4 ເມືອງທຸກຍາກ ຮ່ວມປູກຫຍ້າປີໜ້າລ້ຽງງົວກັບຄຳໄພຊະນະ

  ຫຼັງຈາກສຳເລັດພິທີເຊັນບົດບັນທຶກຄວາມເຂົ້າໃຈເພື່ອສຶກສາສໍາຫຼວດຄວາມເປັນໄປໄດ້ໂຄງການພັດທະນາແຫຼ່ງທ່ອງທ່ຽວລະດັບຊາດ (ໂຄງການສະຫວັນທະເລໝອກພູເບ້ຍເມືອງອະນຸວົງ) ທີ່ແຂວງໄຊສົມບູນ ເມື່ອວັນທີ 13 ກຸມພາຜ່ານມາກໍໄດ້ມີພິທີມອບແກ່ນຫຍ້າໃຫ້ກັບປະຊາຊົນທຸກຍາກ 4 ເມືອງຊຶ່ງ ກ່າວມອບໂດຍທ່ານ ຄຳໄພ ສົມຊະນະ ປະທານກຸ່ມບໍລິສັດຄຳໄພຊະນະຈຳກັດຜູ້ດຽວ ແລະໃຫ້ກຽດກ່າວຮັບໂດຍທ່ານພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນ ພ້ອມດ້ວຍບັນດາພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.

  ທ່ານ ຄຳໄພ ສົມຊະນະ ກ່າວວ່າ: ເນື່ອງຈາກເຫັນໄດ້ຄວາມສຳຄັນແນວທາງນະໂຍບາຍຂອງພັກ-ລັດໃນການເປີດໂອກາດໃຫ້ຫົວໜ່ວຍທຸລະກິດຜູ້ເຮັດແທ້ທຳຈິງໄດ້ມີສ່ວນຮ່ວມໃນການປະ ກອບສ່ວນແກ້ໄຂຄວາມທຸກຍາກຂອງປະ ຊາຊົນຢູ່ບັນດາເມືອງທຸກຍາກ ດ້ວຍ ການສົ່ງເສີມປະຊາຊົນຜະລິດ ໄປພ້ອມກັບ ການຊອກຕະຫຼາດຈຳໜ່າຍ ກ້າວໄປສູ່ ການຫຼຸດພົ້ນຄວາມທຸກຍາກເທື່ອລະ ກ້າວ ກຸ່ມບໍລິສັດຄຳໄພຈຶ່ງໄດ້ເສຍສະລະ ນຳເອົາແກ່ນຫຍ້າຣູຊີຈຳນວນ 4,5 ໂຕນ ມາມອບໃຫ້ລ້າແກ່ປະຊາຊົນທຸກຍາກໃນ ແຂວງໄຊສົມບູນ.

  ທ່ານ ຄຳໄພ ສົມຊະນະ ກ່າວຕື່ມວ່າ: ການມອບໃນຄັ້ງນີ້ແມ່ນເປັນພຽງເບື້ອງຕົ້ນແກ່ເມືອງອະນຸວົງ, ທ່າໂທມ, ລ້ອງແຈ້ງ ແລະເມືອງລ້ອງຊານຊຶ່ງປີນີ້ປູກ ຫຍ້າປີໜ້າລ້ຽງງົວໂດຍຈະມີການມອບ ງົວ 3-5 ແມ່ຕໍ່ຄອບຄົວຜູ້ທີ່ປູກຫຍ້າ ໂດຍ ທາງບໍລິສັດຈະເປັນຜູ້ຮັບເກັບຊື້ຄືນ ທັງນີ້ໃນຕໍ່ໜ້າຫາກມີປະຊາຊົນສົນ ໃຈເຂົ້າຮ່ວມນຳກໍໃຫ້ທາງແຂວງສະເໜີຫາບໍລິສັດເພື່ອຈະໄດ້ຄົ້ນຄວ້າຕອບສະໜອງໃຫ້ຕາມຄວາມຕ້ອງການຕື່ມ.

 ຫຼັງຈາກນັ້ນທ່ານ ຄຳລຽງ ອຸທະໄກສອນ ກໍໄດ້ກ່າວຂອບໃຈທີ່ບໍລິສັດເຫັນໄດ້ຄວາມສຳຄັນໃນການຊຸກຍູ້ສົ່ງເສີມປະຊາຊົນທຸກຍາກໃນ 4 ເມືອງໄດ້ເຮັດການຜະ ລິດທີ່ມີຕະຫຼາດໜ່າຍຮອງຮັບເປັນລາຍຮັບທີ່ຍືນຍົງທີ່ຈະເປັນຫົນທາງທີ່ດີເຮັດໃຫ້ຊີວິດເຂົາເຈົ້າໄດ້ຫຼຸດພົ້ນອອກຈາກຄວາມທຸກຍາກໄດ້ຫຼັງຈາກນັ້ນທ່ານກໍໄດ້ກ່າວມອບຕໍ່ໃຫ້ກັບພະແນກກະສິກຳ ແລະໄປ່າໄມ້ແຂວງເພື່ອນຳໄປແຈກຢາກໃຫ້ກັບປະຊາຊົນໃນບັນດາເມືອງທີ່ໄດ້ຮັບໃນຄັ້ງນີ້.

• 18/02/2019