ນະຄອນໄກສອນ ພົມວິຫານເປີດຂະບວນເກັບຄ່າທຳນຽມທາງ

   ໂດຍປະຕິບັດຕາມລັດຖະບັນຍັດຂອງປະທານປະເທດວ່າດ້ວຍຄ່າທໍານຽມທາງສະບັບເລກ ທີ 01/ ປປທ, ລົງວັນທີ 20 ກັນຍາ 2017 ແລະ ອີງຕາມການຄົ້ນຄວ້າ ຕົກລົງເຫັນດີເປັນເອກະພາບຂອງຄະນະການນຳຂອງນະຄອນ ແລະ ຄະນະຫ້ອງການສ່ວຍສາອາກອນໄດ້ຮ່ວມກັບທະນາຄານການຄ້າຕ່າງປະເທດລາວມະຫາຊົນຈັດພິທີເປີດຂະບວນການເກັບຄ່າທໍານຽມທາງ ແລະເສຍພາສີທີ່ດິນປະຈໍາປີ 2020 ຂຶ້ນໃນວັນທີ 20 ສິງຫາ ທີ່ ຫ້ອງການບ້ານໄຊຍະພູມ ນະຄອນໄກສອນ ພົມວິຫານ, ໂດຍການເຂົ້າຮ່ວມຂອງທ່ານ ສົມໜາຍ ສົງວິໄລ ຮອງເຈົ້ານະຄອນ ໄກສອນພົມວິຫານ, ທ່ານ ຄໍາພຽນ ມາດນີວົງ ຫົວໜ້າຫ້ອງການສ່ວຍສາອາກອນປະຈຳນະຄອນ, ມີບັນດາພະນັກງານວິຊາການທີ່ກ່ຽວຂ້ອງຈາກໜ່ວຍງານສ່ວຍສາອາກອນປະຈໍານະຄອນ ແລະທະນາຄານການຄ້າຕ່າງປະເທດລາວມະຫາຊົນສາຂາແຂວງສະຫວັນນະເຂດ.
  ທ່ານ ຄໍາພຽນ ມາດນີວົງ ກ່າວວ່າ: ການສ້າງຂະບວນການໃນຄັ້ງນີ້ແມ່ນມີ 6 ບ້ານເຂົ້າຮ່ວມຄື: ບ້ານໄຊຍະພູມ, ໄຊຍະມຸງຄຸນ, ລັດຕະນະລັງສີໃຕ້, ລັດຕະນະລັງສີ ເໜືອ, ລາດຊະວົງໄຊ ແລະບ້ານທ່າແຮ່ທັງນີ້ກໍ່ເພື່ອເປັນການເຊີນຊວນປຸກລະດົມບຸກຄົນ, ນິຕິບຸກຄົນ, ບໍລິສັດ, ອົງການຈັດຕັ້ງ ລວມທັງພາກລັດ ແລະເອກະຊົນຜູ້ທີ່ນຳໃຊ້ລົດ, ໃຊ້ຖະໜົນບໍ່ວ່າຈະເປັນລົດຈັກ ແລະລົດໃຫຍ່ປະເພດຕ່າງໆພາຍໃນແຂວງສະຫວັນນະເຂດເວົ້າລວມ,ເວົ້າສະເພາະກໍ່ຄືພາຍໃນນະຄອນເຂົ້າມາເສຍພັນທະຄ່າທຳ ນຽມທາງ ແລະເສຍພາສີທີ່ດິນເພື່ອມອບເຂົ້າງົບປະມານແຫ່ງລັດຂອງແຂວງປະຈຳປີ 2020 ໃຫ້ບັນລຸຕາມແຜນການທີ່ວາງໄວ້.
  ສຳລັບຢູ່ນະຄອນແມ່ນມີໜ່ວຍບໍລິການເກັບຄ່າທຳນຽມທາງ ແລະເສຍພາສີທີ່ດິນຢູ່ທະນາຄານການຄ້າຕ່າງປະເທດລາວມະຫາຊົນ ຫຼືຈ່າຍຜ່ານລະບົບ BCEL ONE ກໍ່ໄດ້ ແລະຍັງມີໜ່ວຍງານບໍລິການເຄື່ອນທີ່ຂອງນະຄອນທີ່ໃຫ້ບໍລິການໄປຕາມກຸ່ມບ້ານຕ່າງໆພາຍໃນນະຄອນລວມທັງໝົດ 13 ກຸ່ມ, ຊຶ່ງຈະໄດ້ເຮັດໜ້າທີ່ເຄື່ອນໄຫວໃຫ້ບໍລິການໃນກຸ່ມບ້ານລະ 1 ວັນ ເພື່ອອຳນວຍຄວາມສະດວກໃຫ້ກັບປະຊາຊົນຜູ້ທີ່ບໍ່ມີເວລາຈະເຂົ້າໄປເສຍຄ່າທຳນຽມທາງ ແລະເສຍພາສີທີ່ດິນຜ່ານລະບົບທະນາຄານດ້ວຍຕົນເອງ.

แชร์