ຫຼວງພະບາງແຕ່ງຕັ້ງຫົວໜ້າກຸ່ມພະນັກງານນຳທ່ອງທ່ຽວ

  ແນໃສ່ເພື່ອອໍານວຍຄວາມສະດວກໃນການປະສານງານກັບພະນັກງານນໍາທ່ຽວຢູ່ບັນດາບໍລິສັດທ່ອງທ່ຽວພາຍໃນຂອງແຂວງຫຼວງພະບາງທາງພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງຫຼວງພະບາງໄດ້ຈັດກອງປະຊຸມຜ່ານຮ່າງກົດລະບຽບຂອງກຸ່ມພະນັກງານນຳທ່ຽວ ແລະແຕ່ງຕັ້ງທ່ານ ຄໍາສອນ ດາລາວົງ ເປັນປະ ທານຄະນະບໍລິຫານງານກຸ່ມພະນັກງານນຳທ່ຽວແຂວງຫຼວງພະບາງຂຶ້ນໃນວັນທີ 26 ສິງຫາ ຜ່ານມານີ້ຢູ່ໂຮງພະລັກພະລາມຫໍພິພິຕະພັນ, ໂດຍເປັນປະທານຂອງ ທ່ານ ນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວວັດທະນະທຳ ແລະທ່ຽວທ່ຽວແຂວງ, ພ້ອມດ້ວຍຕາງໜ້າຂະແໜງການທີ່ກ່ຽວຂ້ອງພ້ອມດ້ວຍພະນັກ ງານນຳທ່ຽວພາຍໃນແຂວງຫຼວງພະບາງເຂົ້າຮ່ວມ.

  ທ່ານ ຄຳສອນ ດາລາວົງ ກ່າວວ່າ: ກອງປະຊຸມຄັ້ງນີ້ສຸດທີ່ມີຄວາມໝາຍສໍາຄັນເພາະບັນດາພະນັກງານນໍາທ່ຽວຜູ້ທີ່ພາແຂກທ່ອງທ່ຽວພາຍໃນແຂວງຫຼວງພະບາງຈະໄດ້ປະກອບຄໍາຄິດເຫັນຕໍ່ຮ່າງກົດລະບຽບຂອງກຸ່ມພະນັກງານນຳທ່ຽວເພື່ອແກ້ໄຂ ຫຼືເພີ່ມເຕີມບາງເນື້ອໃນຂອງຮ່າງກົດລະບຽບດັ່ງກ່າວໃຫ້ສົມບູນ; ສໍາລັບກົດລະບຽບນີ້ໄດ້ສ້າງຂຶ້ນເພື່ອເຕົ້າໂຮມຄວາມສາມັກຄີ ແລະສະດວກໃນການພົວພັນວຽກຂອງພະນັກງານນຳທ່ຽວທີ່ສັງກັດຢູ່ບັນດາບໍລິສັດ ທ່ອງທ່ຽວ ແລະບໍ່ສັງກັດບໍລິສັດທ່ອງທ່ຽວພາຍໃນແຂວງຫຼວງ ພະບາງໃຫ້ເຄື່ອນໄຫວສອດຄອງກັບ ກົດໝາຍ ແລະລະບຽບການທີ່ກ່ຽວຂ້ອງ ໃຫ້ມີຄວາມເປັນລະບຽບຮຽບຮ້ອຍ, ມີມາດຕະຖານການບໍລິການທີ່ດີເພື່ອໃຫ້ການບໍລິການນັກທ່ອງທ່ຽວທັງພາຍໃນ ແລະຕ່າງປະເທດມີຄວາມປະທັບໃຈ ແລະພ້ອມກັນເຮັດໜ້າທີ່ຊຸກຍູ້,ປຸກລະດົມບັນດາພະນັກງານນຳທ່ຽວປະກອບສ່ວນສ້າງລາຍຮັບແຫ່ງຊາດຈາກຂະແໜງການບໍລິການທ່ອງທ່ຽວໃຫ້ນັບມື້ນັບເພີ່ມຂຶ້ນ.

 ສໍາລັບຮ່າງກົດລະບຽບດັ່ງກ່າວໄດ້ກຳນົດຊື່ ແລະທີ່ຕັ້ງ, ໂຄງປະກອບ, ພາລະບົດບາດ, ສິດ ແລະໜ້າທີ່ຂອງກຸ່ມຢ່າງລະອຽດຈະແຈ້ງກຸ່ມຊື່ວ່າ: ກຸ່ມພະນັກງານນຳທ່ຽວປະຈຳແຂວງຫຼວງພະບາງຂຽນຫຍໍ້ (ກນຫຼບ),ພາສາອັງກິດຂຽນຫຍໍ້ (LTGS) ມີສຳນັກງານຕັ້ງຢູ່ບ້ານປ່າຂາມໂຄງປະກອບການຈັດຕັ້ງກຸ່ມ,ມີທີ່ປຶກສາຈາກພະແນກ ຖວທ ແຂວງຫຼວງພະບາງ 1 ທ່ານ, ທີ່ປຶກສາຈາກສະມາຄົມທຸລະກິດທ່ອງທ່ຽວແຂວງ 1 ທ່ານ, ປະທານກຸ່ມ 1 ທ່ານ, ຮອງປະທານ 2 ທ່ານ, ຄະນະກຳມະການ 5 ທ່ານ, ບໍລິຫານ 1 ທ່ານ, ເລຂາທິການ 1 ທ່ານ,ຕິດຕາມກວດກາ 1 ທ່ານ ແລະບັນຊີການເງິນ 1 ທ່ານ,ຮ່າງກົດລະບຽບສະບັບນີ້ມີທັງໝົດ 7 ໝວດ 27 ມາດຕາ.

-------------

ຂ່າວ: ສີສຸວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์