3 ແຂວງຫາລືແກ້ໄຂເຂດແດນເຊື່ອມຕໍ່

  ກອງປະຊຸມປຶກສາຫາລືແກ້ໄຂເຂດແດນເຊື່ອມຕໍ່ລະຫວ່າງແຂວງບໍລິຄຳໄຊກັບແຂວງຄຳມ່ວນ ແລະແຂວງຄຳມ່ວນກັບແຂວງສະຫວັນນະເຂດຈັດຂຶ້ນໃນລະຫວ່າງວັນທີ 27-28 ສິງຫາ 2020 ທີ່ແຂວງຄຳມ່ວນໂດຍມີ ທ່ານ ທອງຈັນ ມະນີໄຊ ຮອງລັດຖະມົນຕີກະຊວງພາຍໃນຫົວໜ້າຄະນະຮັບຜິດຊອບຄົ້ນຄວ້າແກ້ໄຂເຂດແດນເຊື່ອມຕໍ່, ມີບັນດາຮອງເຈົ້າແຂວງແລະຄະນະຮັບຜິດຊອບແກ້ໄຂເຂດແດນເຊື່ອມຕໍ່ພ້ອມດ້ວຍບັນດາເມືອງທີ່ມີຊາຍແດນເຊື່ອມຕໍ່ທັງ 3 ແຂວງເຂົ້າຮ່ວມ.

  ຜ່ານການຄົ້ນຄວ້າປຶກສາຫາລືເປັນເວລາ 2 ວັນ ແມ່ນສາມາດແກ້ໄຂບັນດາຈຸດເຂດແດນເຊື່ອມຕໍ່ທີ່ຍັງບໍ່ທັນເປັນເອກະພາບໄດ້ໂດຍພື້ນຖານໂດຍສະເພາະເຂດແດນລະ ຫວ່າງແຂວງຄຳມ່ວນກັບແຂວງບໍລິຄຳໄຊຊຶ່ງຄະນະຮັບຜິດຊອບແກ້ໄຂເຂດແດນທັງສອງແຂວງທີ່ໄດ້ເຂົ້າຮ່ວມກອງປະຊຸມແມ່ນໄດ້ຮ່ວມເຊັນບົດບັນທຶກເພື່ອເປັນພື້ນຖານ

  ບ່ອນອີງໃຫ້ແກ່ວຽກງານປົກຄອງທ້ອງຖິ່ນເພື່ອເຮັດໃຫ້ເຂດແດນການປົກຄອງມີຄວາມຖືກຕ້ອງ, ລະອຽດ, ຊັດເຈນ, ການຄຸ້ມຄອງພົນລະເມືອງ, ການພັດທະນາເສດຖະກິດ-ສັງຄົມ,ວຽກງານປ້ອງກັນຊາດ-ປ້ອງກັນຄວາມສະຫງົບ,ສາມາດສະກັດກັ້ນໄດ້ການເຄື່ອນໄຫວຂອງກຸ່ມຄົນທີ່ບໍ່ດີໃນການແບ່ງແຍກຄວາມສາມັກຄີພາຍໃນ, ການຂຸດຄົ້ນຊັບພະຍາກອນທຳມະຊາດທີ່ບໍ່ສອດຄ່ອງກັບລະບຽບກົດໝາຍ ແລະ ປາກົດການຫຍໍ້ທໍ້ອື່ນໆ, ເປັນການສ້າງເງື່ອນໄຂອຳນວຍຄວາມສະດວກໃຫ້ແກ່ປະຊາ ຊົນບັນດາເຜົ່າທີ່ອາໄສຢູ່ບໍລິເວນເຂດແດນເຊື່ອມຕໍ່ໃນການດຳລົງຊີວິດ ແລະທຳການຜະລິດເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນ.

  ສຳລັບເຂດແດນລະຫວ່າງແຂວງຄຳມ່ວນກັບແຂວງສະຫວັນນະເຂດທີ່ໄດ້ຮ່ວມປຶກສາຫາລືແຕ່ຍັງບໍ່ມີຄວາມເປັນເອກະພາບກັນແມ່ນໃຫ້ສືບຕໍ່ລົງສຳຫຼວດເກັບກຳຂໍ້ມູນພື້ນຖານຕົວຈິງ ແລະທາບທາມເອົາຄວາມຄິດເຫັນຂອງປະຊາຊົນທີ່ອາໄສຢູ່ບໍລິເວນເຂດແດນເຊື່ອມຕໍ່ເພື່ອພ້ອມກັນວາງແຜນແກ້ໄຂໃນຂັ້ນຕໍ່ໄປ.

------------

ຂ່າວ: ກອງຄຳ

ຮູບພາບ: ໜັງສືພິມເສດຖະກິດ-ສັງຄົມ

 

แชร์