ຫາລືແກ້ໄຂບັນຫາລາຄາຄ່າບໍລິການຢູ່ແຫຼ່ງທ່ອງທ່ຽວເມືອງວັງວຽງ

   ວັນທີ 31 ສິງຫາ 2020 ທີ່ສະໂມສອນຂອງເມືອງວັງວຽງ ແຂວງວຽງຈັນ, ໄດ້ຈັດກອງປະຊຸມກ່ຽວກັບການແກ້ໄຂບັນຫາແຫຼ່ງທ່ອງທ່ຽວຢູ່ ເມືອງວັງວຽງ ແຂວງວຽງຈັນ ໂດຍພາຍໃຕ້ການເປັນປະທານຂອງທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ທ່ານ ບຸນສອນ ເພັດລາວັນ ຮອງເຈົ້າ ແຂວງວຽງຈັນ, ທ່ານ ບຸນຈັນ ມາລາວົງ ເຈົ້າເມືອງວັງວຽງ, ມີບັນທ່ານຫົວໜ້າກົມ, ຫົວໜ້າພະແນກການຈາກກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ກະຊວງໂຍທາທິການ ແລະຂົນສົ່ງ, ກະຊວງປ້ອງກັນຄວາມສະຫງົບ, ກະຊວງຊັບພະຍາກອນ ແລະສິ່ງແວດລ້ອມ ແລະພາກສ່ວນກ່ຽວຂ້ອງເຂົ້າຮ່ວມ.

  ເພື່ອເປັນການແກ້ໄຂບັນຫາແຫຼ່ງທ່ອງທ່ຽວຢູ່ພາຍໃນເມືອງວັງວຽງ, ແຂວງວຽງຈັນເປັນຕົ້ນ: ບັນຫາຂົວຂ້າມນໍ້າຊອງ, ໂຄງການ 22 ບ້ານ, ຄວາມຍືນຍົງຂອງແມ່ ນໍ້າຊອງ, ການປຸກສ້າງທີ່ລະເມີດລະບຽບກົດໝາຍ, ບັນຫາສະພາບແວດລ້ອມ, ການຄວບຄຸມລາຄາ, ການດຳເນີນທຸລະກິດຂອງຊາວຕ່າງດ້າວຜິດກົດໝາຍໃຫ້ມີການປັບປຸງການບໍລິການຂອງຫົວໜ່ວຍທຸລະກິດໃນຂະແໜງການທ່ອງທ່ຽວໃຫ້ມີຄຸນນະພາບດີຂຶ້ນພ້ອມທັງການຈັດຕັ້ງປະຕິບັດ ແລະເຄື່ອນໄຫວໃຫ້ຖືກຕ້ອງຕາມລະບຽບກົດໝາຍຢ່າງເຂັ້ມງວດ ຫັນເອົາຊ້ວງໄລຍະວິກິດການໃນການ ແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (ໂຄວິດ-19) ໃຫ້ມາເປັນໂອກາດ ໂດຍການຮ່ວມມືກັນລະຫວ່າງພາກລັດທີ່ກ່ຽວຂ້ອງໃນການພັດທະນາການທ່ອງທ່ຽວໃຫ້ມີປະສິດທິຜົນດີຂຶ້ນພ້ອມທັງແກ້ໄຂປາກົດການຫຍໍ້ທໍ້ໃຫ້ຫຼຸດລົງເທື່ອລະກ້າວ. ເພື່ອສາມາດຮອງຮັບນັກທ່ອງທ່ຽວທັງພາຍໃນ ແລະຕ່າງປະເທດທີ່ຈະເຂົ້າມາທ່ອງທ່ຽວພາຍຫຼັງວິກິດການໃຫ້ຫຼາຍຂຶ້ນ.

  ໂດຍບັນດາຜູ້ເຂົ້າຮ່ວມກອງປະຊຸມກໍ່ໄດ້ຜັດປ່ຽນກັນປະກອບຄຳເຫັນໃນການສ້າງເງື່ອນໄຂຕໍ່ການຈັດຕັ້ງປະຕິບັດແກ້ໄຂບັນຫາຮ່ວມກັນຄື: ການເກັບເງິນຄ່າບໍລິການຂົວຂ້າມນໍ້າຂອງ (ຕາມສັນຍາແມ່ນຍັງເຫຼືອ 17 ເດືອນ), ການຮັກສາປ່າຍອດນໍ້າການຮັກສາຄວາມສະອາດຕາມສາຍນໍ້າຊອງ, ສິ່ງແວດລ້ອມພາຍໃນຕົວເມືອງ, ການຂຶ້ນລາຄາຄ່າບໍລິການໂຮງແຮມ,ເຮືອນພັກ, ຮ້ານອາຫານ, ຮ້ານກິນດື່ມ-ຮ້ານບັນເທີງໃນຍາມເທສະການ,ບັນຫາທີ່ມາຂອງລົດບັກກີ ( ລົດຈັກ 4 ລໍ້ ) ທີ່ປະກອບເອງແລ້ວນຳໃຊ້ເຂົ້າໃນການເຄື່ອນໄຫວດຳເນີນທຸລະກິດ (ບໍ່ໄດ້ຮັບອະນຸຍາດທາງດ້ານເຕັກນິກ ),ກິດຈະກຳການບໍລິການທ່ອງທ່ຽວທາງອາກາດບາລູນແລະເຄື່ອງບິນນ້ອຍຢູ່ເມືອງວັງວຽງ, ການດຳເນີນທຸລະກິດຂອງຄົນຕ່າງປະເທດທີ່ກະທົບຕໍ່ທຸລະກິດຂອງປະຊາຊົນໃນທ້ອງຖິ່ນ, ປັບປຸງ ແລະຮັບຮອງຝັງເມືອງວັງວຽງ.

แชร์