ເມືອງຫົງສາ ຈັດກອງປະຊຸມໂຄສະນາຮັບນັກຮຽນລະດັບ 1

  ກອງປະຊຸມໂຄສະນາຮັບນັກຮຽນລະດັບ1 ພາຍໃຕ້ໂຄງການຝຶກອົບຮົມວິຊາຊີບ ແລະສະໜັບສະໜູນການມີວຽກເຮັດງານທຳ (VTESS), ຂຶ້ນໃນວັນທີ 25 ສິງຫາຜ່ານມາທີ່ຫ້ອງການກະສິກຳ ແລະປ່າໄມ້ເມືອງຫົງສາໂດຍການເປັນປະທານຂອງທ່ານ ປ່ຽນ ຈິນດາ ຫົວໜ້າຫ້ອງວ່າການເມືອງ,ມີທ່ານ ອາຈານ ທອງດີ ເນົາວັນເພັງ ຮອງອຳນວຍການໂຮງຮຽນເຕັກນິກ-ວິຊາຊີບແບບປະສົມແຂວງໄຊຍະບູລີ ພ້ອມດ້ວຍທີມງານ, ມີຕາງໜ້າຜູ້ປະສານງານຫຼັກຂອງໂຄງການ, ຂະແໜງການທີ່ກ່ຽວຂ້ອງຂອງເມືອງ ແລະນາຍບ້ານເທສະບານເຂົ້າຮ່ວມ ທັງໝົດ 28 ທ່ານ, ຍິງ 8 ທ່ານ.

   ທ່ານ ອາຈານ ທອງດີ ເນົາວັນເພັງ ຮອງອຳນວຍການໂຮງຮຽນເຕັກນິກ-ວິຊາຊີບແບບປະສົມແຂວງໄຊຍະບູລີ ກໍ່ໄດ້ຂຶ້ນນຳສະເໜີຄວາມເປັນມາ,ຈຸດປະສົງຂອງໂຄງ ການ ແລະວິທີຄັດເລືອກ, ການໄດ້ຮັບທຶນຂອງກຸ່ມເປົ້າໝາຍຂອງໂຄງການຝຶກອົບຮົມວິຊາຊີບ ແລະສະໜັບສະໜູນການມີວຽກເຮັດງານທຳ (VTESS), ຂັ້ນຕອນການປະສານງານກັບໂຮງຮຽນ, ຊຶ່ງສາຂາອາຊີບທີ່ໂຮງຮຽນເຕັກນິກ-ວິຊາຊີບແບບປະສົມແຂວງໄຊຍະບູລີຈັດການຮຽນ-ການສອນປະກອບມີ 5 ສາຂາອາຊີບຄື :ການຕິດຕັ້ງໄຟຟ້າໃນອາຄານ, ການສ້ອມແປງເຄື່ອງຈັກ, ຊ່າງກໍ່-ຊ່າງໂບກ, ປູກຝັງ ແລະ ລ້ຽງສັດ, ນອກນັ້ນກໍ່ຍັງມີສາຂາອື່ນໆຕື່ມອີກ, ໄລຍະຂອງການຮຽນລະດັບໃບປະກາດສະນີຍະບັດຊັ້ນຕົ້ນລະດັບ 1 ແມ່ນ ໃຊ້ເວລາ 3 ເດືອນ, ລະດັບ 2 ແມ່ນໃຊ້ເວລາ 6 ເດືອນ, ລະດັບ 3 ແມ່ນໃຊ້ເວລາ 9 ເດືອນ, ນອກຈາກນີ້ທາງໂຄງການຈະໄດ້ສະໜັບສະ ໜູນຄ່າເບ້ຍລ້ຽງປະຈຳເດືອນ, ເຄື່ອງແບບ ແລະຄ່າອຸປະກອນໃນການຝຶກ ອົບຮົມ, ຄ່າເດີນທາງໄປ-ກັບ, ຄ່າຫໍພັກຂອງສຳມະນາກອນ ແລະຄ່າເບ້ຍລ້ຽງໃນໄລຍະຝຶກງານ, ຊຶ່ງໂຄງການດັ່ງກ່າວນີ້ແມ່ນມີເປົ້າໝາຍເລັ່ງໃສ່ເພື່ອສະໜອງການຝຶກອົບຮົມວິຊາຊີບທີ່ສອດຄ່ອງກັບຄວາມຕ້ອງ ການຂອງຕະຫຼາດແຮງງານໂດຍສຸມໃສ່ກຸ່ມເປົ້າໝາຍທີ່ເປັນໄວໜຸ່ມຜູ້ດ້ອຍໂອກາດ, ຊົນເຜົ່າ, ຜູ້ທຸກຍາກ, ບໍ່ຈຳກັດເພດທີ່ນອນຢູ່ໃນເກນອາຍຸລະຫວ່າງ 15–35 ປີ, ທີ່ຮຽນຈົບຊັ້ນປະຖົມແຕ່ບໍ່ຈົບຊັ້ນມັດທະຍົມສຶກສາຕອນຕົ້ນ, ເພື່ອໃຫ້ເຂົາເຈົ້າມີວຽກເຮັດງານທຳ,ສາມາດປະກອບອາຊີບດ້ວຍຕົວເອງ ແລະໄດ້ຮັບການສຶກສາຮໍ່າຮຽນໃຫ້ມີວິຊາອາຊີບ, ໂຄງການດັ່ງກ່າວນີ້ແມ່ນຈະໄດ້ເລີ່ມແຕ່ເດືອນຕຸລາ ປີ 2020 ຮອດທ້າຍປີ 2023 ຈຶ່ງຈະສໍາເລັດ.

  ໃນຕອນທ້າຍກອງປະຊຸມ ທ່ານ ປ່ຽນ ຈິນດາ ໄດ້ໃຫ້ກຽດໂອ້ລົມຊຶ່ງກ່ອນອື່ນທ່ານກໍ່ໄດ້ສະແດງຄວາມຂອບໃຈຢ່າງສູງທີ່ທາງໂຮງຮຽນໄດ້ຍາດເອົາທຶນດັ່ງກ່າວນີ້ມາສະ ໜັບສະໜູນໃຫ້ຊາວໜຸ່ມຢູ່ພາຍໃນເມືອງຫົງສາ ແລະທ່ານຍັງໄດ້ເນັ້ນໜັກໃຫ້ຂະແໜງການທີ່ກ່ຽວຂ້ອງຈົ່ງນຳເອົາໄປຈັດຕັ້ງປະຕິບັດໃຫ້ເກີດດອກອອກຜົນ.

----------------

ໂດຍ: ຄຳມີ ພົມມະຈັນ

แชร์