ທົບທວນ ການປະຕິບັດໂຄງການສົ່ງເສີມ ເດັກນ້ອຍເຂົ້າຮຽນໃນຊັ້ນປະຖົມ

 ພະແນກສຶກສາທິການ ແລະກີລາແຂວງສະຫວັນນະເຂດຮ່ວມກັບອົງການບັນເທົາທຸກຄາໂຕລິກ (CRS) ປະຈໍາ ສປປ ລາວ ໄດ້ຈັດກອງປະຊຸມທົບທວນຄືນການ ຈັດຕັ້ງປະຕິບັດໂຄງການສົ່ງເສີມໃຫ້ເດັກນ້ອຍທຸກຄົນໄດ້ເຂົ້າຮຽນໃນຊັ້ນປະຖົມສຶກສາໄລຍະທີ II (LEAPS II) ຂອງອົງການ CRSໄດ້ຈັດຂຶ້ນໃນວັນທີ 24 ສິງຫາ ຜ່ານມາ ທີ່ຫ້ອງປະຊຸມຂອງພະແນກສຶກສາທິການ ແລະກີລາແຂວງ ໃຫ້ກຽດເປັນປະທານຂອງທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະກີລາ, ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະກີລາແຂວງ, ມີບັນດາພະນັກງານພາຍໃນພະແນກ, ຕົວແທນຈາກເມືອງ 7 ເມືອງເປົ້າໝາຍເຂົ້າຮ່ວມ.

 ທ່ານ ນາງ ຄໍນີເລຍ ເຊຈ ຜູ້ອໍານວຍການໂຄງການ LEAPS II ໃຫ້ຮູ້ວ່າ: ໂຄງການນີ້ແມ່ນເລີ່ມດໍາເນີນມາແຕ່ປີ 2012 ພາຍໃຕ້ການ ຊ່ວຍເຫຼືອລ້າຈາກກະຊວງກະສິກໍາປະເທດສະຫະລັດອາເມລິກາ (USDA) ເພື່ອສົ່ງເສີມໃນດ້ານ ອາຫານ ແລະໂພຊະນາການຂອງ ເດັກ, ຜ່ານມາໂຄງການ(LEAPS) ໄດ້ສະໜອງຄາບເຂົ້າຈໍານວນ 22 ລ້ານກວ່າຄາບ, ໃຫ້ນັກຮຽນຫຼາຍ ກວ່າ 40.000 ຄົນ, ໃນ 7 ເມືອງເປົ້າໝາຍຢູ່ແຂວງສະຫວັນນະເຂດ ຄື: ເມືອງອາດສະພອນ, ອຸທຸມ ພອນ, ພະລານໄຊ, ພີນ, ວິລະບູລີ, ເຊໂປນ ແລະເມືອງນອງ, ນອກ ຈາກນີ້ທາງໂຄງການຍັງໄດ້ສະໜອງອຸປະກອນ ແລະການຝຶກອົບ ຮົມກ່ຽວກັບການຮູ້ໜັງສື, ເຄື່ອງ ຊ່ວຍຄໍ້າຊູເດັກພິການ ແລະອື່ນໆ, ຊຶ່ງໃນປີ 2020-2021 ນີ້, ເປັນ ຊ່ວງໄລຍະທ້າຍໂຄງການ ເເລະຢູ່ ໃນຊ່ວງກະກຽມປ່ຽນຖ່າຍມອບ-ຮັບໂຄງການໃຫ້ແກ່ລັດຖະບານ.

 ທ່ານ ນາງ ຂັນທະລີ ສີຣິພົງພັນ ໄດ້ກ່າວສະແດງຄວາມຂອບໃຈຕໍ່ອົງການ CRS ກໍ່ຄືກະຊວງກະສິກໍາປະເທດສະຫະລັດອາເມລິກາທີ່ໄດ້ໃຫ້ການຊ່ວຍເຫຼືອຕະຫຼອດມາພ້ອມທັງສະແດງຄວາມເປັນຫ່ວງເປັນໃຍຕໍ່ການປ່ຽນແປງທີ່ຈະມາຮອດໃນມໍ່ໆນີ້ເນື່ອງຈາກວ່າໃນສົກຮຽນ 2020-2021 ທີ່ຈະມາເຖິງນີ້, ເປັນຊ່ວງໄລຍະກະກຽມປ່ຽນຖ່າຍມອບ-ຮັບໂຄງການໃຫ້ແກ່ລັດຖະບານ ຊຶ່ງຍັງມີບາງບັນ ຫາທີ່ຍັງຄົງຄ້າງດັ່ງນັ້ນ ຈຶ່ງຮຽກຮ້ອງໃຫ້ບັນດາພາກສ່ວນທີ່ກ່ຽວຂ້ອງຈົ່ງປະສານສົມທົບກັນໃຫ້ລະອຽດຖີ່ຖ້ວນເພື່ອສ້າງຄວາມສະດວກຂອງຜູ້ທີ່ຈະສືບຕໍ່ໂຄງການດັ່ງກ່າວ.

--------

ໜັງສືພິມເສດຖະກິດ-ສັງຄົມ

แชร์