ຮອງປະທານປະເທດ ໂອ້ລົມພະນັກງານຫຼັກແຫຼ່ງແຂວງຫົວພັນ

  ວັນທີ 25 ສິງຫາ 2020 ນີ້, ທ່ານ ພັນຄຳ ວິພາວັນ ຮອງປະທານປະເທດໄດ້ໂອ້ລົມພະນັກງານຫຼັກແຫຼ່ງແຂວງຫົວພັນໂດຍມີຄະນະປະຈຳ,ກຳມະການພັກແຂວງ, ຫົວໜ້າ-ຮອງຫົວໜ້າພະແນກການ, ກົມກອງອ້ອມຂ້າງແຂວງ ແລະເຈົ້າເມືອງ 10 ເມືອງທົ່ວແຂວງເຂົ້າຮ່ວມຮັບຟັງນໍາ.
  ທ່ານ ວັນໄຊ ແພງຊຸມມາ ເຈົ້າແຂວງໆຫົວພັນໄດ້ລາຍງານສະພາບລວມໂດຍຫຍໍ້ກ່ຽວກັບການຈັດຕັ້ງປະຕິບັດ, ວຽກງານພັດທະນາເສດຖະກິດ-ສັງຄົມພາຍໃນແຂວງໃນໄລຍະຜ່ານມາໃຫ້ທ່ານຮອງປະທານປະເທດໄດ້ຮັບຊາບ.


  ຈາກນັ້ນທ່ານຮອງປະທານປະເທດໄດ້ເນັ້ນໜັກໃຫ້ຄະນະພັກ, ອົງການປົກຄອງແຂວງສຸມໃສ່ການກະກຽມດຳເນີນກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ໃຫ້ມີຄວາມພ້ອມຮອບດ້ານ ແລະທັນຕາມເວລາທີ່ໄດ້ກຳນົດໄວ້. ພ້ອມນີ້ທ່ານຍັງໄດ້ຊີ້ນຳໃຫ້ແຕ່ລະອະນຸກຳມະການເປັນຕົ້ນອະນຸກຳມະການເນື້ອໃນ,ອະນຸກຳມະການບຸກຄະລາກອນ ແລະອະນຸກຳມະການຂະບວນການຈົ່ງຮີບຮ້ອນກວດກາຄືນບັນດາໜ້າວຽກຂອງຕົນວ່າອັນໃດທີ່ຍັງເປັນຂໍ້ຄົງຄ້າງ, ອັນໃດທີ່ຍັງບໍ່ທັນບັນລຸຕາມຄາດໝາຍໃຫ້ພ້ອມກັນສືບຕໍ່ປັບປຸງແກ້ໄຂໃຫ້ລະອຽດຈະແຈ້ງ, ຮັດກຸມ ແລະ ສອດຄ່ອງກັບສະພາບຄວາມເປັນຈິງເພື່ອຮັບປະກັນໃຫ້ແກ່ການກະກຽມດຳເນີນກອງປະຊຸມໃຫຍ່ຂອງອົງ ຄະນະພັກແຂວງໄດ້ລຸລ່ວງ ແລະມີຄວາມພ້ອມຮ້ອຍສ່ວນຮ້ອຍ; ທ່ານຮອງປະທານປະເທດໄດ້ເນັ້ນໜັກໃຫ້ຄະນະພັກ, ອົງການປົກຄອງທຸກຂັ້ນຈົ່ງສືບຕໍ່ປັບປຸງແບບແຜນວິທີນຳພາ ແລະແບບແຜນວິທີເຮັດວຽກໃຫ້ເຂົ້າສູ່ລະບຽບຫຼັກການໂດຍຢຶດໝັ້ນຕາມຫຼັກການຂອງພັກຢ່າງເຂັ້ມງວດ ແລະຮຽກຮ້ອງໃຫ້ອະນຸກຳມະການບຸກຄະລາກອນກອງປະຊຸມໃຫຍ່ປັບປຸງໜ້າທີ່ຂອງຕົນຢ່າງລະອຽດອ່ອນ, ຖືສຳຄັນບັນຫາໂຄງປະກອບ, ຮັບປະກັນຄວາມສະຫງົບພາຍໃນຄະນະພັກ ແລະຖັນແຖວສະມາຊິກພັກພ້ອມນັ້ນກໍ່ໃຫ້ເອົາໃຈໃສ່ເຕົ້າໂຮມຄວາມສາມັກຄີພາຍໃນພັກ, ຄວາມສາມັກຄີບັນດາເຜົ່າ ແລະທຸກຊັ້ນຄົນໃນສັງຄົມໃຫ້ເປັນປຶກແຜ່ນແໜ້ນໜາ,ເຊີດຊູຄວາມຮັບຜິດຊອບຂອງຕົນ, ພ້ອມກັນຕີຖອຍປາກົດການຫຍໍ້ທໍ້, ຕ້ານແນວຄິດຄັບແຄບ-ເອື້ອອີງ, ແນວຄິດອະຄະຕິ, ແລະແນວຄິດກຸ່ມກ້ອນບໍ່ໃຫ້ເກີດຂຶ້ນພາຍໃນພັກ ແລະໃນໝູ່ມະຫາຊົນຢ່າງເດັດຂາດ, ຖືຜົນປະໂຫຍດສ່ວນລວມຫຼາຍກວ່າຜົນປະໂຫຍດສ່ວນຕົວ, ຕັ້ງໜ້າປຸກລະດົມຂົນຂວາຍປະຊາຊົນບັນດາເຜົ່າໃຫ້ເປັນເຈົ້າການເຂົ້າຮ່ວມວຽກງານປ້ອງ ກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຢ່າງໜັກແໜ້ນໂດຍຕິດພັນກັບການແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ໄດ້ຮັບການປັບປຸງ ດີຂຶ້ນຢ່າງຕໍ່ເນື່ອງໂດຍຖືເອົາການຊຸກຍູ້ສົ່ງເສີມການຜະລິດເປັນສິນຄ້າຂອງເຂົາເຈົ້າໃຫ້ເປັນຂະບວນການກວ້າງຂວາງເພື່ອສ້າງລາຍຮັບເຂົ້າຄອບຄົວໃຫ້ມີບາດກ້າວດີຂຶ້ນ, ຫຼຸດພົ້ນອອກຈາກຄວາມທຸກຍາກເທື່ອລະກ້າວພ້ອມກັນພັດທະນາແຂວງຫົວພັນໃຫ້ມີຖ່ວງທ່າເຕີບໃຫຍ່ຂະຫຍາຍຕົວຂຶ້ນເລື້ອຍໆ.

--------------

ຂ່າວ: ນິດຖະໜອມ

ຮູບພາບ: #ຫນັງສືພິມເສດຖະກິດສັງຄົມ

แชร์