ລາວພຣາຍ ອິ້ງ ສ້າງວຽກເຮັດງານທຳໃຫ້ຜູ້ເສຍອົງຄະ ຜະລິດເຄື່ອງປະດັບສົ່ງຕ່າງປະເທດ

  ບໍລິສັດ ລາວພຣາຍ (LAO PRIDE INC) ເປັນໜຶ່ງໂຮງງານທີ່ມີຄວາມໝາຍອັນສຳຄັນທີ່ຊ່ວຍສ້າງໂອກາດຊີວິດໃໝ່ໂດຍສະເພາະຜູ້ທີ່ເສຍອົງຄະໄດ້ມີວຽກເຮັດ ງານທຳຊຶ່ງຕະຫຼອດ 10 ປີຜ່ານມາ ຮອດປະຈຸບັນເຮັດຜະລິດກ່ຽວກັບເຄື່ອງປະດັບຫຼູຍັງເປັນທີ່ຍອມຮັບຢູ່ໃນລະດັບສາກົນຢ່າງດີ.
   ທ່ານ ນາງ ດາຣາພົງ ຍຸຕິທຳ ຜູ້ອຳນວຍການບໍລິສັດ ລາວພຣາຍ (LAO PRIDE INC) ໃຫ້ສຳພາດກັບນັກຂ່າວໜັງສືພິມເສດຖະກິດ-ສັງຄົມໃຫ້ຮູ້ວ່າ: ບໍລິສັດ ລາວພຣາຍ ອິ້ງ ແມ່ນໂຮງງານທີ່ເຮັດຜະລິດກ່ຽວກັບເຄື່ອງປະດັບຫຼູເພື່ອອອກໄປຕ່າງປະເທດ, ໂດຍໄດ້ເປີດທຳການຜະລິດມາໄດ້ 10 ກວ່າປີມາແລ້ວ, ຊຶ່ງລູກຄ້າຫຼັກໆແມ່ນສົ່ງອອກໄປປະເທດອາເມລິກາ ແລະອົດສະຕຣາລີ, ສ່ວນໃນການຜະລິດຂອງໂຮງງານຍັງເນັ້ນສົ່ງເສີມ ແລະຊ່ວຍເຫຼືອຜູ້ດ້ອຍໂອກາດໂດຍສະເພາະແມ່ນແມ່ຍິງລາວ ແລະຜູ້ເສຍອົງຄະ, ພ້ອມທັງເປັນການພັດທະນາສະກະຍະພາບຂອງຄົນລາວຕົ້ນຕໍແມ່ຍິງຢູ່ໃນລາວ, ດັ່ງນັ້ນຈຶ່ງເຮັດໃຫ້ແຮງງານ ຫຼື ທີມງານທີ່ເຮັດວຽກກັບບໍລິສັດຈຳ ນວນ 1 ຮ້ອຍກວ່າຄົນ ໃນນີ້ລວມທັງຜູ້ຜະລິດ ແລະ ພະນັກງານຫ້ອງການ, ແຕ່ວ່າ 30-40% ແມ່ນແຮງງານຂອງແມ່ຍິງ ແລະ ອີກ 30% ກໍເປັນແຮງງານຍິງ ແລະແຮງງານຊາຍທີ່ເປັນຄົນເສຍອົງຄະ.


  ທ່ານ ນາງ ດາຣາພົງ ຍຸຕິທຳ ໃຫ້ຮູ້ອີກວ່າ: ປະຈຸບັນແຮງງານທີ່ມີເປັນຫຍັງຈຶ່ງກວມເອົາແຮງງານທີ່ເປັນຄົນເສຍອົງຄະ, ຊຶ່ງທັງນີ້ກໍເພາະວ່າແຮງງານເຫຼົ່ານີ້ມີຄວາມອົດທົນສູງ ແລະຖືກັບວຽກທີ່ເຮັດໂດຍສະເພາະງານທາງດ້ານສີມືທີ່ຕ້ອງການຄວາມລະອຽດອ່ອນ, ແຕ່ພວກເຂົາເຫຼົ່ານີ້ພັດມີຄວາມຊຳນານ, ຊຶ່ງເຫັນໄດ້ຈາກຜົນງານທີ່ ອອກມາແມ່ນດີເກີນຄາດ, ເພາະຈະໃຊ້ຄວາມປານິດ, ມີຄວາມຕັ້ງໃຈ, ສົນໃຈໃນວຽກ, ຫຼົງໄຫຼ ແລະຢາກສ້າງອາຊີບແທ້, ທີ່ສຳຄັນຖືຕາມວິໄສທັດຂອງບໍລິສັດທີ່ຢາກຈະສົ່ງເສີມ ແລະຊ່ວຍເຫຼືອໃຫ້ເຂົາເຈົ້າມີວຽກເຮັດງານທຳ.
  ສຳລັບໃນຕໍ່ໜ້າບໍລິສັດມີແຜນຈະຂະຫຍາຍຖານການຜະລິດເພີ່ມ, ແຕ່ທັງນີ້ທັງນັ້ນກໍຕ້ອງມີການສົ່ງເສີມການສ້າງວຽກເຮັດງານທຳຕື່ມ, ຊຶ່ງໃນນັ້ນເຊື່ອວ່າແມ່ຍິງຈະ ເປັນຫົວໃຈສຳຄັນໃນການສົ່ງເສີມຂອງບໍລິສັດເພື່ອເຮັດແນວໃດໃຫ້ພວກເຂົາເຫຼົ່ານັ້ນໄດ້ມີອາຊີບທີ່ໝັ້ນຄົງ ແລະມີລາຍໄດ້ທີ່ຄົງທີ່ຈາກການເຮັດວຽກນຳພວກເຮົາ.
  ການສຶກສາເປັນພື້ນຖານສຳຄັນທີ່ແມ່ຍິງຍຸກປະຈຸບັນຕ້ອງມີການສຶກສາເປັນປັດໄຈສຳຄັນຂອງທຸກໆດ້ານ ແລະທຸກຍຸກສະໄໝທີ່ແມ່ຍິງບໍ່ຄວນຖືເບົາເພາະວ່າການສຶກ ສາທັງໃນໂຮງຮຽນ ແລະນອກໂຮງຮຽນ, ຮຽນຮູ້ຈາກປະສົບການ, ຫາຄວາມຮູ້ເພີ່ມເພື່ອສ້າງໂອກາດໃຫ້ກັບຕົວເອງ.

แชร์