ກຽມແຜນມອບ-ຮັບໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າຮຽນ

  ໃນອາທິດຜ່ານມາພະແນກສຶກສາທິການ ແລະກີລາແຂວງສະຫວັນນະເຂດຮ່ວມກັບອົງການບັນເທົາທຸກຄາໂຕລິກ(CRS) ປະຈໍາ ສປປ ລາວ ຈັດກອງປະຊຸມທົບທວນຄືນການຈັດຕັ້ງປະຕິບັດໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າຮຽນໃນຊັ້ນປະຖົມສຶກສາໄລຍະທີ II (LEA PS II) ຂອງອົງການ CRS, ໃຫ້ກຽດເປັນປະທານ ໂດຍທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະກີລາ, ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະກີລາແຂວງ, ມີບັນດາພະນັກງານພາຍໃນພະແນກ, ຕົວແທນຈາກເມືອງ 7 ເມືອງເປົ້າໝາຍ ແລະ ແຂກທີ່ຖືກ ເຊີນເຂົ້າຮ່ວມ.

  ທ່ານ ນາງ ຄໍນີເລຍ ເຊຈ ຜູ້ອໍານວຍການໂຄງການ LEAPS II ກໍ່ໄດ້ນໍາສະເໜີແຜນການມອບ-ຮັບໂຄງການ (LEAPS) ຊຶ່ງໃຫ້ຮູ້ວ່າ: ໂຄງການນີ້ແມ່ນເລີ່ມດໍາເນີນມາແຕ່ປີ 2012, ພາຍໃຕ້ການຊ່ວຍເຫຼືອລ້າຈາກ ກະຊວງກະສິກໍາປະເທດສະຫະ ລັດອາເມລິກາ (USDA) ເພື່ອ ສົ່ງເສີມໃນດ້ານອາຫານ ແລະໂພຊະນາການຂອງເດັກ, ຜ່ານມາ ໂຄງການໄດ້ສະໜອງຄາບເຂົ້າຈໍານວນ 22 ລ້ານກວ່າຄາບ, ໃຫ້ນັກຮຽນຫຼາຍກວ່າ 40.000 ຄົນ, ໃນ 7 ເມືອງເປົ້າໝາຍຢູ່ແຂວງສະຫວັນນະເຂດຄື: ເມືອງອາດສະພອນ, ອຸທຸມພອນ, ພະລານໄຊ, ພີນ, ວິລະບູລີ, ເຊໂປນ ແລະເມືອງນອງ,ນອກຈາກການສົ່ງເສີມດ້ານອາຫານ ແລະໂພຊະນາການແລ້ວ, ທາງໂຄງການຍັງໄດ້ສະໜອງອຸປະກອນ ແລະການຝຶກອົບຮົມກ່ຽວກັບການຮູ້ໜັງສື, ເຄື່ອງຊ່ວຍຄໍ້າຊູເດັກພິການ ແລະອື່ນໆ. ຊຶ່ງໃນປີ 2020-2021 ນີ້, ເປັນຊ້ວງໄລຍະທ້າຍໂຄງການ ເເລະຢູ່ໃນຊ້ວງກະກຽມປ່ຽນຖ່າຍມອບ-ຮັບໂຄງການໃຫ້ແກ່ລັດຖະບານດັ່ງນັ້ນ,ພວກເຮົາຈຶ່ງໄດ້ມີການປະເມີນຜົນໃນການຈັດຕັ້ງປະຕິບັດຜ່ານມາເພື່ອປັບໃຫ້ແທດເໝາະກັບສະພາບຄວາມເປັນຈິງກ່ອນຈະມອບໃຫ້ລັດຖະບານ ສປປ ລາວ ສືບຕໍ່ວຽກງານຕໍ່ໄປ.

 ຈາກນັ້ນ,ທ່ານ ນາງ ຂັນທະ ລີສີຣິພົງພັນ ກໍ່ໄດ້ກ່າວສະແດງຄວາມຂອບໃຈຕໍ່ອົງການ CRS ກໍຄືກະຊວງກະສິກໍາປະເທດສະຫະລັດອາເມລິກາທີ່ໄດ້ໃຫ້ການຊ່ວຍເຫຼືອຕະຫຼອດມາພ້ອມທັງສະແດງຄວາມເປັນຫ່ວງເປັນໃຍຕໍ່ການປ່ຽນແປງທີ່ຈະມາຮອດໃນມໍ່ໆນີ້ເນື່ອງຈາກວ່າໃນສົກຮຽນ 2020-2021 ທີ່ຈະມາເຖິງນີ້,ເປັນຊ້ວງໄລຍະກະກຽມປ່ຽນຖ່າຍມອບ-ຮັບໂຄງການໃຫ້ແກ່ລັດຖະບານຊຶ່ງຍັງມີບາງບັນຫາທີ່ຍັງຄົງຄ້າງດັ່ງນັ້ນຈຶ່ງຮຽກຮ້ອງໃຫ້ບັນດາພາກສ່ວນທີ່ກ່ຽວຂ້ອງຈົ່ງປະສານສົມທົບກັນໃຫ້ລະອຽດຖີ່ຖ້ວນເພື່ອຄວາມສະດວກຂອງຜູ້ທີ່ຈະສືບຕໍ່ໂຄງການດັ່ງກ່າວ.

แชร์