ເຊກອງ ສະຫຼອງວັນສ້າງຕັ້ງແນວລາວສ້າງຊາດຄົບຮອບ 70 ປີ

  ແຂວງເຊກອງ ໄດ້ຈັດການສະເຫຼີມສະຫຼອງວັນສ້າງຕັ້ງແນວລາວສ້າງຊາດຄົບຮອບ 70ປີ (13 ສິງຫາ 1950-13 ສິງຫາ 2020) ຂຶ້ນວັນທີ 21ສິງຫາ2020, ທີ່ສະໂມສອນແຂວງ,ໂດຍພາຍໃຕ້ການເປັນປະທານຂອງທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ, ໂດຍມີພຣະເຖຣະ-ນຸເຖຣະ,ມີແນວລາວສ້າງຊາດແຂວງ-ເມືອງ ແລະພະແນກການອ້ອມຂ້າງແຂວງ, ພະນັກງານ, ທະຫານ, ຕໍາຫຼວດ, ພະນັກງານບໍານານ ແລະຜູ້ຊົງຄຸນວຸດທິເຂົ້າຮ່ວມຢ່າງຫຼວງຫຼາຍ.
   ຈຸດປະສົງເພຶ່ອເຮັດໃຫ້ພະນັກງານ, ສະມາຊິກພັກ, ປະຊາຊົນບັນດາເຜົ່າໄດ້ພ້ອມກັນຫວນຄືນມູນເຊື້ອປະຫວັດຄວາມເປັນມາກໍຄືຜົນງານອັນພົ້ນເດັ່ນ, ຜົນສຳເລັດ ຂອງອົງການແນວລາວສ້າງຊາດໃນການຊີ້ນຳໆພາຂະບວນການຕໍ່ສູ້ຕ້ານພວກລ່າເມືອງຂຶ້ນທັງແບບເກົ່າ ແລະແບບໃໝ່ຊຶ່ງມີມູນເຊື້ອໃນການເຕົ້າໂຮມກ້ອນກຳລັງສຳ ພັນ ທະພາບລະຫວ່າງຊົນຊັ້ນກຳມະກອນ-ຊາວກະສິກອນ,ບັນດາກຳລັງການເມືອງການຈັດຕັ້ງສັງຄົມຕ່າງໆ,ສຳພັນພິເສດກັບກອງທັບ ແລະປະຊາຊົນຫວຽດນາມ, ສຳພັນ 3 ຊາດອິນໂດຈີນ ຈົນໄດ້ຮັບໄຊຊະນະຢ່າງສົມບູນ.
 ທ່ານ ດາວວີ ສວຍທະລັງສີ ຫົວໜ້າໂຄສະນາອົບຮົມແຂວງໄດ້ຜ່ານປະຫວັດການກໍາເນີດ ແລະການເຕີບໃຫຍ່ຂະຫຍາຍຕົວຂອງອົງການຈັດຕັ້ງແນວລາວສ້າງຊາດ,ປະ ຫວັດມູນເຊື້ອການຕໍ່ສູ້ກູ້ຊາດອັນພິລະອາດຫານຂອງແນວລາວສ້າງຊາດທີ່ມີພາລະບົດບາດ ແລະຜົນງານອັນໂດດເດັ່ນໃນໄລຍະຜ່ານມາຈົນເຖິງປະຈຸບັນ; ຊຶ່ງນັບແຕ່ປີ 1950-1956 ໃນສະໄໝນັ້ນໄດ້ໃສ່ຊື່ວ່າແນວລາວອິດສະຫຼະໄດ້ປະກອບສ່ວນຕໍ່ສູ້ເອົາຊະນະຈາກລັດທິລ່າເມືອງຂຶ້ນແບບເກົ່າ, ໄດ້ເຕົ້າໂຮມປັບປຸງ ແລະຂະຫຍາຍກຳລັງປະຕິວັດ, ແຕ່ປີ 1956-1979 ໄດ້ປ່ຽນຊື່ມາເປັນແນວລາວຮັກຊາດໄລຍະນີ້ແມ່ນມີການຕໍ່ສູ້ ແລະມີຫຼາຍບາດລ້ຽວໃນການຕໍ່ຕ້ານກັບຈັກກະພັດອາເມລິກາ ແລະໄດ້ຮັບໄຊຊະນະຢ່າງສົມບູນ, ນັບແຕ່ປີ 1979 ຈົນເຖິງປະຈຸບັນຄະນະກຳມະການແນວລາວສ້າງຊາດແຕ່ລະຂັ້ນໄດ້ຕັ້ງໜ້າເຕົ້າໂຮມຄວາມສາມັກຄີ, ປຸກລະດົມ, ສຶກສາອົບຮົມການເມືອງແນວຄິດປະຊາຊົນບັນດາເຜົ່າທຸກຊັ້ນຄົນປະຕິບັດ 2 ໜ້າທີ່ຍຸດທະສາດກໍ່ຄືພາລະກິດປົກປັກຮັກສາ ແລະສ້າງສາພັດທະນາປະເທດຊາດ.


 ຕອນທ້າຍທ່ານ ເຫຼັກໄຫຼ ສີວິໄລ ໄດ້ຮຽກຮ້ອງມາຍັງບັນດາທ່ານກໍາມະການແນວລາວສ້າງຊາດຂັ້ນຕ່າງໆຈົ່ງສືບຕໍ່ສຶກສາອົບຮົມເຕົ້າໂຮມຄວາມສາມັກຄີປອງດອງບັນດາເຜົ່າພາຍໃນທ້ອງຖິ່ນເຮົາໃຫ້ມີຄວາມໜັກແໜ້ນ, ເຂັ້ມແຂງ, ຕ້ານປາກົດການຫຍໍ້ທໍ້ໃນສັງຄົມທີ່ເກີດຂຶ້ນໃນສັງຄົມທີ່ຫວັງມ້າງເພຄວາມສາມັກຄີພາຍໃນຂອງພວກເຮົາ, ເອົາໃຈໃສ່ສ້າງຂະບວນການ, ສ້າງຄອບຄົວ ແລະບ້ານສາມັກຄີປອງດອງໃຫ້ເພີ່ມຂຶ້ນເພື່ອສ້າງເງື່ອນໄຂໃຫ້ເມືອງ ແລະແຂວງໄດ້ຮັບຮອງເປັນເມືອງສາມັກຄີປອງດອງໃນຕໍ່ ໜ້າ, ສືບຕໍ່ເສີມຂະຫຍາຍມູນເຊື້ອຄວາມສາມັກຄີບັນດາເຜົ່າ,ນໍ້າໃຈເສຍສະຫຼະອັນສູງສົ່ງຂອງບັນພະບູລຸດກໍຄືການນໍາລຸ້ນກ່ອນຂອງແຂວງເຮົາທີ່ໄດ້ເສຍສະລະຂອງຕົນເພື່ອຂໍຄວາມເປັນທໍາ ແລະຄວາມເປັນເອກະລາດຂອງຊາດຕົນເອົາໃຈໃສ່ຄຸ້ມຄອງສາສະໜາໃຫ້ເຂັ້ມແຂງຂຶ້ນຕື່ມ, ເຊີດຊູຄວາມເປັນແບບຢ່າງນໍາໜ້າໃນທຸກດ້ານ, ນໍາພາມະຫາຊົນປະຕິບັດມະຕິຕ່າງໆຂອງຊາດຂອງພັກກໍຄືຂອງສູນກາງແນວລາວສ້າງຊາດວາງອອກໃຫ້ປາກົດຜົນເປັນຈິງໃນຕໍ່ໜ້າ.

------------

ຂ່າວ: ພຸດທະສອນ  

แชร์