ຮ້ານຂາຍໝາກໄມ້ ນາງໄໝ ໄຊຍະລາດກຽມໝາກໄມ້ຫຼາຍຊະນິດ ເພື່ອຮອງຮັບໃຫ້ລູກຄ້າ

  ບຸນຫໍ່ເຂົ້າສະຫຼາກ ຫຼືບຸນເຂົ້າສາກ ຄສ 2020 ພສ 2563 ບໍ່ວ່າຮ້ານຂາຍຍົກ-ຂາຍຍ່ອຍປະເພດຕ່າງໆພາຍໃນຕະຫຼາດເມືອງທ່າແຕງ ແຂວງເຊກອງຕ່າງກໍ່ກຽມ ພ້ອມສິນຄ້າທຸກປະເພດໂດຍສະເພາະປະເພດເຄື່ອງຫໍ່ເຂົ້າຕົ້ມ, ເຂົ້າໜົມ, ເຄື່ອງໃສ່ຫໍ່ເຂົ້າ, ຕົ້ນເງິນ, ຕົ້ນໂພເງິນ, ຕົ້ນໂພຄໍາ ແລະ ເຄື່ອງຖວາຍສັງຄະທານອື່ນໆ ໃນ ນັ້ນຮ້ານຂາຍໝາກໄມ້ ນາງ ໄໝ ໄຊຍະລາດ ກໍແມ່ນອີກຮ້ານໜຶ່ງທີ່ມີການຫ້າງຫາກະກຽມໝາກໄມ້ປະເພດຕ່າງໆເຊັ່ນດຽວກັບຮ້ານອື່ນໆ ເພື່ອຕອບສະໜອງລູກຄ້າ ໃນບຸນຫໍ່ເຂົ້າສະຫຼາກປະຈໍາປີ 2020.

  ທ່ານ ນາງ ໄໝ ໄຊຍະລາດ ເຈົ້າຂອງຮ້ານຂາຍໝາກໄມ້ສົດຕະຫຼາດເມືອງທ່າແຕງ ແຂວງເຊກອງ ໄດ້ເປີດເຜີຍເມື່ອບໍ່ດົນນີ້ວ່າ: ແຕ່ລະປີການຂາຍໝາກໄມ້ເຫັນວ່າຂາຍດີພໍສົມຄວນບໍ່ວ່າຈະເປັນວັນທໍາມະດາ ຫຼືວັນບຸນ ແລະວັນສໍາຄັນອື່ນໆ, ທີ່ສໍາຄັນແມ່ນວັນບຸນທາງສາສະໜາໂດຍສະເພາະວັນສິນໃຫຍ່ກໍຄືສິນດັບ, ສິນເພັງ, ບຸນ ເທສະການ, ບຸນຫໍ່ເຂົ້າອື່ນໆເຫັນວ່າຂາຍດີມີບັນຍາກາດຟົດຟື້ນ, ສະນັ້ນພາຍຫຼັງສໍາເລັດບຸນຫໍ່ເຂົ້າປະດັບດິນແລ້ວທາງຮ້ານຂອງ ນາງ ໄໝ ໄຊຍະລາດ ກໍ່ຫ້າງຫາກະ ກຽມສັ່ງໝາກໄມ້ເພີ່ມຕື່ມອີກເພື່ອກຽມຂາຍໃນບຸນຫໍ່ເຂົ້າສະຫຼາກປີ 2020, ໂດຍໄດ້ກະກຽມແຕ່ທ້າຍເດືອນສິງຫາເພື່ອຮອງຮັບໃຫ້ລູກຄ້າໄດ້ມາຈັບຈ່າຍຊື້ເອົາໝາກໄມ້ໄປເຮັດບຸນທໍາທານຕາມປະເພນີທີ່ເຄີຍເຮັດເຄີຍທໍາກັນມາເປັນຕົ້ນ: ໝາກແອັບເປີ້ນ, ໝາກກ້ຽງ, ໝາກມັງກອນ, ໝາກມັງຄຸດ, ໝາກພ້າວອ່ອນ, ໝາກລະແຊັງ, ໝາກລ່ອງກ່ອງ, ໝາກມ່ວງ, ໝາກແຕງ, ໝາກສີດາ, ໝາກເງາະ, ໝາກຖົ່ວລຽນ, ໝາກສາລີ ແລະໝາກໄມ້ອື່ນໆຕາມລະດູການ, ເນື່ອງຈາກວ່າສິນຄ້າປະເພດໝາກໄມ້ຈະເປັນທີ່ນິຍົມຂອງຊາວລາວເຮົາໃນການນໍາເອົາໄປໃສ່ບາດ, ຖວາຍພະສົງ, ຊຶ່ງບຸນຫໍ່ເຂົ້າປະດັບດິນຜ່ານມາມີລູກຄ້າສັ່ງຈ່ອງໝາກໄມ້ຫຼາຍຊະນິດເປັນຈໍານວນຫຼວງຫຼາຍ,ໃນນັ້ນໝາກໄມ້ທີ່ລູກຄ້າມີຄວາມຕ້ອງການຫຼາຍແມ່ນປະເພດໝາກກ້ຽງ,ໝາກແອັບເປີ້ນ,ໝາກເງາະ,ໝາກຫຸ່ງສຸກນອກນັ້ນກໍຍັງມີໝາກມັງກອນ,ໝາກພ້າວອ່ອນ, ໝາກສາລີ ແລະອື່ນໆ.

  ແຕ່ລະປີລາວຈະມີລາຍຮັບຈາກການຂາຍໝາກໄມ້ໃນຍາມບຸນຫໍ່ເຂົ້າບໍ່ຕໍ່າກວ່າ 7 ແສນກີບ ແລະບຸນຫໍ່ເຂົ້າປະດັບດິນຜ່ານມາແລ້ວນີ້ກໍມີລາຍຮັບເຖິງ 1 ລ້ານກວ່າກີບ, ຄາດວ່າໃນບຸນຫໍ່ເຂົ້າສະຫຼາກນີ້ຈະມີລາຍຮັບຈາກການຂາຍໝາກໄມ້ປະມານ 1 ລ້ານກວ່າກີບ ນອກນີ້ທາງຮ້ານຂາຍໝາກໄມ້ ນາງ ໄໝ ໄຊຍະລາດ ຍັງເຮັດ ເຄື່ອງຕ່າງໆປະກອບໃສ່ຫໍ່ເຂົ້າ ແບບສໍາເລັດຂາຍຕື່ມອີກ.

-------------

ໂດຍ: ລັດຕະນະພອນ

แชร์