ໂຄງການສ້າງເສັ້ນທາງເມືອງທ່າປາງທອງຫາເມືອງຕຸ້ມລານ ຄືບໜ້າ 95%

  ໃນວັນທີ 25 ສິງຫາ 2020 ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດພ້ອມຄະນະພະແນກການອ້ອມຂ້າງທີ່ກ່ຽວຂ້ອງໄດ້ໄປຢ້ຽມຢາມເບິ່ງຄວາມຄືບໜ້າຂອງການກໍ່ສ້າງເສັ້ນທາງແຕ່ເຊບັ້ງນວນ ເມືອງສອງຄອນ ຫາເມືອງທ່າປາງທອງ ແຂວງສະຫວັນນະເຂດ ຫາເມືອງຕຸ້ມລານ ແຂວງສາລະວັນ ມາ ຮອດປະຈຸບັນສາມາດປະຕິບັດໄດ້ ແລ້ວ 95%, ຄາດວ່າຈະໃຫ້ສຳເລັດຕາມແຜນການໃນທ້າຍປີ 2020 ນີ້.
    ຕາມການລາຍງານຂອງຄະນະຮັບຜິດຊອບໂຄງການກໍ່ສ້າງເສັ້ນທາງດັ່ງກ່າວໃຫ້ຮູ້ວ່າ: ທາງແຕ່ເຊບັ້ງນວນ ເມືອງສອງຄອນ ຫາເມືອງທ່າປາງທອງ ແຂວງສະຫວັນນະເຂດ ຫາເມືອງຕຸ້ມລານ ແຂວງສາລະວັນ ໄດ້ຮັບການປັບປຸງຍົກລະດັບໃໝ່ຈາກເສັ້ນທາງດິນເປັນເສັ້ນທາງປູຢາງ 2 ຊັ້ນ ພາຍຫຼັງເສັ້ນທາງດັ່ງກ່າວໄດ້ຊຸດໂຊມ ແລະເປ່ເພໜັກແກ່ຍາວມາເປັນເວລາຫຼາຍປີ;ຄາດຈະໃຫ້ສຳເລັດໃນທ້າຍປີ 2020,ຖ້າຫາກເສັ້ນທາງດັ່ງກ່າວກໍ່ສ້າງສຳເລັດຈະກາຍເປັນເງື່ອໄຂສຳຄັນໃນການພັດທະນາເສດ ຖະກິດ-ສັງຄົມ ກໍ່ຄືການແກ້ໄຂຄວາມທຸກຍາກຂອງປະຊາຊົນ 2 ເມືອງຄື: ເມືອງທ່າປາງທອງ-ຕຸ້ມລານ.


  ໂຄງການດັ່ງກ່າວໄດ້ຮັບການສ້າງຕັ້ງຂຶ້ນພາຍໃຕ້ການຕົກລົງຂອງລັດຖະມົນຕີກະຊວງໂຍທາທິການ ແລະຂົນສົ່ງ, ໂດຍແມ່ນບໍລິສັດອາກຄີເນຍ ອາສໂຊ ຊີເອສ ເປັນທີ່ປຶກສາໂຄງການ, ບໍລິສັດ ນໍລິນໂກ ສປ ຈີນ ເປັນຜູ້ຮັບເໝົາກໍ່ສ້າງ, ຊຶ່ງໜ້າວຽກທີ່ກໍ່ສ້າງປະກອບມີ: ກໍ່ສ້າງເສັ້ນທາງທີ່ມີລວງຍາວທັງໝົດ 90 ກິໂລແມັດ, ສາມາດແລ່ນດ້ວຍຄວາມໄວ 80 ກິໂລແມັດ ຕໍ່ຊົ່ວໂມງ, ຮັບນໍ້າໜັກ 9,1 ໂຕນຕໍ່ເພົາ,ໂດຍທົ່ວໄປໜ້າທາງຢາງມີຄວາມກວ້າງ 7 ແມັດ, ສະເພາະທາງໃນເຂດເທສະບານເມືອງທ່າປາງທອງ 3 ກິໂລແມັດ ແມ່ນມີໜ້າທາງປູຢາງກວ້າງ 9 ແມັດ ຊຶ່ງປະກອບດ້ວຍທາງຄົນຍ່າງ ແລະໄຟເຍືອງທາງ, ກໍ່ສ້າງຂົວເບຕົງ 19 ແຫ່ງ, ມີລວງຍາວ 470 ແມັດ, ກໍ່ສ້າງທໍ່ລະບາຍນໍ້າລອດທາງ, ກໍ່ສ້າງພື້ນຖານໂຄງລ່າງເມືອງທ່າປາງທອງ (ສ້າງສູນຝຶກອົບຮົມເຕັກນິກກະສິກຳເຊສາລະລອງ), ລວມມີມູນຄ່າການກໍ່ສ້າງທັງ ໝົດ 60 ລ້ານໂດລາສະຫະລັດ ທີ່ໄດ້ຮັບການສະໜັບສະໜູນກູ້ຍືມທຶນຈາກບໍລິສັດນໍລິນໂກ ສປ ຈີນ,ຊຶ່ງໄດ້ເຊັນສັນຍາຮັບເໝົາກໍ່ສ້າງກັນໃນວັນທີ 3 ພຶດສະພາ2017 ແລະໄດ້ເລີ່ມລົງມືການກໍ່ສ້າງຕົວຈິງໃນວັນທີ 1 ຕຸລາ 2017, ຄາດວ່າຈະໃຫ້ສຳເລັດໃນວັນທີ 1 ຕຸລາ 2020.


 ປະຈຸບັນການຈັດຕັ້ງປະຕິບັດໂຄງການແມ່ນມີຄວາມຄືບໜ້າແລ້ວ 95 %ໃນນີ້ບັນດາໜ້າວຽກຕ່າງໆກໍໄດ້ສຳເລັດໄປແລ້ວເຊັ່ນ: ວຽກກໍ່ສ້າງຊັ້ນທາງໃນແຕ່ລະຊັ້ນ,ການກໍ່ສ້າງຂົວເບຕົງ 19 ແຫ່ງ,ກໍ່ສ້າງກັນເຈື່ອນຫົວຂົວສຳເລັດ 13ແຫ່ງ, ກໍ່ສ້າງແລະຕິດຕັ້ງຫຼັກປ້ອງກັນໄພ 302 ຕົ້ນ, ກໍ່ສ້າງແລະຕິດຕັ້ງຫຼັກກິໂລແມັດ ໄດ້ 20 ຕົ້ນ, ຕິດປ້າຍຈາລະຈອນ 128 ຕົ້ນ ແລະຕິດຕັ້ງເສົາໄຟເຍື່ອງທາງໃນເທສະບານເມືອງທ່າປາງທອງສຳເລັດ 100%. ສຳລັບວຽກທີ່ຍັງຄ້າງແມ່ນການກໍ່ສ້າງທາງປູຢາງຍາວ 5 ກິໂລແມັດ,ປູຢາງຊັ້ນ 2 ຍາວ 9ກິໂລແມັດ,ກໍ່ສ້າງຮ່ອງລະບາຍນໍ້າຂ້າງທາງຈຸດທີ່ມີຄວາມສ່ຽງຕໍ່ການເຊາະເຈື່ອນ,ສ້າງກັນເຈື່ອນປາກທໍ່ລະບາຍນໍ້າ ແລະຫົວຂົວ, ຕິດຕັ້ງປ້າຍຈາລະຈອນ, ຮາວປ້ອງກັນໄພ ແລະຂີດເສັ້ນແບ່ງຊ່ອງຈາລະຈອນ.
   ໂອກາດນີ້ທ່ານຮອງເຈົ້າແຂວງສະຫວັນນະເຂດ ກໍ່ໄດ້ຮຽກຮ້ອງໃຫ້ພາກສ່ວນທີ່ກ່ຽວຂ້ອງສົມທົບກັບໂຄງການຈົ່ງໄດ້ເອົາໃຈໃສ່ກໍ່ສ້າງໃຫ້ໄດ້ຕາມມາດຕະຖານຂອງການຄິດໄລ່ ແລະເຮັດໃຫ້ສຳເລັດຕາມແຜນການພ້ອມມີການຈັດພິທີມອບ-ຮັບກ່ອນກອງປະຊຸມໃຫຍ່ອົງຄະນະພັກແຂວງສະຫວັນນະເຂດທີ່ຈະມີຂຶ້ນໃນມໍ່ໆນີ້, ທັງນີ້ກໍ່ເພື່ອເປັນຜົນງານອັນໜຶ່ງເພື່ອປະກອບສ່ວນແກ່ການສ້າງຂະບວນການຕ້ອນຮັບກອງປະຊຸມໃຫຍ່ 3 ຂັ້ນ ແລະວັນສຳຄັນຕ່າງໆ, ອຳນາດການປົກຄອງເມືອງກໍ່ຕ້ອງແນະນຳອຳນາດການປົກຄອງບ້ານກໍ່ຄືປະຊາຊົນໃຫ້ນຳໃຊ້ເສັ້ນທາງຢ່າງມີຜົນປະໂຫຍດ ແລະມີການປົກປັກຮັກສາຄຽງຄູ່ກັນໄປເພື່ອນຳໃຊ້ໃຫ້ຍາວນານ.

แชร์