ໂຮງໝໍແຂວງໄຊສົມບູນສະຫຼຸບຜົນງານເຄິ່ງປີ

ກອງປະຊຸມສະຫຼຸບຜົນງານ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍປີ 2020 ຂອງໂຮງໝໍແຂວງໄຊສົມບູນໄດ້ຈັດຂຶ້ນໃນວັນທີ 25 ສິງຫາຜ່ານມາ ທີ່ໂຮງໝໍດັ່ງກ່າວພາຍໃຕ້ການເປັນປະທານຂອງທ່ານ ດຣ ຢ່າງຮື ຊາວາ ອຳນວຍການໂຮງໝໍແຂວງ, ເປັນກຽດເຂົ້າຮ່ວມໂດຍທ່ານ ແດງ ປະທຸມທອງ ຮອງເຈົ້າແຂວງ ແລະ ທ່ານ ດຣ ບົວເກດ ວົງປະເສີດ ຫົວໜ້າພະແນກສາທາລະນະສຸກແຂວງ, ມີແຂກຖືກເຊີນພ້ອມດ້ວຍພະນັກງານ-ແພດໝໍພາຍໃນໂຮງໝໍແຂວງ.
   ທ່ານ ດຣ ຢ່າງຮື ຊາວາ ອຳນວຍການໂຮງໝໍແຂວງໄດ້ຜ່ານບົດສະຫຼຸບຜົນງານການເຄື່ອນໄຫວວຽກງານຮອບດ້ານ 6ເດືອນຕົ້ນປີ ແລະທິດທາງແຜນການ 6ເດືອນ ທ້າຍປີ 2020 ຊຶ່ງຕະຫຼອດໄລຍະ 6 ເດືອນຕົ້ນປີທີ່ຜ່ານມາໂຮງໝໍແຂວງໄຊສົມບູນໄດ້ຈັດຕັ້ງປະຕິບັດວຽກງານຂອງຕົນສໍາເລັດຫຼາຍດ້ານເປັນຕົ້ນ: ວຽກງານບໍລິຫານ ສັງລວມ-ແຜນການ ແລະ ການຄຸ້ມຄອງ, ວຽກງານຈັດຕັ້ງ- ພະນັກງານ, ວຽກງານກວດກາ, ວຽກງານການເງິນ ແລະ ປະກັນສຸຂະພາບ, ວຽກງານບໍລິການການແພດ ແລະພະຍາບານ, ວຽກງານຜ່າຕັດ, ວຽກງານພົວພັນການຮ່ວມມື,ວຽກງານການເຝົ້າລະວັງ ແລະຄຸ້ມຄອງການຕິດເຊື້ອຕາມສະຖານທີ່ບໍລິການຊຶ່ງໄດ້ເຝົ້າລະວັງຢ່າງໃກ້ຊິດບັນດາພະຍາດທີ່ກໍາລັງລະບາດຢູ່ຕ່າງປະເທດ ແລະ ຢູ່ ສປປ ລາວ ເຊັ່ນ: ພະຍາດໂຄວິດ-19 ທີ່ລະບາດຢ່າງກວ້າງຂວາງໂຮງໝໍແຂວງໄດ້ມີການກະກຽມຄວາມພ້ອມຫຼາຍດ້ານຊຶ່ງໄດ້ແຕ່ງຕັ້ງທິມແພດຂອງໂຮງໝໍເພື່ອຮັບມືກັບພະຍາດໂຄວິດ-19, ໂດຍໄດ້ຕັ້ງຈຸດຄັດກອງເພື່ອຄັດຄົນເຈັບທີ່ມີອາການຄ້າຍຄືກັບນິຍາມຂອງພະຍາດໂຄວິດ-19 ແລະ ຄົນເຈັບທົ່ວໄປພ້ອມນີ້ຍັງໄດ້ໂຄສະນາສຸຂະສຶກສາພາຍໃນສະຖານທີ່ບໍລິການ ແລະ ຜ່ານສື່ຕ່າງໆ ກ່ຽວກັບຜົນຮ້າຍ ແລະ ວິທີປ້ອງກັນຕົວຂອງພະຍາດດັ່ງກ່າວໃຫ້ພະນັກງານ-ທະຫານຕໍາຫຼວດ ແລະປະຊາຊົນບັນດາເຜົ່າໄດ້ຮັບຮູ້ ແລະເຂົ້າໃຈຢ່າງທົ່ວເຖິງ.

  ນອກຈາກຜົນສໍາເລັດທີ່ຍາດມາໄດ້ນັ້ນທາງໂຮງໝໍແຂວງກໍ່ຍັງມີຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. ຈາກນັ້ນຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນປະກອບຄໍາຄິດ-ຄໍາເຫັນໃສ່ບົດສະຫຼຸບເພື່ອເຮັດໃຫ້ເນື້ອໃນມີຄວາມຖືກຕ້ອງ, ຄົບຖ້ວນ ແລະສອດຄ່ອງກັບສະພາບຄວາມເປັນຈິງ.
  ໃນກອງປະຊຸມຍັງໄດ້ປະດັບຫຼຽນໄຊແຮງງານຊັ້ນ II-III ຂອງປະທານປະເທດ, ຫຼຽນກາແຮງງານ ແລະໃບຍ້ອງຍໍຂອງລັດຖະບານ, ໃບຍ້ອງຍໍຂອງລັດຖະມົນຕີ ກະ ຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ,ໃບຍ້ອງຍໍຂອງທ່ານເຈົ້າແຂວງມອບໃຫ້ພະນັກງານຜູ້ທີ່ມີຜົນງານ,ຄຸນງາມຄວາມດີປະກອບສ່ວນດ້ານເຫື່ອແຮງສະຕິ ປັນຍາເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດກໍ່ຄືແຂວງໄຊສົມບູນຕະຫຼອດໄລຍະ 5 ປີ ທີ່ຜ່ານມາ ໂດຍການມອບຂອງທ່ານ ແດງ ປະທຸມທອງ ຮອງເຈົ້າແຂວງ, ທ່ານ ບົວເກດ ວົງປະເສີດ ຫົວໜ້າພະແນກສາທາລະນະສຸກແຂວງ ແລະທ່ານ ດຣ ຢ່າງຮື ຊາວາ ອໍານວຍການໂຮງໝໍແຂວງຢ່າງເປັນຂະບວນການ ຟົດຟື້ນ ແລະມີຄວາມໝາຍ-ຄວາມສໍາຄັນ.

แชร์