ໂຄງການຝຶກອົບຮົມວິຊາຊີບສ້າງວຽກເຮັດງານທຳໃຫ້ໄວໜຸ່ມຜູ້ດ້ອຍໂອກາດ

  ວັນທີ 25 ສິງຫາ ຜ່ານມາທີ່ຫ້ອງປະຊຸມຂອງຫ້ອງການກະສິກຳ ແລະປ່າໄມ້ ເມືອງຫົງສາ ໄດ້ຈັດກອງປະຊຸມໂຄສະນາຮັບນັກຮຽນລະດັບ 1 ພາຍໃຕ້ໂຄງການຝຶກອົບຮົມວິຊາຊີບ ແລະສະໜັບສະໜູນການມີວຽກເຮັດງານທຳ (VTESS) ໂດຍການເປັນປະທານຂອງທ່ານ ປ່ຽນ ຈິນດາ ຫົວໜ້າຫ້ອງວ່າການເມືອງ, ທ່ານ ທອງດີ ເນົາວັນເພັງ ຮອງອຳນວຍການໂຮງຮຽນເຕັກນິກ-ວິຊາຊີບແບບປະສົມແຂວງໄຊຍະບູລີພ້ອມດ້ວຍທີມງານ, ມີຕາງໜ້າຜູ້ປະສານງານຫຼັກຂອງໂຄງການ, ຂະແໜງການທີ່ກ່ຽວຂ້ອງຂອງເມືອງ ແລະນາຍບ້ານເທສະບານ ເຂົ້າຮ່ວມ.

  ທ່ານ ທອງດີ ເນົາວັນເພັງ ໃຫ້ຮູ້ວ່າ: ໂຄງການຝຶກອົບຮົມວິຊາຊີບ ແລະສະໜັບສະໜູນການມີວຽກເຮັດງານທຳ (VTESS) ແມ່ນມີເປົ້າໝາຍເລັ່ງໃສ່ເພື່ອສະໜອງ ການຝຶກອົບຮົມວິຊາຊີບທີ່ສອດ ຄ່ອງກັບຄວາມຕ້ອງການຂອງຕະຫຼາດແຮງງານໂດຍສຸມໃສ່ກຸ່ມເປົ້າໝາຍທີ່ເປັນໄວໜຸ່ມຜູ້ດ້ອຍໂອກາດ, ຊົນເຜົ່າ, ຜູ້ທຸກຍາກ, ບໍ່ຈຳກັດເພດທີ່ນອນຢູ່ໃນເກນອາຍຸລະຫວ່າງ 15-35 ປີ, ທີ່ຮຽນຈົບຊັ້ນປະຖົມແຕ່ບໍ່ຈົບຊັ້ນມັດທະຍົມສຶກສາຕອນຕົ້ນ, ເພື່ອໃຫ້ເຂົາເຈົ້າມີວຽກເຮັດງານທຳ, ສາມາດປະກອບອາຊີບດ້ວຍຕົວເອງ ແລະໄດ້ຮັບການສຶກສາຮໍ່າຮຽນໃຫ້ມີວິຊາອາຊີບຊຶ່ງໂຄງການດັ່ງກ່າວນີ້ແມ່ນຈະໄດ້ເລີ່ມແຕ່ເດືອນຕຸລາ ປີ 2020 ຮອດທ້າຍປີ 2023ຈຶ່ງຈະສໍາເລັດ.

  ສໍາລັບໂຮງຮຽນເຕັກນິກ-ວິຊາຊີບແບບປະສົມແຂວງໄຊຍະບູລີປະກອບມີ 5 ສາຂາອາຊີບຄື: ການຕິດຕັ້ງໄຟຟ້າໃນອາຄານ,ການສ້ອມແປງເຄື່ອງຈັກ,ຊ່າງກໍ່-ຊ່າງໂບກ, ປູກຝັງ ແລະລ້ຽງສັດ, ນອກນັ້ນກໍ່ຍັງມີສາຂາອື່ນໆຕື່ມອີກ, ໄລຍະຂອງການຮຽນລະດັບໃບປະກາດສະນີຍະບັດຊັ້ນຕົ້ນລະດັບ 1 ແມ່ນໃຊ້ເວລາ 3 ເດືອນ, ລະດັບ 2 ແມ່ນໃຊ້ເວລາ 6 ເດືອນ, ລະດັບ 3 ແມ່ນໃຊ້ເວລາ 9 ເດືອນ, ນອກຈາກນີ້ທາງໂຄງການຈະໄດ້ສະໜັບສະໜູນຄ່າເບ້ຍລ້ຽງປະຈຳເດືອນ,ເຄື່ອງແບບ ແລະຄ່າອຸປະກອນໃນການຝຶກອົບຮົມ, ຄ່າເດີນທາງໄປ-ກັບ, ຄ່າຫໍພັກຂອງສຳມະນາກອນ ແລະຄ່າເບ້ຍລ້ຽງໃນໄລຍະຝຶກງານ.

 

แชร์