ເຄິ່ງປີຈໍາປາສັກ ສະໜອງນໍ້າປະປາໃຫ້ປະຊາຊົນໄດ້ 5 ລ້ານກວ່າແມັດກ້ອນ

   ຖືເປັນຜົນງານທີ່ຍາດມາໄດ້ດີພໍສົມຄວນໃນການຈັດຕັ້ງປະຕິບັດການຂະຫຍາຍຕາຂາຍແກ່ຜູ້ຊົມໃຊ້ ແລະການສະໜອງນໍ້າປະປາໃຫ້ກັບປະຊາຊົນໃນແຂວງຈໍາປາສັກ ໃນ 6 ຕົ້ນປີ 2020 ລັດວິສາຫະກິດນໍ້າປະປາແຂວງຈໍາປາສັກສາມາດຕິດຕັ້ງນໍ້າເຂົ້າເຮືອນປະຊາຊົນໄດ້ 1 ພັນກວ່າຫຼັງຄາເຮືອນ ແລະສາມາດຜະລິດນໍ້າເພື່ອຮອງຮັບແກ່ການຊົມໃຊ້ໄດ້ເຖິງ 5 ລ້ານກວ່າແມັດກ້ອນ; ໃນຂະນະທີ່ຜູ້ອໍານວຍການກໍ່ຍັງສະແດງຄວາມກັງວົນເລື່ອງປະລິມານນໍ້າຮົ່ວໄຫຼເສຍຫາຍຫຼາຍພໍສົມຄວນ.
  ທ່ານ ໄກ່ຄໍາ ສຸວັນນະເມທີ ຜູ້ອໍານວຍການລັດວິສາຫະກິດນໍ້າປະປາແຂວງຈໍາປາສັກ, ໄດ້ກ່າວລາຍງານໃນກອງປະຊຸມສະຫຼຸບການນໍາພາຈັດຕັ້ງປະຕິບັດວຽກງານ 6 ເດືອນຕົ້ນປີ ແລະວາງທິດທາງແຜນການທ້າຍປີ 2020 ທີ່ຈັດຂຶ້ນເມື່ອທ້າຍອາທິດຜ່ານມານີ້ວ່າ: ໃນໄລຍະ 6 ເດືອນຕົ້ນປີ 2020 ລັດວິສາຫະກິດນໍ້າປະປາແຂວງຈໍາປາສັກສາມາດຕິດຕັ້ງນໍ້າປະປາເຂົ້າເຮືອນໃຫ້ປະຊາຊົນໄດ້ 1.178 ຫຼັງຄາເຮືອນ, ສາມາດຜະລິດນໍ້າປະປາເພື່ອຮອງຮັບການຊົມໃຊ້ໄດ້ທັງໝົດ 5 ລ້ານ 3 ແສນກວ່າແມັດກ້ອນ,ໄດ້ຈໍາໜ່າຍນໍ້າໄດ້ທັງໝົດ 3 ລ້ານ 7 ແສນກວ່າແມັດກ້ອນ, ມີປະລິມານນໍ້າຮົ່ວໄຫຼ ເສຍຫາຍ 1,6 ລ້ານແມັດກ້ອນ, ຊຶ່ງກວມເອົາ 30% ຂອງຈໍານວນປະລິມານນໍ້າທັງໝົດ, ໃນນີ້ລວມຍອດລາຍຮັບທຸລະກິດໄດ້ 17 ຕື້ກວ່າກີບ, ຜົນກໍາໄລບັນລຸ 1 ຕື້ກວ່າກີບ.
  ສໍາລັບໃນ 6 ເດືອນທ້າຍປີລັດວິສາຫະກິດນໍ້າປະປາແຂວງຈໍາປາສັກແມ່ນຈະໄດ້ສືບຕໍ່ປະຕິບັດແຜນການຄາດໝາຍສູ້ຊົນໃຫ້ໄປຕາມທິດທາງທີ່ວາງໄວ, ປັບປຸງແກ້ໄຂບັນ ຫາການຮົ່ວໄຫຼເສຍຫາຍຂອງນໍ້າປະປາໃຫ້ຫຼຸດນ້ອຍຖອຍລົງ ແລະເພີ່ມຂິດຄວາມສາມາດໃນການໃຫ້ບໍລິການລູກຄ້າໃຫ້ມີຄວາມວ່ອງໄວ, ໂປ່ງໃສ ແລະເປັນທໍາໃຫ້ກັບປະ ຊາຊົນ, ຂະຫຍາຍຖານບໍລິການໄປສູ່ເຂດທີ່ຍັງບໍ່ທັນມີນໍ້າປະປາຊົມໃຊ້ໃຫ້ໄດ້ຫຼາຍກວ່າເກົ່າ.

แชร์