ໂຄງການປູກໄມ້ບົວລະພາ ຊ່ວຍຄໍ້າປະກັນສະບຽງອາຫານຂອງທ້ອງຖິ່ນ

  ໂຄງການປູກໄມ້ຂອງບໍລິສັດບົວລະພາກະສິກຳ-ປ່າໄມ້ຈຳກັດເປັນໂຄງການລົງທຶນແບບການມີສ່ວນຮ່ວມຂອງປະຊາຊົນໂດຍຖືເອົາປະຊາຊົນໃນເຂດໃກ້ຄຽງໂຄງການໂດຍສະເພາະການຜະລິດເປັນສິນຄ້າຂອງປະຊາຊົນຕິດພັນການປູກໄມ້ຂອງບໍລິສັດເປັນຕົ້ນການປູກເຂົ້າ, ເຄື່ອງປ່າຂອງດົງແລະອື່ນໆ ເພື່ອເປັນການຜະລິດສະບຽງອາຫານ ແລະເປັນສິນຄ້າສ້າງລາຍຮັບເພື່ອສ້າງໃຫ້ເຂົາມີວຽກເຮັດງານທຳ, ມີລາຍຮັບ, ມີຊີບທີ່ໝັ້ນຄົງ ແລະມີຊີວິດການເປັນຢູ່ທີ່ດີຂຶ້ນ.

  ເນື່ອງຈາກວ່າບໍລິສັດບົວລະພານຳໃຊ້ລະບົບການປູກໄມ້ໃນຮູບແບບ “ ກະສິກຳ-ປ່າໄມ້ແບບປະສົມປະສານ” ທີ່ອະນຸຍາດໃຫ້ປະຊາຊົນນຳໃຊ້ເນື້ອທີ່ສວນປູກຢູ່ຕາມຫວ່າງແຖວປູກໄມ້ເພື່ອປູກພືດກະສິກຳໄລຍະສັ້ນເພື່ອເປັນສະບຽງອາຫານ (ໃນປີທີ1-ປີ2), ປູກເຄື່ອງປ່າຂອງດົງເປັນສິນຄ້າ ແລະລ້ຽງສັດປະເພດງົວແລະແບ້ (ປີທີ 3-ປີ7) ດັ່ງນັ້ນການລົງທຶນປູກໄມ້ນີ້ຍັງສາມາດສະໜອງເນື້ອທີ່ການຜະລິດອັນກວ້າງໃຫຍ່ໃຫ້ແກ່ປະຊາຊົນໃນເຂດໂຄງການເພື່ອຜະລິດສະບຽງອາຫານ ແລະ ສິນຄ້າອັນເປັນການປະກອບສ່ວນໃຫ້ແກ່ການຄໍ້າປະກັນດ້ານສະບຽງອາຫານ ແລະລຶບລ້າງຄວາມທຸກຍາກໄປໃນຕົວ.

 ອີງໃສ່ປະສົບການຂອງບໍລິສັດໃນໄລຍະຜ່ານມາການປູກເຂົ້າແຕ່ຢ່າງດຽວໃນເນື້ອທີ່ປູກໄມ້ທັງໝົດປະຊາຊົນຈະສາມາດຜະລິດເຂົ້າໄດ້ປະມານ 6.877 ໂຕນ ຕໍ່ປີຄິດເປັນມູນຄ່າປະມານ 4,2 ລ້ານ ໂດລາຕໍ່ປີ ຫຼືສາມາດສະໜອງເຂົ້າໃຫ້ກຸ້ມກິນໃນທ້ອງຖິ່ນໄດ້ປະມານ 27.511 ຄົນຕໍ່ປີ, ຖ້າມີການລ້ຽງສັດ ຫຼື ປູກເຄື່ອງປ່າຂອງດົງໃສ່ເນື້ອທີ່ໃນປີທີ 3-7 ຄາດວ່າປະຊາຊົນຈະສາມາດສ້າງລາຍຮັບໄດ້ຢ່າງຫຼວງຫຼາຍ, ສາມາດແກ້ໄຂບັນຫາການຂາດແຄນເນື້ອທີ່ທຳກິນ ແລະ ມີອາຊີບຖາວອນຕິດພັນກັບການປູກໄມ້ເປັນສິນຄ້າອີກດ້ວຍ.

  ບໍລິສັດບົວລະພາກະສິກຳ-ປ່າໄມ້ຈຳກັດເປັນບໍລິສັດປູກໄມ້ ແລະປຸງແຕ່ງໄມ້ທີ່ລົງທຶນຮ່ວມກັນລະຫວ່າງນັກທຸລະກິດຈາກປະເທດຊູແອດຖືຮຸ້ນ 95% ແລະນັກທຸລະກິດລາວຖືຮຸ້ນ 5%, ບໍລິສັດດັ່ງກ່າວໄດ້ສ້າງຕັ້ງຂຶ້ນໃນ ສປປ ລາວ ໃນປີ 1993 ມີເງິນຈົດທະບຽນ 31 ລ້ານໂດລາ ແລະໄດ້ລົງທຶນປະຈຸບັນ 49,6 ລ້ານໂດລາ, ສຳລັບຜະລິດຕະພັນປຸ່ງໄມ້ຂອງບໍລິສັດບົວລະພາແມ່ນຈຳໜ່າຍທັງພາຍໃນປະເທດ ແລະສົ່ງອອກໄປຫຼາຍກວ່າ 10 ປະເທດເຊັ່ນ: ມານດິບທີ່ເປັນລູກຄ້າລາຍໃຫຍ່, ຮອງລົງ ມາແມ່ນອາເມລິກາ, ສ.ເກົາຫຼີ, ອີຕຣາລີ, ຣັດເຊຍ ແລະອື່ນໆ.

  ມາຮອດປີ 2018 ບໍລິສັດໄດ້ຮັບສິດນຳໃຊ້ທີ່ດິນໃນເນື້ອທີ່ປະມານ 10.628 ເຮັກຕາ ແລະໄດ້ລົງທຶນປູກໄມ້ໄປແລ້ວ 4.165 ເຮັກຕາແລະກຳລັງດຳເນີນການປູກໄມ້ 2.000 ເຮັກຕາ ຢູ່ປ່າຜະລິດແຫ່ງຊາດພູເຍີຍເມືອງຊະນະຄາມ ແລະເມືອງເຟືອງແຂວງວຽງຈັນໂດຍສ່ວນໃຫຍ່ແມ່ນໄມ້ວິກ, ໄມ້ກະຖິນນະໂລງ, ໄມ້ສັກ ແລະ ໄມ້ດູ່ຈຳນວນໜຶ່ງ, ປະຈຸບັນບໍລິສັດບົວລະພາມີໂຮງເລື່ອຍແລະໂຮງງານເຟີນິເຈີທັນສະໄໝ 1 ແຫ່ງ ຢູ່ນະຄອນຫຼວງວຽງຈັນ,ນອກນັ້ນບໍລິສັດຍັງສ້າງຕັ້ງໂຮງງານໄມ້ອັດແລະໄມ້ຝານທີ່ທັນສະໄໝຂຶ້ນອີກໜຶ່ງແຫ່ງຢູ່ເມືອງຫີນເຫີບແຂວງວຽງຈັນເພື່ອນຳໃຊ້ວັດຖຸດິບຈາກສວນໄມ້ປູກຂອງບໍລິສັດມາຜະລິດເປັນສິນຄ້າ ຫຼືເປັນຜະລິດຕະພັນໄມ້ສົ່ງ ອອກສູ່ຕະຫຼາດຕ່າງປະເທດ.

แชร์