ໃຊ້ທຶນ 4 ຮ້ອຍຕື້ກວ່າກີບ ສ້າງເຄື່ອນຫ້ວຍສຳພັນຕອນລຸ່ມ ດຽວນີ້ສຳເລັດກຽມລອງຜະລິດໄຟ

  ວັນທີ 26 ສິງຫາຜ່ານມາ, ຫົວໜ້າໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມພ້ອມດ້ວຍຫົວໜ້າບໍລິສັດຜູ້ຮັບເໝົາກໍ່ສ້າງໄດ້ພ້ອມກັນສໍາຫຼວດຄືນຄວາມພ້ອມໃນການກັກເກັບນໍ້າເຂົ້າອ່າງ; ເຊິ່ງຜ່ານມາກໍໄດ້ມີການກວດກາທາງວຽກງານເຕັກນິກຕາມຂັ້ນຕອນເປັນແຕ່ລະໄລຍະໂດຍໃນທ້າຍເດືອນກໍລະກົດ 2020 ຜ່ານມານີ້, ທາງຄະນະກຳມະການກວດກາເຕັກນິກຂັ້ນແຂວງໆ ເຊກອງໄດ້ລົງມາຕິດຕາມ, ກວດກາການກໍ່ສ້າງ ແລະ ຄວາມພ້ອມດ້ານເຕັກນິກຂອງການກໍ່ສ້າງເຂື່ອນເປັນທີ່ຮຽບ ຮ້ອຍແລ້ວ; ຊຶ່ງມາຮອດຈຸບັນນີ້ມີຄວາມພ້ອມແລ້ວທີ່ຈະກັກເກັບນໍ້າເພື່ອນໍາໃຊ້ເຂົ້າໃນການຜະລິດກະແສໄຟຟ້າອອກຮັບໃຊ້ສັງຄົມ.

  ທ່ານ ຫຼິວຢູຢິນ ຫົວໜ້າໂຄງການຂອງບໍລິສັດຊາຍນາເກີໂຈບາກຼຸບຜູ້ຮັບເໝົາກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມໄດ້ລາຍງານວ່າ: ເຂື່ອນໄຟຟ້າຫ້ວຍລໍາພັນຕອນລຸ່ມນີ້ມີທີ່ຕັ້ງຢູ່ບ້ານລະວີລໍາພັນ ເມືອງລະມາມ ແຂວງເຊກອງ, ຊຶ່ງໂຄງການນີ້ປະກອບມີ 4 ໜ້າວຽກ ໃຫຍ່ຄື: ວຽກກໍ່ສ້າງ, ວຽກໄຟຟ້າ-ກົນຈັກ, ວຽກສາຍສົ່ງ ແລະວຽກສິ່ງແວດລ້ອມ; ໂດຍໂຄງການນີ້ມີກໍາລັງຕິດຕັ້ງ 15 ເມກາວັດ,ໂດຍປະກອບມີໜ່ວຍປັ່ນໄຟ 2 ໜ່ວຍ ແລະຈະສາມາດຜະລິດກະແສໄຟຟ້າໄດ້ 68,31 ລ້ານກິໂລວັດໂມງຕໍ່ ປີ, ໂຄງການນີ້ຍັງປະກອບມີໜ້າວຽກ ຍ່ອຍຄື: ຕົວເຂື່ອນ(Dam) ຍາວ 492 ແມັດ, ສູງ 55 ແມັດ, ສັນເຂື່ອນກວ້າງ 5 ແມັດ, ປະເພດຕົວເຂື່ອນເປັນເຂື່ອນດິນໜຽວເນື້ອດຽວ, ລະດັບສັນເຂື່ອນ 202 ແມັດ, ທຽບໃສ່ລະດັບນໍ້າທະເລ; ອຸໂມງສົ່ງນໍ້າ; ອຸໂມງອ່ວຍນໍ້າຍາວ 255 ແມັດ;  ທໍ່ສົ່ງນໍ້າເຂົ້າເຮືອນຈັກ; ເຮືອນຈັກ; ສາຍສົ່ງ 1 ວົງຈອນມີຄວາມຍາວ 10 ກິໂລແມັດ; ການກໍ່ເສັ້ນທາງມີຄວາມຍາວ 10 ກິໂລແມັດ; ເຮືອນພັກຖາວອນຂອງພະນັກງານວິຊາການປະຈໍາເຂື່ອນ 4 ຫຼັງ, ສະໂມສອນ 1 ຫຼັງ,ຫ້ອງການ 1 ຫຼັງ ແລະປ້ອມຍາມ 1 ຫຼັງ, ໂດຍແມ່ນບໍລິສັດຊາຍນາເກີໂຈ ບາກຼຸບ ຈໍາກັດ ເປັນຜູ້ຮັບເໝົາກໍ່ສ້າງ, ດ້ວຍຮູບແບບການກໍ່ສ້າງແບບ EPC Contract, ກໍານົດການກໍ່ສ້າງແມ່ນ 36 ເດືອນ, ໃນມູນຄ່າ 48,23 ລ້ານໂດລາສະຫະລັດ ປະມານ 434,07 ຕື້ກີບ.

  ໃນຂະນະທີ່ ທ່ານ ບຸນໂຮມ ຜິວລາລິນ ຫົວໜ້າໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມໄດ້ລາຍງານວ່າ: ບັນດາໜ້າວຽກຂອງການກໍ່ສ້າງທັງໝົດລວມມີ: ການກໍ່ສ້າງຕົວເຂື່ອນດິນ, ປະຕູສົ່ງຂອງທໍ່ນໍ້າ, ປະຕູລະບາຍນໍ້າລົ້ນ, ເຮືອນຈັກ, ລານໄຟ ແລະອື່ນໆ, ຊຶ່ງມາຮອດປະຈຸບັນແມ່ນກໍ່ສ້າງສໍາເລັດຕາມເປົ້າໝາຍ 100% ແລ້ວ, ຄາດຄະເນວ່າອາດຈະໄດ້ກັກເກັບນໍ້າເຂົ້າອ່າງໃນມໍ່ໆນີ້ເພື່ອນໍາໃຊ້ນໍ້າດັ່ງກ່າວເຂົ້າໃນການຜະລິດກະແສໄຟຟ້າໃນຂັ້ນທົດລອງ ແລະກ້າວໄປສູ່ການຜະລິດຢ່າງເຕັມຮູບແບບ.

--------------

ຂ່າວ: ພຸດທະສອນ  

ຮູບພາບ: #ຫນັງສືພິມເສດຖະກິດສັງຄົມ

 

แชร์