2 ໂຄງການຕ້ານເຈື່ອນຢູ່ໄຊຍະບູລີ ມີຄວາມຄືບໜ້າ

  ວັນທີ 19 ສິງຫາ 2020 ນີ້, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດພ້ອມດ້ວຍພະແນກການທີ່ກ່ຽວຂ້ອງຈຳນວນໜຶ່ງຂອງແຂວງຊຶ່ງປະກອບມີ: ພະແນກກະສິກຳ-ປ່າໄມ້,ພະແນກການເງິນ,ພະແນກແຜນການ-ການລົງທຶນ, ພະແນກພະລັງງານ-ບໍ່ແຮ່, ພະແນກໂຍທາທິການ-ຂົນສົ່ງ ແລະພະແນກຊັບພະຍາກອນທຳມະຊາດ-ສິ່ງແວດລ້ອມແຂວງພ້ອມດ້ວຍທ່ານ ອ່ອນອຳພັນ ບົວສີແກ້ວ ເຈົ້າເມືອງໄຊບູລີພ້ອມຄະນະໄດ້ລົງຕິດຕາມເບິ່ງໂຄງການສ້າງຕ້ານເຈື່ອນປ້ອງ ກັນຫົວງານຊົນລະປະທານທີ່ບ້ານກ້າງປາ 1 ແລະຄັນຄູປ້ອງກັນນໍ້າຖ້ວມໃນເຂດຕ່າງໆຂອງເມືອງໄຊບູລີ.
  ໂອກາດນີ້, ທ່ານ ໜູຜາດ ທິລາວົງ ຜູ້ອຳນວຍການບໍລິສັດໜູຄຳກໍ່ສ້າງໄດ້ໃຫ້ສຳພາດວ່າ: ບໍລິສັດພວກເຮົາແມ່ນໄດ້ຮັບເໝົາກໍ່ສ້າງຢູ່ 2 ໂຄງການພາຍໃນເມືອງໄຊບູລີຄື: ໂຄງການສ້າງຕ້ານເຈື່ອນປ້ອງກັນຫົວງານລະບົບຫົວງານຊົນລະປະທານບ້ານກ້າງປາ 1 ແລະຄູປ້ອງກັນນໍ້າຖ້ວມບ້ານດ້າງສະຫວັນຫາຫ້ວຍສີໄຄຊຶ່ງເປັນໂຄງການຟື້ນຟູຫຼັງນໍ້າຖ້ວມຈາກໄພພິບັດລະດູຝົນປີ 2019 ຜ່ານມາໃນນີ້ສຳລັບຄູກັນນໍ້າຖ້ວມແມ່ນມີ 2 ສັນຍາ ຄື: ແຕ່ບ້ານຕົ້ນແຫນຫາບ້າງບຶງເຊມີລວງຍາວ 660 ແມັດ, ໜ້າທາງກວ້າງ 5 ແມັດ, ມີມູນຄ່າ 1,3 ຕື້ກວ່າກີບ ແລະສັນຍາທີ 2 ເລີ່ມແຕ່ບ້ານບຶງເຊຫາບ້ານຫາດຊາຍສູງມີລວງຍາວ 1.210 ແມັດ, ມີມູນຄ່າ 800 ລ້ານກວ່າກີບ, ເຊິ່ງໄດ້ເລີ່ມລົງມືກໍ່ສ້າງມາແຕ່ຕົ້ນເດືອນພຶດສະພາ ແລະໄດ້ສຳເລັດໃນວັນທີ 10 ກໍລະກົດ 2020 ໃຊ້ເວລາປະມານ 2 ເດືອນ. ສຳລັບໂຄງການສ້າງຕ້ານເຈື່ອນປ້ອງກັນລະບົບຫົວງານຊົນລະປະທານບ້ານກ້າງປາ 1 ເຊິ່ງເປັນຈັກສູບນໍ້າທີ່ຖືກຜົນກະທົບຮຸນແຮງຈາກໄພພິບັດຈຶ່ງມີການສ້ອມແປງ ແລະສ້າງຕ້ານເຈື່ອນລວມມີມູນຄ່າການກໍ່ສ້າງທັງໝົດ 2 ຕື້ກັບ 9 ລ້ານກີບ ໄດ້ລົງມືຈັດຕັ້ງປະຕິບັດແຕ່ວັນທີ 25 ພຶດສະພາ ແລະ ໄດ້ສຳເລັດ 100% ໃນວັນທີ 25 ມິຖຸນາ ຜ່ານມານີ້ໂດຍການສ້າງຕ້ານເຈື່ອນແມ່ນເບື້ອງລະ 50 ແມັດ, ລວມເປັນ 100 ແມັດ ໄດ້ກໍ່ສ້າງດ້ວຍຫີນລຽງຖົມດ້ວຍຊາຍ ແລະ ປູດ້ວຍຜ້າສຸວະເຕັກ, ຊັ້ນພື້ນຖານຮອງດ້ວຍຫີນພູຂະໜາດ 50-70 ແມັດ, ຄວາມໜາຂອງຕະຝັ່ງແມ່ນ 50 ຊັງຕີແມັດ, ມີຄູກັນນໍ້າຖ້ວມໜາສູງ 1 ແມັດ, ກວ້າງ 1 ແມັດ ເຊິ່ງການກໍ່ສ້າງໄດ້ສຳເລັດກ່ອນແຜນການ.
  ຈາກນັ້ນ, ທ່ານຮອງເຈົ້າແຂວງກໍ່ຍັງໄດ້ໄປເລາະເບິ່ງລະບົບຄູກັນນໍ້າ ແລະຄອງຊົນລະປະທານຕາມຈຸດຕ່າງໆທີ່ໄດ້ຮັບການເປ້ເພເສຍຫາຍໃນລະດູຝົນປີ 2019 ແລະໄດ້ຮັບການສ້ອມແປງສຳເລັດເພື່ອກະກຽມຕ້ານແລ້ງນາປີ 2020 ແລະ ສຸມໃສ່ການຜະລິດນາແຊງຂອງປະຊາຊົນໃນສົກປີ 2020-2021 ກໍ່ຄືການຜະລິດສະບຽງອາ ຫານໃຫ້ໄດ້ຕາມຄາດໝາຍທີ່ວາງໄວ້.

แชร์