ເລີ່ມບຸນນະມັດສະການພະທາດສີໂຄດ

  ງານດັ່ງກ່າວໄດ້ຈັດຂຶ້ນໃນວັນທີ 15 ກຸມພາ 2019 ທີ່ເດີ່ນພະທາດສີໂຄດຕະບອງເມືອງທ່າແຂກ, ແຂວງຄຳມ່ວນ ໂດຍການໃຫ້ກຽດຕັດແຖບຜ້າ ແລະ ລັ່ນຄ້ອງເປີດງານຂອງ ທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ, ມີບັນດາຄະນະພັກ, ຄະນະນຳຂອງແຂວງ, ສະມາຊິກສະພາເຂດເລືອກຕັ້ງທີ 12, ພະແນກ ການ, ບັນດາພາກສ່ວນທຸລະກິດທັງພາກລັດ ແລະເອກະຊົນ, ຕະຫຼອດຮອດພໍ່ແມ່ປະຊາຊົນບັນດາເຜົ່າຊາວເມືອງທ່າແຂກເຂົ້າຮ່ວມ.

   ທ່ານ ຈັນ ບຸບຜາລີວັນ ເຈົ້າເມືອງໆທ່າແຂກໄດ້ກ່າວລາຍງານໃຫ້ຊາບກ່ຽວ ກັບການກະກຽມງານຕະຫຼາດນັດວາງ ສະແດງ ແລະຂາຍສິນຄ້າໃນງານບຸນນະ ມັດສະການພະທາດສີໂຄດຕະບອງ ເຊິ່ງ ການຈັດງານໃນປີນີ້ກໍ່ເປັນກິດຈະກຳໜຶ່ງທີ່ຈັດມາໃນທຸກໆປີ ທັງນີ້ກໍ່ເພື່ອເປັນການ ຊຸກຍູ້ສົ່ງເສີມການການຜະລິດເປັນສິນຄ້າ ພາຍໃນຂອງປະຊາຊົນບັນດາເຜົ່າໃນທົ່ວ ແຂວງໃຫ້ນັບມືນັບຂະຫຍາຍຕົວເປີດ ກວ້າງ ແລະເປັນການສ້າງຂະບວນການ ໄປຄວບຄູ່ກັບງານບຸນນະມັດສະການພະ ທາດໃຫ້ມີບັນຍາກາດຄຶກຄຶ້ນ - ມ່ວນຊື່ນ, ເຕັມໄປດ້ວຍເນື້ອໃນຄວາມໝາຍຄວາມ ສຳຄັນ, ທັງເປັນການສົ່ງເສີມການທ່ອງ ທ່ຽວ ແລະເປີດໂອກາດໃຫ້ທຸກພາກ ສ່ວນທຸລະກິດທັງພາກລັດ, ພາກເອກະຊົນທັງພາຍໃນແຂວງ ແລະຕ່າງແຂວງ,ອ້ອມຂ້າງເມືອງໄດ້ນຳເອົາຜະລິດຕະພັນຂອງຕົນມາວາງສະແດງ ໂຄສະນາຂາຍ ເປັນສິນຄ້າ ມີໂອກາດພົບປະແລກປ່ຽນ ບົດຮຽນເຊິ່ງກັນ ແລະກັນ. ສິ່ງສຳຄັນອີກຢ່າງໜຶ່ງແມ່ນເພື່ອເປັນການຊຸກຍູ້ໃຫ້ວຽກງານການຄ້າ ການຜະລິດເປັນສິນຄ້າຕິດ ພັນກັບຕະຫຼາດ ແລະສາມາດເຊື່ອມໂຍງກັບບັນດາປະເທດໃນອານຸພາກພື້ນກໍ່ຄືສາ ກົນໃຫ້ນັບມື້ນັບກວ້າງຂວາງ. ໃນງານ ວາງສະແດງຄັ້ງນີ້ປະກອບມີສິນຄ້າຜະ  ລິດຕະພັນກະສິກຳ, ເຄື່ອງຫັດຖະກຳ ຕໍ່າແຜ່ນ, ຈັກສານ, ເຄື່ອງປັ້ນດິນເຜົາ ເຄື່ອງໃຊ້ຄົວເຮືອນ, ເຄື່ອງເຟີນີເຈີ, ຜະລິດຕະພັນໄມ້ ແລະອື່ນໆທີ່ຕິດພັນກັບການດຳລົງຊີວິດຂອງປະຊາຊົນບັນດາເຜົ່າ.ນອກນັ້ນຍັງມີກຸ່ມຜະລິດຕະພັນສິນຄ້າໜຶ່ງເມືອງໜຶ່ງຜະລິດຕະພັນວາງສະແດງ ຢູ່ເຮືອນຊົນເຜົ່າຂອງແຕ່ລະເມືອງປະເພດ ສິນຄ້າ ODOP ທີ່ມີເອກະລັກ ແລະທ່າ ແຮງສະເພາະ ແລະພູມປັນຍາທ້ອງຖິ່ນຄື: ຫັດຖະກຳຈັກສານ, ເຄື່ອງປັ້ນດິນເຜົ່າ, ແຈ່ວນໍ້າຜັກ, ແພຍ້ອມສີທຳມະຊາດ, ຫັດຖະກໍາຟອຍແຂມ, ປາແຫ້ງແປ້ງຊຸດ, ເຫຼົ້ານາກະປໍ, ພ້ອມທັງຫັດຖະກຳແກະສະລັກໄມ້, ແຜ່ນແພ ແລະຜະລິດຕະພັນກະສິກຳເປັນຕົ້ນຫວາຍ. 

   ໃນໂອກາດກ່າວເປີດງານຢ່າງເປັນ ທາງການທ່ານ ຄຳສີອຸດທິວົງ ຮອງເຈົ້າ ແຂວງໆຄຳມ່ວນ ປະທານຈັດງານບຸນນະ ມັດສະການພະທາດສີໂຄດຕະບອງໄດ້ ກ່າວວ່າ : ຂ້າພະເຈົ້າຂໍຖືໂອກາດນີ້ເປີດ ງານສະເຫຼີມສະຫຼອງບຸນນະມັດສະການພະທາດສີໂຄດຕະບອງ ແລະງານຕະຫຼາດນັດວາງສະແດງ ແລະຂາຍສິນຄ້າປະຈຳ ປີ 2019 ຂຶ້ນເພື່ອເປັນການອະນຸລັກຮັກສາມູນເຊຶ້ອ, ວັດທະນະທຳອັນດີງາມຂອງ ຊາດຂອງທ້ອງຖິ່ນທີ່ພວກເຮົາເຄີຍສືບທອດກັນມາແຕ່ບູຮານນະ ການ. ດັ່ງທີຮູ້ນຳກັນແລ້ວວ່າພະທາດສີໂຄດຕະບອງ ແມ່ນສະຖານທີ່ສັກສິດຄູ່ບ້ານຄູ່ເມືອງ ຂອງປະຊາຊົນບັນດາເຜົ່າຊາວແຂວງຄຳມ່ວນ ແລະທຸກໆປີມາ ຮອດມື້  13  ຄໍ່າເດືອນ ເພັງແມ່ນຈະໄດ້ພ້ອມກັນສະເຫຼີມສະຫຼອງ. ພາຍໃນງານບຸນຈະໄດ້ມີພິທີຕັກບາດຖະຫວາຍສັງຂະທານໃນມື້ 13 ຄໍ່າ, 15 ຄໍ່າ ແລະ1 ຄໍ່າ, ມີການເຜີຍແຜ່ສາສະໜາ, ທຳມະເທດສະໜາ, ແຫ່ງປະສາດເຜີ້ງ ແລະມີການຄົບງັນຕາມຮີດຄອງປະເພນີ, ພ້ອມດຽວກັນນີ້ຍັງມີບັນດາດິດຈະກຳອື່ນໆ ເປັນຕົ້ນການເສັງກອງແຕ້, ກອງຈິງ, ການຈັດແຂ່ງຂັນກີລາບານເຕະ, ບານສົ່ງ, ກະຕໍ້ອື່ນໆ ເຊິ່ງງານດັ່ງກ່າວແມ່ນຈະໄດ້ເລີ້ມແຕ່ວັນທີ 15 - 19 ກຸມພາ 2019 ຈິ່ງຈະສຳເລັດ.

ນສພ ເສດຖະກິດ-ສັງຄົມ

แชร์