ປະຊຸມຜູ້ບໍລິຫານການສຶກສາທົ່ວປະເທດ

   ວັນທີ 27 ສິງຫາ ຜ່ານມາທີ່ຫ້ອງປະຊຸມສູນກາງແນວລາວສ້າງຊາດນະຄອນຫຼວງວຽງຈັນໄດ້ມີກອງປະຊຸມຜູ້ບໍລິຫານການສຶກສາ ແລະກີລາທົ່ວປະເທດປະຈຳສົກ 2019-2020 ໂດຍພາຍໃຕ້ການເປັນປະທານຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກີລາ, ທ່ານ ນາງ ຂັນທະລີ ສິຣິພົງພັນ ຮອງລັດຖະມົນຕີກະຊວງສຶກສາທິການ ແລະກີລາ, ທ່ານ ພຸດ ສິມມາລາວົງ ຮອງລັດຖະມົນຕີກະຊວງສຶກສາທິການ ແລະ ກີລາ, ບັນດາຫົວໜ້າຫ້ອງການ, ປະທານຄະນະກຳມາທິການວັດທະນະທຳ-ສັງຄົມສະພາແຫ່ງຊາດ, ອາດີດການນຳກະຊວງສຶກສາທິການ ແລະກີລາ, ອະທິການບໍດີ-ຮອງອະທິການບໍດີ,ຫົວໜ້າ-ຮອງຫົວໜ້າກົມ, ຫົວໜ້າພະແນກ-ຮອງພະແນກສຶກສາທິການ ແລະກີລາທົ່ວປະເທດ, ຜູ້ຕາງໜ້າຈາກບັນດາກະຊວງໃນຂົງເຂດວັດທະນະທຳ-ສັງຄົມ.

 ທ່ານ ນາງ ແສງເດືອນ ຫຼ້າຈັດທະບູນ ໄດ້ກ່າວວ່າ: ກອງປະຊຸມຄັ້ງນີ້ເປີດຂຶ້ນໃນທ່າມກາງທີ່ບັນຍາກາດທົ່ວພັກ, ທົ່ວກຳລັງປະກອບອາວຸດ ແລະທົ່ວປວງຊົນພວມອອກ ແຮງແຂ່ງຂັນເພື່ອສ້າງຂະບວນການຕ້ອນຮັບກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວເວົ້າລວມເວົ້າສະເພາະແມ່ນກອງປະຊຸມໃຫຍ່ 3 ຂັ້ນຂອງອົງຄະ ນະພັກກະຊວງສຶກສາທິການ ແລະກີລາ, ຊຶ່ງປີນີ້ເປັນປີມ້ວນທ້າຍໃນການຈັດຕັ້ງປະຕິບັດແຜນພັດທະນາການສຶກສາ ແລະກີລາ 5 ປີ ຄັ້ງທີ VIII (2016-2020) ຂອງຂະແໜງການສຶກສາທິການ ແລະກີລາ, ເປັນປີທີ່ພວກເຮົາໄດ້ພົບບັນຫາການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ໂຄວິດ-19 ໄດ້ສົ່ງຜົນກະທົບທາງກົງ ແລະທາງອ້ອມຕໍ່ຄາດໝາຍຕົວຊີ້ບອກຂອງຂະແໜງການສຶກສາ ແລະກີລາຂອງພວກເຮົາ, ສະນັ້ນເພື່ອເປັນການຕີລາຄາຄວາມຄືບໜ້າການຈັດຕັ້ງປະຕິບັດມະຕິກອງປະຊຸມຜູ້ບໍລິຫານການສຶກສາ ແລະກີລາປະຈຳສົກຮຽນ 2018 -2019 ແລະພ້ອມກັນກຳນົດທິດທາງແຜນການສົກຮຽນ 2020-2021.

ໃນກອງປະຊຸມຈະໄດ້ປຶກສາຫາລື ແລະເອກະພາບກັນຫຼາຍບັນຫາໂດຍສະເພາະຈະໄດ້ສຸມໃສ່ລາຍງານຜົນການຈັດຕັ້ງແຜນພັດທະນາການສຶກສາປະຈຳສົກຮຽນ 2019 -2020 ແລະແຜນປະຈຳ ສົກຮຽນ 2020-2021; ລາຍງານຫຍໍ້ຜົນການປະເມີນແຜນ5 ປີ 2016-2020 ແລະແຜນບູລິມະສິດສຳລັບແຜນພັດທະນາການ ສຶກສາ 5 ປີ ຄັ້ງທີ 9 (2021- 2025); ລາຍງານຜົນການປະເມີນຜົນການຮຽນຂອງນັກຮຽນມັດທະຍົມສຶກສາປີທີ 4; ລາຍງານ ຜົນການຕິດຕາມມະຕິກອງປະຊຸມຜູ້ບໍລິຫານການສຶກສາປະຈຳສົກຮຽນ 2018-2019; ລາຍງານການກະກຽມງານມະຫະກຳກີລາແຫ່ງຊາດຄັ້ງທີ XI ທີ່ແຂວງຊຽງຂວາງເປັນເຈົ້າພາບ; ສະ ເໜີບົດລາຍງານການຕິດຕາມການສຶກສາຂອງໂລກ (2020 GEMReport); ລາຍງານຜົນການວິໄຈການນຳໃຊ້ນິຕິກຳທີ່ກ່ຽວຂ້ອງກັບການພັດທະນາຄູ; ລາຍງານການບັນຈຸຄູໃໝ່ ແລະການແກ້ໄຂບັນຫາຄູອາສາສະໝັກ; ສະເໜີແນວຄວາມຄິດກ່ຽວກັບນະໂຍບາຍຄຸ້ມຄອງທີ່ອີງໃສ່ໂຮງຮຽນເປັນຫຼັກ ແລະລາຍງານການສ້າງຕັ້ງກຸ່ມໂຮງຮຽນ.

 

แชร์