ໄຊສົມບູນ ຍຸບໂຮງງານປຸງແຕ່ງໄມ້ ແລະເຟີນິເຈີ 40 ກວ່າຫົວໜ່ວຍ

  ກອງປະຊຸມປຶກສາຫາລືກ່ຽວກັບການສືບຕໍ່ປະຕິບັດຄໍາສັ່ງເລກທີ 15/ນຍ ຂອງຄະນະສະເພາະກິດ ແຂວງໄຊສົມບູນ ໄດ້ຈັດຂຶ້ນໃນວັນທີ 25 ສິງຫາ 2020 ທີ່ຫ້ອງປະຊຸມພະແນກກະສິກຳ ແລະປ່າໄມ້ແຂວງໂດຍການເປັນປະທານຂອງ ທ່ານ ພອຍຄໍາ ຮຸ່ງບຸນຍວງ ຮອງເຈົ້າ ແຂວງໄຊສົມບູນ,ຫົວໜ້າຄະນະສະເພາະກິດເພື່ອລົງກວດກາ, ຕິດຕາມການເຄື່ອນໄຫວສືບຕໍ່ປະຕິບັດຄໍາສັ່ງເລກທີ 15/ນຍ ໃນຂອບເຂດທົ່ວແຂວງໄຊສົມບູນ, ມີຫົວໜ້າຄະນະຈັດຕັ້ງແຂວງ, ຫົວໜ້າ-ຮອງຫົວໜ້າພະແນກການພ້ອມດ້ວຍຄະນະສະເພາະກິດຂັ້ນແຂວງ, ຂັ້ນເມືອງ 5 ເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.


 ໂອກາດດັ່ງກ່າວ, ທ່ານ ພອຍຄໍາ ຮຸ່ງບຸນຍວງ ໄດ້ມີຄໍາເຫັນຊີ້ນໍາຕໍ່ກອງປະຊຸມຊື່ງທ່ານໄດ້ເນັ້ນໜັກໃຫ້ແຕ່ລະພາກສ່ວນຈົ່ງພ້ອມກັນເອົາໃຈໃສ່ໃນການປະກອບຄໍາຄິດຄໍາເຫັນດ້ວຍຄວາມຮັບຜິດຊອບສູງໂດຍເນັ້ນໃສ່ຈຸດດີ, ຈຸດອ່ອນ ແລະບັນຫາທີ່ຍັງຄົງຄ້າງເພື່ອພ້ອມກັນຄົ້ນຄວ້າຊອກຫາວິທີແກ້ໄຂໃນຕໍ່ໜ້າ.
  ຈາກນັ້ນ, ກອງປະຊຸມໄດ້ຮັບຟັງການຜ່ານບັນດາແຈ້ງການຕ່າງໆທີ່ຕິດພັນກັບການປະຕິບັດຄໍາສັ່ງເລກທີ 15/ນຍ, ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະທຸລະກິດໄມ້, ພ້ອມທັງຮັບຟັງລາຍງານກ່ຽວກັບຈັດຕັ່ງປະຕິບັດຄໍາສັ່ງເລກທີ 15/ນຍ ຢູ່ແຂວງໄຊສົມບູນ.
  ໃນໄລຍະຜ່ານມາຄະນະສະເພາະກິດຂັ້ນແຂວງ ແລະເມືອງໄດ້ເອົາໃຈໃສ່ຈັດຕັ້ງປະຕິບັດວຽກງານຕາມຄໍາສັ່ງສະບັບດັ່ງກ່າວ,ໂດຍສາມາດຮື້ຖອນ ແລະຍຸບເລີກໂຮງງານປຸງແຕ່ງໄມ້,ໂຮງງານເຟີນີເຈີຂະໜາດນ້ອຍຄອບຄົວທີ່ຄັດກັບລະບຽບກົດໝາຍໃນນັ້ນໄດ້ຮື້ຖອນ ແລະຍຸບເລີກໂຮງງານປຸງແຕ່ງໄມ້ຈໍານວນ 8 ຫົວໜ່ວຍ, ໂຮງງານເຟີນີເຈີຂະໜາດນ້ອຍຈໍານວນ 37 ຫົວໜ່ວຍ ພ້ອມທັງຕິດຕາມ, ກວດກາ ແລະ ຄຸ້ມຄອງການເຄື່ອນໄຫວມອບພັນທະອາກອນຂອງໂຮງງານເຄື່ອແຫ່ມຢູ່ບັນດາເມືອງຢ່າງເປັນປົກກະຕິ.


  ທັງນີ້ກໍເພື່ອເປັນການຜັນຂະຫຍາຍຈັດຕັ້ງປະຕິບັດຄໍາສັ່ງເລກທີ 15/ນຍ ໂດຍສະເພາະແມ່ນການຄຸ້ມຄອງຂຸດຄົ້ນໄມ້,ເຄື່ອນຍ້າຍໄມ້,ທຸລະກິດໄມ້ ແລະທຸລະກິດເຄື່ອງປ່າຂອງດົງຕ່າງໆ ໃຫ້ເຄື່ອນໄຫວຖືກຕ້ອງສອດຄ່ອງຕາມລະບຽບກົດໝາຍ, ໂດຍຜ່ານຂະບວນການປຸງແຕ່ງໃຫ້ເປັນຜະລິດຕະພັນສໍາເລັດຮູບທີ່ສາມາດສ້າງມູນຄ່າເພີ່ມສູງ, ນໍາໃຊ້ເຄື່ອງຈັກ ແລະເຕັກໂນໂລຢີທີ່ທັນສະໄໝເພື່ອເຮັດໃຫ້ຜະລິດຕະພັນໄມ້ຢູ່ແຂວງໄຊສົມບູນມີຄຸນນະພາບ ແລະໄດ້ມາດຕະຖານດີຂຶ້ນກວ່າເກົ່າ.

-------------

ຂ່າວ: : ພາພອນ ນະວົງໄຊ  

ຮູບພາບ: #ຫນັງສືພິມເສດຖະກິດສັງຄົມ

แชร์