ຫຼວງນ້ຳທາ ເຂັ້ມງວດລົງຢືດພ້ອມທຳລາຍສິ້ນສ່ວນສັດປ່າ 108 ກິໂລ

     ວັນທີ 13 ກຸມພາ 2019 ທີ່ແຂວງຫຼວງນໍ້າທາ ໄດ້ຈັດພິທີຈູດທຳລາຍສີ້ນສ່ວນສັດປ່າທີ່ຢຶດນຳພໍ່ຄ້າ ແລະແມ່ຄ້າພາຍໃນແຂວງຫຼວງນ້ຳທາເຂົ້າຮ່ວມພິທີ ຈູດທຳລາຍສີ້ນສ່ວນສັດປ່າມີທ່ານ ທວງ ນາມວົງສາ  ຮອງຫົວໜ້າພະແນກກະສິກຳ ແລະປ່າໄມ້ແຂວງ, ທ່ານ ພັນທອງ ຈັນທະລັງສີ ຮອງຫົວໜ້າກົມກວດກາ ປ່າໄມ້, ມີຫົວໜ້າຮອງຫົວໜ້າກອງ, ຫົວໜ້າຂະແໜງ-ຮອງຂະແໜງ, ຄຸ້ມຄອງຕະຫຼາດ ແລະນາຍບ້ານ 8 ບ້ານເທສະບານເຂົ້າຮ່ວມ.

 ທ່ານ ດວງດີ ກາລີຄຳ ຫົວໜ້າກອງກວດກາປ່າ ໄມ້ແຂວງກ່າວວ່າ: ປະຕິບັດຕາມກົດໝາຍວ່າດ້ວຍ ສັດນ້ຳ-ສັດປ່າ ສະບັບເລກທີ 07/ສພຊ ລົງວັນທີ 24 ທັນວາ 2007, ຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 05/ນຍ ລົງວັນທີ 08 ພຶດສະພາ 2018 ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາສັດປ່າ ແລະພືດປ່າປະເພດຫວງ ຫ້າມ, ໃຫ້ຍຸດຕິໃນການລ່າສັດປ່າທຸກປະເພດທີ່ນອນຢູ່ໃນບັນຊີປະເພດສັດຫວງຫ້າມ, ບັນຊີຄຸ້ມຄອງຫ້າມນຳເຂົ້າ-ສົ່ງ ອອກ, ນໍາຜ່ານ, ຫ້າມຊື້-ຫ້າມຂາຍສັດ ປ່າ ແລະຫ້າມຄອບຄອງສັດທີ່ມີຊີວິດ ແລະບໍ່ມີຊີວິດລວມທັງສີ້ນສ່ວນສັດປ່າ ໂດຍບໍ່ໄດ້ຮັບອະນຸຍາດຈາກລັດຖະບານ.

  ການປະຕິບັດຂອງເຈົ້າໜ້າທີ່ກົມກວດກາປ່າໄມ້ໄດ້ປະສານສົມທົບກັບເຈົ້າໜ້າ ທີ່ກອງກວດກາປ່າໄມ້ແຂວງຫຼວງນ້ຳ ທາໝ່ວຍງານກວດກາປ່າໄມ້ 5 ເມືອງ ແລະພາກສ່ວນທີ່ກ່ຽວຂ້ອງເພື່ອກວດກາລາດຕະເວນຕາມຕະຫຼາດ, ຮ້ານອາຫານ, ຕາມເສັ້ນທາງທີ່ມີການວາງຂາຍ ແລະ ຈຸດຫຼໍ່ແຫຼມຕ່າງໆ. ຊຶ່ງສາມາດຍຶດສັດປ່າ ແລະສີ້ນສ່ວນສັດປ່າທີ່ນຳມາທຳລາຍ ຄັ້ງນີ້ມີ 108 ກິໂລຄື: ຊີ້ນກວາງ 10 ກິ ໂລ, ຊີ້ຟານ 10 ກິໂລ, ຊີ້ນໝູປ່າ 42 ກິໂລ, ຊີ້ນເໝັ້ນ 20 ກິໂລ, ເຫງັນ 15 ກິໂລ, ງູເຫຼືອມ 1 ກິໂລ, ນົກຂວາ 5 ກິໂລ ແລະ ກະຮອກ 5 ກິໂລ.

ຂ່າວ: ກິ່ນນາລົມ ແອ່ນຖ່າຍໄທ 

แชร์