ຜະລິດຕະພັນທູບກາພູສີ ແລະເຄື່ອງປັ້ນດິນເຜົາບ້ານຈ່ານເໜືອເປັນສິນຄ້າໂອດັອບ

  ຜະລິດຕະພັນທູບກາພູສີ ແລະຫັດຖະກໍາເຄື່ອງປັ້ນດິນເຜົາບ້ານຈ່ານເໜືອ ເມືອງຈອມເພັດ ແຂວງຫຼວງພະບາງ ໄດ້ຖືກຮັບຮອງຈົດເຂົ້າເປັນສິນຄ້າໜຶ່ງເມືອງໜຶ່ງຜະ ລິດຕະພັນແຫ່ງຊາດໃນວັນທີ 21 ສິງຫາ 2020 ນີ້ໂດຍຫ້ອງການອຸດສາຫະກໍາ ແລະ ການຄ້າໄດ້ຈັດພິທີມອບ-ຮັບປ້າຍກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດໃຫ້ກຸ່ມຫັດຖະກໍາປັ້ນດິນເຜົາບ້ານຈ່ານເໜືອ ແລະການຜະລິດທູບກາພູສີ ບ້ານບວມເລົາ ເມືອງຈອມເພັດ ໂດຍໃຫ້ກຽດມອບຂອງທ່ານ ສຳນານ ສົນທະນີ ຫົວໜ້າພະແນກອຸດສາຫະກຳ ແລະ ການຄ້າແຂວງ,ມີທ່ານ ດຣ ນາງ ຈັນດີ ເຢັ່ງວື່ ຮອງເລຂາພັກເມືອງໆຈອມເພັດ,ມີຄະນະຮັບຜິດຊອບຂັ້ນແຂວງ,ເມືອງ, ອົງການຈັດຕັ້ງບ້ານພ້ອມດ້ວຍຜູ້ປະກອບການສອງຫົວໜ່ວຍທຸລະກິດ ແລະປະຊາຊົນບ້ານຈ່ານເໜືອເຂົ້າຮ່ວມ.

 ໃນພິທີຕາງໜ້າຫ້ອງການອຸດສາຫະກໍາ ແລະການຄ້າເມືອງຈອມເພັດໄດ້ຂຶ້ນລາຍໃນການຊຸກຍູ້ສົ່ງເສີ່ມຫົວໜ່ວຍທຸລະກິດຂະໜາດນ້ອຍ-ຂະໜາດກາງໃນການຜະລິດສິນຄ້າໃຫ້ມີຄວາມເຂັ້ມແຂງ ແລະຮັກສາໄດ້ເອກະລັກສະເພາະຂອງຜະລິດຕະພັນຢູ່ເມືອງຈອມເພັດຊຶ່ງອົງການປົກຄອງເມືອງໄດ້ມີການແຕ່ງຕັ້ງຄະນະຮັບຜິດຊອບຂັ້ນເມືອງລົງຊຸກຍູ້ຕິດຕາມ,ຄັດເລືອກໃຫ້ເປັນຕົວແບບໃນການຜະລິດໂດຍໄດ້ກຳນົດເອົາ 2 ຫົວໜ່ວຍເປົ້າໝາຍທີ່ມີຢູ່ໃນເມືອງເປັນຕົ້ນແມ່ນກຸ່ມຫັດຖະກໍາເຄື່ອງປັ້ນດິນເຜົາບ້ານຈ່ານເໜືອ ແລະ ໂຮງງານຫັດຖະກຳຜະລິດ-ຈຳໜ່າຍທູບກາພູສີຂອງທ່ານນາງ ພຸດດາຈັນ ປັນຍາມະນີ ທີ່ຕັ້ງຢູ່ບ້ານບວມເລົາ ເພື່ອສ້າງໃຫ້ກາຍເປັນສິນຄ້າໜຶ່ງ ເມືອງໜຶ່ງຜະລິດຕະພັນ ຫຼືສິນຄ້າໂອດັອບ.

  ຜ່ານການຊຸກຍູ້ສົ່ງເສີມ ແລະປະເມີນທັງສອງຫົວໜ່ວຍທຸລະກິດເຫັນວ່າຄົບຕາມມາດຕະຖານ ແລະເງື່ອນໄຂທີ່ກະຊວງອຸດສາຫະກຳ ແລະການຄ້າວາງອອກ, ຈຶ່ງໄດ້ນຳສະເໜີໃຫ້ຄະນະຄັດເລືອກແຕ່ລະຂັ້ນພິຈາລະນາ ແລະກະຊວງ ອສຄ ຕົກລົງອອກໃບອະນຸຍາດໃຫ້ ກຸ່ມຫັດຖະກຳເຄື່ອງປັ້ນດິນເຜົາ ແລະຫັດຖະກໍາທູບກາພູສີນຳໃຊ້ກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດຢ່າງເປັນທາງການ ແລະ ໂອກາດດຽວກັນນີ້ທ່ານຫົວໜ້າພະແນກອຸດສາຫະກຳ ແລະ ການຄ້າແຂວງໄດ້ມີຄໍາ

ເຫັນ ແລະກ່າວຍ້ອງຍໍຊົມເຊີຍຕໍ່ການຈັດຕັ້ງຂອງເມືອງໃນການເອົາໃຈໃສ່ຊຸກຍູ້ສົ່ງເສີມວຽກງານຂອງຫົວໜ່ວຍທຸລະກິດໃຫ້ສາມາດບັນລຸເປົ້າໝາຍ ແລະສາມາດປະກາດຮັບຮອງເປັນສິນຄ້າໂອດັອບໄດ້ພ້ອມເນັ້ນໃຫ້ຄະນະຮັບຜິດຊອບແຕ່ລະຂັ້ນສືບຕໍ່ເປັນເຈົ້າການເພື່ອຊຸກຍູ້ສົ່ງເສີມ ແລະສ້າງທຸກເງື່ອນໄຂໃນການອຳນວຍຄວາມສະດວກໃຫ້ກັບສອງຫົວໜ່ວຍທຸລະກິດນີ້ໄດ້ຮັບການພັດທະນາ ແລະເຂັ້ມແຂງຂຶ້ນກວ່າເກົ່າ,ພ້ອມສືບຕໍ່ຊຸກຍູ້ຕິດຕາມຫົວໜ່ວຍທຸລະກິດທີ່ມີຢູ່ໃນເມືອງເພື່ອສ້າງໃຫ້ແຕ່ລະຫົວໜ່ວຍທຸລະກິດໄດ້ຮັບການຢັ້ງຢືນ ແລະນຳໃຊ້ກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດເພີ່ມຂຶ້ນ.

------------

ຂ່າວ: ສີສຸວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์