ລາວໂທລະຄົມ ເປີດນຳໃຊ້ລະບົບ 5 G

 ວັນທີ 31 ສິງຫາ 2020 ທີ່ນະຄອນຫຼວງວຽງຈັນ ບໍລິສັດລາວໂທລະຄົມມະນາຄົມ ມະຫາຊົນ ໄດ້ຈັດພິທີເປີດນໍາໃຊ້ລະບົບ 5G ຢ່າງເປັນທາງການຊຶ່ງເປັນເຄືອຂ່າຍທໍາອິດໃນ ສປປ ລາວ ໂດຍເປັນກຽດເຂົ້າຮ່ວມຂອງທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະການສື່ສານ, ທ່ານ ສຸພົນ ຈັນ ທະວີໄຊ ຜູ້ອໍານວຍການໃຫຍ່ບໍລິສັດລາວໂທລະຄົມມະນາຄົມມະຫາຊົນ, ມີບັນດາຫົວໜ້າກົມ, ຮອງຫົວໜາກົມກະຊວງອ້ອມຂ້າງ ປທສ, ຄະນະອໍານວຍການ, ຜູ້ບໍລິ ຫານລາວໂທລະຄົມ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ສຸພົນ ຈັນທະວີໄຊ ກ່າວວ່າ: ເພື່ອເປັນການຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດກໍ່ຄືວຽກງານຂອງກະຊວງ ປທສ ໃນການຫັນການບໍລິ ການໂທລະຄົມເປັນທັນສະໄໝສາມາດເຊື່ອມໂຍງກັບພາກພື້ນ ແລະສາກົນໄດ້ໂດຍສະເພາະໃນຍຸກເສດຖະກິດດີຈີຕອລ 4.0 Economy Era ດັ່ງທີ່ພວກເຮົາຮູ້ນໍາ ກັນແລ້ວໃນຍຸກປະຈຸບັນການນໍາໃຊ້ເຄື່ອງສື່ສານ ແລະການບໍລິການຂອງໂທລະຄົມແມ່ນໄດ້ກາຍເປັນປັດໄຈທີ່ສໍາຄັນໃນການດໍາລົງຊີວິດຂອງມະນຸດໂດຍສະເພາະກໍແມ່ນກໍຂອງສັງຄົມຢູ່ໃນ ສປປ ລາວ ເຮົາໃນປະຈຸບັນມີຫຼາຍປະເທດໃນທົ່ວໂລກ ແລະຂົງເຂດອາຊີບແມ່ນໄດ້ທົດລອງນໍາໃຊ້ເທັກໂນໂລຊີ 5G ເຂົ້າຮັບໃຊ້ສັງຄົມຢູ່ໃນຫຼາຍຂົງເຂດ ວຽກງານເຊັ່ນ: ທາງດ້ານທຸລະກິດອອນລາຍ E commerce, ນໍາໃຊ້ປັບຍາປາດິດ ຫຼື Ai, IOT, Robotic ເຂົ້າຢູ່ໃນຂົງເຂດອຸດສາຫະກໍາ, ກະສິກໍາ ແລະ ການພັດທະນາເປັນຕົ້ນຊຶ່ງລ້ວນ ແລ້ວແຕ່ເປັນການສ້າງເງື່ອນໄຂໃຫ້ສັງຄົມ ຫຼືຜູ້ຊົມໃຊ້ມີວິຖີຊີວິດນັບມື້ນັບສະດວກແລະວ່ອງໄວມີຄວາມປອດໄພສູງ.

  ສໍາລັບພື້ນທີ່ໃຫ້ບໍລິການລະບົບ 5G ໃນເບື່ອງຕົ້ນລາວໂທລະຄົມຈະໃຫ້ບໍລິການຢູ່ໃນບາງຟື້ນທີ່ຂອງນະຄອນຫຼວງວຽງຈັນກ່ອນເຊັ່ນ: ເຂດສີຫອມ, ຕະຫຼາດກາງຄືນແຄມຂອງ, ເຂດສາຍລົມ ແລະມະຫາວິທະຍາໄລແຫ່ງຊາດ (ວິທະຍາເຂດດົງໂດກ), ຫຼັງຈາກນັ້ນໄລຍະສອງຈຶ່ງຈະຂະຫຍາຍໄປສູ່ບັນດາແຂວງໃຫຍ່ຂອງປະເທດ.

ລະບົບ 5G ມີຄຸນສົມບັດພິເສດຫຼັກໆ ຢູ່ 3 ຢ່າງທີ່ແຕກຕ່າງກັບລະບົບ 4G ຄື: ຄວາມໄວໃນການຮັບ-ສົ່ງຂໍ້ມູນທີ່ໄວກວ່າ 4G ເຖິງ 20 ເທົ່າ, ເຊື່ອມຕໍ່ທີ່ສາມາດຮອງຮັບອຸປະກອນໄດ້ຫຼາຍກວ່າ 4G 10 ເທົ່າ ຫຼືເທົ່າກັບ 1,000,000 ອຸປະກອນ ແລະເວລາໃນການຕອບສະໜອງໂຕ້ຕອບສັ້ນລົງເຖິງ 1 ມິນລີວິນາທີ (1. ms).

แชร์