ຄຳມ່ວນ ປະເມີນຄວາມຄືບໜ້າໂຄງການພັດທະນາຕົວເມືອງທ່າແຂກ

  ກອງປະຊຸມປະເມີນຄວາມຄືບໜ້າຂອງການຈັດຕັ້ງປະຕິບັດໂຄງການພັດທະນາຕົວເມືອງທ່າແຂກຕາມແລວທາງອະນຸພາກຟື້ນແມ່ນໍ້າຂອງ IV ໄດ້ຈັດຂຶ້ນໃນວັນທີ 25 ສິງຫາ 2020 ທີ່ພະແນກໂຍທາທິການ ແລະຂົນສົ່ງແຂວງຄຳມ່ວນໂດຍມີ ທ່ານ ບຸນມີ ພິມມະສອນ ຮອງເຈົ້າແຂວງໆຄຳມ່ວນ, ທ່ານ ວຽງນາມ ດວງພະຈັນ ຫົວໜ້າກົມເຄຫາ ແລະຜັງເມືອງກະຊວງ ຍທຂ, ມີບັນດາຊ່ຽວຊານຈາກໂຄງການ, ພະແນກການ, ຂະແໜງການຕ່າງໆທີ່ກ່ຽວຂ້ອງເຂົ້າຮ່ວມ.


  ໂຄງການພັດທະນາຕົວເມືອງຕາມແລວທາງອະນຸພາກຟື້ນແມ່ນໍ້າຂອງ IV ແມ່ນໂຄງການສົມທົບທຶນລະຫວ່າງທະນາຄານພັດທະນາອາຊີກັບລັດຖະບານແຫ່ງ ສ ປປ ລາວ ຊຶ່ງປະກອບມີ 2 ຕົວ ເມືອງຄື: ເມືອງປາກຊັນ ແຂວງບໍລິຄຳໄຊ ແລະ ເມືອງທ່າແຂກ ແຂວງຄຳມ່ວນລວມມີມູນຄ່າທັງໝົດ 54,06 ລ້ານໂດລາ, ຊຶ່ງມີໄລຍະເວ ລາໃນການຈັດຕັ້ງປະຕິບັດ 5 ປີ (2019-2023)ມີຈຸດປະສົງໃນການເສີມສ້າງໃຫ້ມີການແຂ່ງຂັນຂອງແລວທາງອະນຸພາກຟື້ນແມ່ນໍ້າຂອງໂດຍຜ່ານໂຄງລ່າງພື້ນຖານດ້ານສິ່ງແວດລ້ອມຕົວເມືອງຕາມແລວທາງເສດຖະກິດເໜືອ-ໃຕ້ທີ່ເຊື່ອມ ສປປ ລາວ ກັບ ສປປ ຈີນ, ໄທ ແລະມຽນມາ.


  ສະເພາະການຈັດຕັ້ງປະຕິບັດໂຄງການພັດທະນາຕົວເມືອງທ່າແຂກປະກອບມີ 5 ກິດຈະກໍາຫຼັກຄື: ກໍ່ສ້າງຮ່ອງລະບາຍນໍ້າໃນຕົວເມືອງ 5 ສາຍຮ່ອງ, ມີຄວາມຍາວປະມານ 9 ກິໂລແມັດ,ຕິດຕັ້ງປະຕູນໍ້າ ແລະຈັກດູດນໍ້າ 4 ແຫ່ງ,ກໍ່ສ້າງອ່າງບຳບັດນໍ້າເປື້ອນແບບບໍ່ລວມສູນຂະໜາດນ້ອຍ 4 ແຫ່ງ ສາມາດບຳບັດນໍ້າເປື້ອນໄດ້ປະມານ 200 ແມັດກ້ອນຕໍ່ມື້, ປັບປຸງສະໜາມກຳຈັດຂີ້ເຫຍື້ອແບບສຸຂະນາໄມຊຶ່ງສາມາດບັນຈຸປະມານ 3 ແສນແມັດກ້ອນໃນນີ້ລວມທັງການສ້າງເສັ້ນທາງ, ຄອງລະບາຍນໍ້າ, ຫ້ອງການພ້ອມທັງປະກອບພາຫະນະໃນການເກັບມ້ຽນຂີ້ເຫຍື້ອ,ລົດອັດບົດຂີ້ເຫຍື້ອ,ກໍ່ສ້າງປ້ອງກັນຕາຝັ່ງເຈື່ອນແມ່ນໍ້າຂອງ 4 ແຫ່ງ, ມີຄວາມຍາວປະມານ 4 ກິໂລ ແມັດ, ປັບປຸງຟື້ນຟູບູລະນະໃຈກາງຕົວເມືອງເກົ່າ ແລະອະນຸລັກມໍລະດົກຂອງຕົວເມືອງເພື່ອເປັນສູນກາງການທ່ອງທ່ຽວ, ສົ່ງເສີມການທ່ອງທ່ຽວແບບຍືນຍົງ ແລະປ້າຍບອກທິດທາງການສັນຈອນຕ່າງໆພາຍໃນຕົວເມືອງ.


   ສໍາລັບຄວາມຄືບໜ້າຂອງບັນດາກິດຈະກຳຕ່າງໆ ໂດຍສ່ວນໃຫຍ່ແມ່ນໄດ້ສໍາເລັດໃນການສໍາຫຼວດ, ວັດແທກ, ເກັບກຳຂໍ້ມູນ, ການອອກແບບນຳສະເໜີຊ່ຽວຊານທີ່ປຶກສາເພື່ອກວດກາ ແລະປັບປຸງໃຫ້ແທດເໝາະກັບພື້ນທີ່ຕົວຈິງລວມເຖິງການຄິດໄລ່ມູນຄ່າຊົດເຊີຍໃຫ້ປະຊາຊົນທີ່ຖືກຜົນກະທົບຈາກໂຄງການ.

ສະໜັບສະໜູນໂດຍ: HONDA
  ກອງປະຊຸມຄັ້ງນີ້ບັນດາຜູ້ເຂົ້າຮ່ວມຈາກພາກສ່ວນຕ່າງໆ ຍັງໄດ້ພ້ອມກັນຄົ້ນຄ້ວາປະກອບຄຳຄິດເຫັນເພື່ອແນໃສ່ເຮັດໃຫ້ກິດຈະກຳຕ່າງໆ ຂອງໂຄງການໄດ້ຮັບການຈັດ ຕັ້ງປະຕິບັດຕາມລະດັບຄາດໝາຍ.

-------------

ຂ່າວ: ກອງຄຳ

ຮູບພາບ: #ຫນັງສືພິມເສດຖະກິດສັງຄົມ

แชร์