ເມືອງບົວລະພາ ມອບໄກ່ໃຫ້ປະຊາຊົນ 6 ບ້ານເປົ້າໝາຍ

   ຫ້ອງການກະສິກໍາ-ປ່າໄມ້ ເມືອງໆບົວລະພາ ແຂວງຄຳມ່ວນ ໄດ້ມອບໄກ່ໃຫ້ກັບພໍ່ເມ່ປະຊາຊົນ 6 ບ້ານຄື: ບ້ານໂສຍ, ບ້ານໂພນສັງໄພ, ບ້ານກະແຕ້, ບ້ານແກ້ງວັກ, ບ້ານກາງ, ແລະບ້ານແກ້ງຍາລວນ ເມືອງບົວລະພາ, ຊຶ່ງໄດ້ຮັບຈາກລັດຖະບານລາວເພື່ອຊ່ວຍເຫຼືອຄອບຄົວທີ່ຖືກຜົນກະທົບຈາກໄພພິບັດໃນປີ 2019 ຜ່ານມາ.

  ພິທີມອບ-ຮັບໄດ້ຈັດຂຶ້ນໃນວັນທີ 17 ສິງຫາຜ່ານມາ ໃຫ້ກຽດມອບໄກ່ຈຳນວນ 441 ໂຕ ໂດຍແມ່ນ ທ່ານ ຄຳຮູ້ ວົງພະຈັນ ຫົວໜ້າຫ້ອງການກະສິກຳ ແລະປ່າໄມ້ ເມືອງເປັນຜູ້ມອບ ແລະ ຮັບໂດຍນາຍບ້ານ 6 ບ້ານເປົ້າໜາຍ, ໂດຍທ່ານ ບຸນກວ້າງ ແກ້ວບຸນຍົງ ເຈົ້າເມືອງໆບົວລະພາ ພ້ອມດ້ວຍບັນດາພະນັກງານທີ່ກ່ຽວຂ້ອງເຂົ້າ ຮ່ວມເປັນສັກຂີພິຍານ, ນອກຈາກນີ້ທ່ານ ຄຳຮູ້ ວົງພະຈັນ ຫົວໜ້າຫ້ອງການກະສິກຳ ແລະປ່າໄມ້ເມືອງໄດ້ແນະນຳວິທີລ້ຽງໄກ່ ແລະການປົກປັກຮັກສາໄກ່ເປັນຕົ້ນແມ່ນ ເອົາໃຈໃສ່ໃນການສັກຢາຮັກສາໄກ່ຕ້ອງເອົາໃຈໃສ່ຍອດຢາເປັນປົກກະຕິເພື່ອເຮັດໃຫ້ໄກ່ມີພູມຕ້ານທານປອດຈາກເຊື້ອພະຍາດທີ່ຈະເກີດຂຶ້ນຕາມລະດູການ.


   ໃນພິທີດັ່ງກ່າວທ່ານ ບຸນກວ້າງ ແກ້ວບຸນຍົງ ເຈົ້າເມືອງບົວລະພາໄດ້ຮຽກຮ້ອງໃຫ້ພໍ່ແມ່ປະຊາຊົນຕ້ອງເອົາໃຈໃສ່ໃນການປົກປັກຮັກສາເບິ່ງແຍງໄກ່ໃຫ້ເປັນຢ່າງດີເພື່ອ ໃຫ້ມີຜົນຜະລິດທີ່ດີເພື່ອກາຍເປັນສິນຄ້າ ແລະເປັນສະບຽງອາຫານໃຫ້ແກ່ພໍ່ແມ່ປະຊາຊົນໃນອະນາຄົດຕໍ່ໜ້າ.

------------

ຂ່າວ: ບຸນປະພາດ 

แชร์