ເມືອງກາສີຮັບຮອງ 2 ກຸ່ມບ້ານ ເປັນກຸ່ມບ້ານວັດທະນະທຳ

  ພິທີປະກາດກຸ່ມບ້ານນາມົນ ແລະກຸ່ມບ້ານບວມຜຸກ ເມືອງກາສີ ແຂວງວຽງຈັນ ເປັນກຸ່ມບ້ານວັດທະນະທຳແຫ່ງທີ 1, ທີ 2 ຂອງເມືອງ ແລະແຫ່ງທີ 19, ທີ 20 ຂອງແຂວງໄດ້ຈັດຂຶ້ນໃນວັນທີ 26 ສິງຫາ 2020, ຢູ່ທີ່ສະໂມສອນຂອງເມືອງ, ເປັນກຽດເຂົ້າຮ່ວມຂອງທ່ານ ນາງ ອິ່ນຄຳ ພັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງວຽງຈັນ, ທ່ານ ສີທົນ ແສງພະຈັນ ເຈົ້າເມືອງໆກາສີ, ມີຫົວໜ້າຫ້ອງການ, ຫົວໜ້າກຸ່ມບ້ານ, ເລຂາພັກບ້ານ, ນາຍບ້ານພາຍ ໃນ 2 ກຸ່ມບ້ານດັ່ງກ່າວເຂົ້າຮ່ວມ.

  ທ່ານ ພູຜ່ານ ພູວົງ ຫົວໜ້າກຸ່ມບ້ານນາມົນໄດ້ສະຫຼຸບລາຍງານສະພາບການສ້າງ 2 ກຸ່ມບ້ານດັ່ງກ່າວເປັນກຸ່ມບ້ານວັດທະນະທຳ ຊຶ່ງໃນໄລຍະຜ່ານມາທັງ 2 ກຸ່ມບ້ານໄດ້ມີການພັດທະນາຢ່າງບໍ່ຢຸດຢັ້ງໜ່ວຍພັກສາມາດຮັບຮອງເປັນໜ່ວຍພັກແຂງຮູ້ນໍາພາຮອບດ້ານແລ້ວ 3 ໜ່ວຍພັກ, ແຕ່ລະບ້ານມີ ສະໂມສອນ ແລະຫ້ອງການບ້ານ ຢ່າງເປັນລະບົບ, ເສດຖະກິດມີການເຕີບໃຫຍ່ຂະຫຍາຍຕົວ, ປະຊາຊົນມີລາຍຮັບເພີ່ມຂຶ້ນມີເຂົ້າກຸ່ມກິນ ແລະແຮໄວ້,ສັງຄົມມີຄວາມສະຫງົບປອດໄພໂດຍພື້ນຖານວັດທະນະທໍາ ແລະຮີດຄອງປະເພນີອັນດີງາມຂອງເຜົ່າຕ່າງໆໄດ້ຮັບການອະນຸລັກຮັກສາ ແລະເສີມຂະຫຍາຍຢ່າງຕັ້ງໜ້າ.

  ທ່ານ ແຫຼວທອງ ແສງສຸລິຍາ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງກາສີໄດ້ກ່າວວ່າ: ທັງ 2 ກຸ່ມບ້ານປະກອບມີທັງໝົດ 13 ບ້ານ, ມີ 2.148 ຫຼັງຄາເຮືອນ, ມີ 2.345 ຄອບຄົວ, ມີຈານວນພົນລະເມືອງ ທັງໝົດ 11.598 ຄົນ, ຍິງ 5.773 ຄົນ, ມີ 12 ບ້ານແມ່ນໄດ້ຖືກຮັບຮອງເປັນບ້ານວັດທະນະທໍາແລ້ວເທົ່າກັບ 92,30%, ມີຄອບຄົວວັດທະນະທຳ 1.909 ຄອບຄົວ ເທົ່າກັບ 87,01%, ມີບຸກຄົນວັດທະນະທຳທັງໝົດ 10.447 ຄົນ ເທົ່າກັບ 96,88%, ຜ່ານການ ຈັດແບ່ງປະເພດບຸກຄົນ, ຄອບຄົວ ແລະບ້ານວັດທະນະທຳເຫັນວ່າທັງ 2 ກຸ່ມບ້ານແມ່ນມີເງື່ອນໄຂ, ມາດຖານສາມາດປະກາດຮັບຮອງເປັນກຸ່ມບ້ານວັດທະນະທຳໄດ້ຈຶ່ງໄດ້ຈັດພິທີປະກາດຮັບຮອງເອົາຢ່າງເປັນທາງການ.

  ໃຫ້ກຽດມອບໃບຢັ້ງຢືນກຸ່ມບ້ານວັດທະນະທຳໃຫ້ 2 ກຸ່ມບ້ານ ດັ່ງກ່າວໂດຍແມ່ນທ່ານ ນາງ ອິນຄຳ ພັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ, ພ້ອມທັງໃຫ້ກຽດເປີດປ້າຍປະກາດກຸ່ມບ້ານນາມົນ ແລະກຸ່ມບ້ານບວມຜຸກເມືອງກາສີ ແຂວງວຽງຈັນ ເປັນກຸ່ມບ້ານວັດທະນະທຳ ແລະ ລັ່ນຄ້ອງ 9 ບາດເພື່ອເປັນສິລິມຸງຄຸນໃຫ້ແກ່ 2 ກຸ່ມບ້ານດັ່ງກ່າວອີກດ້ວຍ.

 

แชร์