21 ສິງຫາ 2020 ວ່າດ້ວຍການແຕ່ງຕັ້ງຄະນະອຳນວຍການລັດວິສາຫະ ກິດນໍ້າມັນເຊື້ອໄຟລາວໂດຍລັດຖະມົນຕີກະຊວງການເງິນຕົກລົງແຕ່ງຕັ້ງທ່ານ ປອ. ອະນຸສິນ ພົນເສນາ ຮອງຜູ້ອຳນວຍການລັດວິສາຫະກິດນໍ້າມັນເຊື້ອໄຟລາວເປັນຜູ້ຮັກສາການຊົ່ວຄາວຜູ້ອຳນວຍການ ລນລ, ແຕ່ງຕັ້ງທ່ານ ຈັນທະກິ່ງ ອິນທະວົງ ວ່າການຫົວໜ້າຝ່າຍຂາຍ ແລະ ການຕະຫຼາດຂອງລັດວິສາຫະກິດນໍ້າມັນເຊື້ອໄຟລາວ ເປັນຮອງຜູ້ອຳນວຍການ, ແຕ່ງຕັ້ງທ່ານ ບຸນຍົກ ບຸດສະວົງ ຮັກສາການຫົວໜ້າພະແນກນິຕິກຳກົມຄຸ້ມຄອງວິສາຫະກິດລັດລົງທຶນ ແລະ ການປະກັນໄພກະຊວງການ ເງິນເປັນຮອງຜູ້ອຳນວຍການລັດວິສາຫະກິດນໍ້າມັນເຊື້ອໄຟລາວ.

  ໂອກາດນີ້ ທ່ານ ນາງ ເຂັມມະນີ ພົນເສນາ ກໍ່ໄດ້ໃຫ້ກຽດໂອ້ລົມກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະອຳນວຍການ ລນລ ທີ່ຍາດໄດ້ຜົນສຳເລັດຫຼາຍດ້ານໃນໄລຍະຜ່ານມາພ້ອມທັງໄດ້ເນັ້ນບາງບັນຫາໃຫ້ຄະນະອຳນວຍການ ລນລ ຊຸດໃໝ່ທີ່ໄດ້ຮັບການແຕ່ງຕັ້ງສືບຕໍ່ປະຕິບັດໜ້າທີ່ຂອງຕົນໃຫ້ມີຜົນສຳເລັດ ແລະ ມີຜົນງານດີຂຶ້ນກວ່າເກົ່າ.

-----------------

• 02/09/2020