ຄຳມ່ວນສະຫຼຸບຜົນການສອບເສັງ ປ5, ມ4 ແລະມ7 ສົກປີ 2019-2020

 ພະແນກສຶກສາທິການແລະກີລາປະຈຳແຂວງຄຳມ່ວນສະຫຼຸບຜົນການສອບເສັງສົກຮຽນ 2019-2020 ສຳລັບຂັ້ນ ປ5, ມ4 ແລະມ7 ໃນວັນທີ 25 ສິງຫາ2020 ໂດຍການເປັນກຽດເຂົ້າຮ່ວມຂອງ ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ, ທ່ານນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະກີລາ, ມີ ຄະນະອຳນວຍການໂຮງຮຽນໃນທົ່ວແຂວງຕະຫຼອດເຖິງພະນັກງານຄູ-ອາຈານເຂົ້າຮ່ວມ.

   ທ່ານ ນັນຕະໄຊ ອິນທະສອນ ໄດ້ສະຫຼຸບການຈັດຕັ້ງປະຕິບັດ, ດຳເນີນງານ ແລະຕັດສິນການສອບເສັງສາຍສາມັນສຶກສາຂັ້ນ ປ5, ມ4  ແລະ ມ7 ປະຈຳສົກປີ 2019-2020 ວ່າ: ໃນທົ່ວແຂວງຄຳມ່ວນມີໂຮງຮຽນລວມທັງໝົດ 787 ແຫ່ງ, ໃນນັ້ນໂຮງຮຽນປະຖົມສຶກສາ 649 ແຫ່ງ ແລະໂຮງຮຽນມັດທະຍົມສຶກສາ 138 ແຫ່ງ, ມີຈຳນວນນັກຮຽນແຕ່ ປ1 ຫາ ມ7 ລວມທັງໝົດ 80.102 ຄົນ,ໃນນັ້ນຈຳນວນນັກຮຽນປະຖົມສຶກສາ 45.137 ຄົນອັດຕາເຂົ້າຮຽນສຸດທິສຳລັບຊັ້ນປະຖົມກວມ 96,2%, ນັກຮຽນມັດທະຍົມສຶກສາຕອນຕົ້ນ 23.815 ຄົນອັດຕາເຂົ້າຮຽນສຸດທິ 77,3% ແລະນັກຮຽນມັດທະຍົມສຶກສາຕອນປາຍ 11.150 ຄົນອັດຕາເຂົ້າຮຽນ 45%.

  ສຳລັບການຈັດຕັ້ງປະຕິບັດຜົນການສອບເສັງນັກຮຽນຂັ້ນ ປ5 ຊຶ່ງມີໜ້າສອບເສັງຕົວຈິງ 8.436 ຄົນ, ສອບເສັງໄດ້ 8.389 ຄົນເທົ່າກັບ 99,44% ໃນນີ້ຈຳນວນນັກຮຽນສອບເສັງໄດ້ຄະແນນ 5 ຂຶ້ນໄປທຸກວິຊາ 4.198 ຄົນເທົ່າກັບ  49,74%, ຂັ້ນ ມ4 ນັກຮຽນສອບເສັງຕົວຈິງ 4.607 ຄົນ,  ສອບເສັງ ໄດ້ 4.587 ຄົນເທົ່າກັບ 99,56%, ສອບເສັງໄດ້ຄະແນນ 5 ຂຶ້ນໄປມີ 672 ຄົນເທົ່າກັບ 14,59%, ຂັ້ນ ມ7 ນັກຮຽນສອບເສັງຕົວຈິງ 3.667 ຄົນ, ສອບເສັງໄດ້ 3.664 ຄົນເທົ່າກັບ 99,92%, ສອບເສັງໄດ້ຄະແນນ 5 ຂຶ້ນໄປມີ 1.516 ຄົນເທົ່າກັບ 41,34%.

  ໂອກາດດຽວກັນຍັງໄດ້ຈັດການຍ້ອງຍໍໃຫ້ແກ່ນັກຮຽນ ມ7 ທີ່ສອບເສັງໄດ້ຄະແນນ 7 ຂຶ້ນໄປທຸກວິຊາ ແລະຄະແນນສະເລ່ຍ 6 ຂຶ້ນໄປ ຊຶ່ງໄດ້ຮັບການຍ້ອງຍໍປະເພດ III ຈຳນວນ 54 ຄົນ, ນັກຮຽນທີ່ສອບເສັງໄດ້ຄະແນນ 7 ທຸກວິຊາ ແລະ ຄະແນນສະເລ່ຍ 7 ຂຶ້ນໄປໄດ້ຮັບການຍ້ອງຍໍປະເພດ II ຈຳນວນ 259 ຄົນ,ນັກຮຽນສອບເສັງໄດ້ຄະແນນ 7 ທຸກວິຊາ ແລະ ຄະແນນສະເລ່ຍ 8 ຂຶ້ນໄປໄດ້ຮັບການຍ້ອງຍໍປະເພດ I ຈຳນວນ 75 ຄົນ, ພິເສດຍັງມີນັກຮຽນ ມ7 ທີ່ໄດ້ເຂົ້າຮ່ວມການສອບເສັງລະດັບຊາດຄື: ນາງ ອຸ້ມພາພອນ ສີພະຈັນ ຈາກໂຮງຮຽນມິດຕະພາບຄຳມ່ວນ-ກວາງ ບິ່ງສອບເສັງໃນວິຊາຟີຊິກສາດຊຶ່ງໄດ້ຮັບທຶນເຂົ້າຮຽນລະດັບມະຫາວິທະຍາໄລຢູ່ພາຍໃນປະເທດ.

--------

ໂດຍ: ກອງຄຳ

แชร์