ໝາກຜົນການຊີ້ນຳໆພາວຽກວິຊາສະເພາະທີ່ພົ້ນເດັ່ນຂອງຄະນະພັກ ທຫລ

  ກອງປະຊຸມໃຫຍ່ຜູ້ແທນຄັ້ງທີ IV ຂອງອົງຄະນະພັກທະນາຄານແຫ່ງ ສປປ ລາວ (ທຫລ) ຈະໄດ້ດຳເນີນຢ່າງເປັນທາງການໃນອີກບໍ່ພໍເທົ່າໃດວັນຕໍ່ໜ້ານີ້; ສະຫາຍ ນາງ ວັດທະນາ ດາລາລອຍ ກຳມະການປະຈຳພັກ, ຮອງຜູ້ວ່າການ ທຫລ ໄດ້ແຈ້ງໝາກຜົນແຫ່ງການຊີ້ນໍາ-ນໍາພາຂອງຄະນະພັກ ທຫລ ຕໍ່ວຽກວິຊາສະເພາະທີ່ພົ້ນເດັ່ນຊຶ່ງໃນໄລຍະ 5 ປີ ຜ່ານມາເຖິງວ່າສະພາບແວດລ້ອມຢູ່ສາກົນ ແລະພາກພື້ນມີການຜັນແປຢ່າງສັບສົນ, ສະພາບການພັດທະນາເສດຖະກິດ-ສັງຄົມໃນ ສປປ ລາວ ປະເຊີນກັບສິ່ງທ້າທາຍຫຼາຍດ້ານຈາກບັນຫາການຂາດດຸນທາງດ້ານການຄ້າ, ການຂາດດຸນງົບປະມານ, ພື້ນຖານເສດຖະກິດຍັງອ່ອນນ້ອຍ, ປະເຊີນກັບໄພພິບັດທໍາມະຊາດ ແລະ ພະຍາດລະບາດຢ່າງໜັກໜ່ວງແຕ່ຄະນະພັກ ທຫລ ໄດ້ເອົາໃຈໃສ່ຊີ້ນໍາ-ນໍາພາວຽກງານວິຊາສະເພາະດ້ວຍຄວາມຮັບຜິດຊອບສູງໂດຍສຸມໃສ່ຈັດຕັ້ງຜັນຂະ ຫຍາຍມະຕິກອງປະຊຸມໃຫຍ່ຜູ້ແທນຄັ້ງທີ III ຂອງ ອົງຄະນະພັກ ທຫລ ທີ່ໄດ້ກໍານົດທິດທາງລວມເອົາໄວ້ຄື: ຮັບປະກັນສະຖຽນລະພາບເງິນຕາແຫ່ງຊາດໃຫ້ມີຄວາມໝັ້ນທ່ຽງ, ຄຸ້ມຄອງ ແລະ ພັດທະນາລະບົບທະນາຄານ ແລະ ສະຖານບັນການເງິນໃຫ້ເຂັ້ມແຂງ, ພັດທະນາຕະຫຼາດເງິນ-ຕະຫຼາດທຶນ ແລະລະບົບການຊໍາລະໃຫ້ທັນ ສະໄໝ.

  ຄະນະພັກຂັ້ນຕ່າງໆ, ບັນດາສະມາຊິກພັກ-ພະນັກງານໄດ້ເປັນເຈົ້າການຫັນເອົາທິດທາງດັ່ງກ່າວມາສ້າງເປັນແຜນຍຸດທະສາດການພັດທະນາລະບົບການເງິນ-ເງິນ ຕາຂອງ ສປປ ລາວ ໄລຍະ 10 ປີ (2016-2025) ແລະ ວິໄສທັດຮອດປີ 2030 (ຊຶ່ງລັດຖະບານໄດ້ຮັບຮອງເອົາໃນເດືອນສິງຫາ 2016). ຍຸດທະສາດສະບັບນີ້ ໄດ້ກໍານົດທິດທາງລະອຽດ, ຄາດໝາຍສູ້ຊົນ ແລະ 4 ຍຸດທະສາດຕົ້ນຕໍຈາກນັ້ນກໍໄດ້ມີການຜັນຂະຫຍາຍມາເປັນແຜນເງິນຕາ 7 ແຜນງານ 58 ໂຄງການສໍາລັບຊຸມປີ 2016-2020 ໂດຍສອດຄ່ອງກັບແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ຂອງລັດຖະບານ ແລະ ມະຕິກອງປະຊຸມສະພາແຫ່ງຊາດວ່າດ້ວຍການຮັບ ຮອງແຜນພັດທະນາເສດຖະກິດ-ສັງຄົມແຫ່ງຊາດ,ແຜນງົບປະມານແຫ່ງລັດແລະແຜນເງິນຕາ 5 ປີ ຄັ້ງທີ VIIIສະບັບເລກທີ 014/ສພຊ (24 ພະຈິກ 2016).

  ຜ່ານການຈັດຕັ້ງປະຕິບັດແຜນເງິນຕາ ແລະບັນດາແຜນງານ-ໂຄງການ 5 ປີ ດັ່ງກ່າວນັ້ນເຫັນວ່າ: ຂະແໜງການທະນາຄານສາມາດບັນລຸຄາດໝາຍທາງດ້ານວິຊາສະເພາະພົ້ນເດັ່ນ 3 ດ້ານ ໂດຍພື້ນຖານຍັງສາມາດຮັກສາສະເຖຍລະພາບເງິນຕາແຫ່ງຊາດໄວ້ໄດ້ສະແດງອອກຄື: ໃນໄລຍະ 5 ປີ ຜ່ານມາ (ມັງກອນ 2016-ມິຖຸນາ 2020) ອັດຕາເງິນເຟີ້ສະເລ່ຍຢູ່ໃນລະດັບ 2,4% ຊຶ່ງຕໍ່າກວ່າອັດຕາການຂະຫຍາຍຕົວຂອງເສດຖະກິດທີ່ຢູ່ໃນລະດັບສະເລ່ຍ 5 ປີ 5,85%/ປີ, ເງິນກີບອ່ອນຄ່າສະເລ່ຍ 2,63%/ປີ ທຽບກັບເງິນໂດລາສະຫະລັດໝາຍວ່າຍັງຢູ່ໃນກອບແຜນການທີ່ກໍານົດໄວ້ໃຫ້ອ່ອນຄ່າ ຫຼືແຂງຄ່າບໍ່ເກີນ 5% ທຽບກັບສະກຸນເງິນຫຼັກ, ຄັງສໍາຮອງເງິນຕາຕ່າງປະເທດສະເລ່ຍຢູ່ໃນລະດັບທີ່ສາມາດກຸ້ມການນໍາເຂົ້າໄດ້ປະມານ 3,9 ເດືອນ ແລະ ປະລິມານເງິນຂະຫຍາຍຕົວຢູ່ໃນລະດັບທີ່ສອດຄ່ອງກັບຈັງຫວະການຂະຫຍາຍຕົວຂອງເສດຖະກິດ ແລະຢູ່ໃນຂອບເຂດທີ່ແຜນການກໍານົດຄືສະເລ່ຍຢູ່ໃນລະດັບ 13,59%/ປີ.

    ລະບົບທະນາຄານ ແລະສະຖາບັນການເງິນທີ່ບໍ່ແມ່ນທະນາຄານໄດ້ຮັບການພັດທະນາມີປະສິດທິພາບສູງຂຶ້ນ, ຕາໜ່າງການບໍລິການຂະຫຍາຍຕົວຢ່າງກວ້າງຂວາງທັງໃນຮູບແບບທີ່ຂະຫຍາຍສາຂາ-ໜ່ວຍບໍລິການແລະໃນຮູບແບບໃໝ່ທີ່ຂະຫຍາຍການບໍລິການຜ່ານຜະລິດຕະພັນທາງດ້ານການເງິນທີ່ນໍາໃຊ້ເຕັກໂນໂລຊີເຂົ້າຊ່ວຍ; ບັນ ດາທະນາຄານ ແລະສະຖາບັນການເງິນໄດ້ປັບປຸງລະບອບແບບແຜນວິທີການຄຸ້ມຄອງຄວາມສ່ຽງຂອງຕົນດີຂຶ້ນ, ເອົາໃຈໃສ່ປັບປຸງຍຸດທະສາດການເຄື່ອນໄຫວ ແລະ ບໍລິ ການ, ປັບປຸງການຈັດຕັ້ງ ແລະການຄຸ້ມຄອງບໍລິຫານເຂົ້າສູ່ຫຼັກການ ແລະ ລະບຽບການຫຼາຍຂຶ້ນ. ຄຽງຄູ່ກັນນັ້ນ, ບັນດາກົນໄກເພື່ອສ້າງເງື່ອນໄຂໃຫ້ແກ່ທະນາຄານ ແລະສະຖາບັນການເງິນເຄື່ອນໄຫວຄ່ອງຕົວຫຼາຍຂຶ້ນກໍໄດ້ຮັບການປັບປຸງ ແລະພັດທະນາເຊັ່ນ: ວຽກງານປົກປ້ອງຜູ້ຝາກເງິນ, ວຽກງານຂໍ້ມູນຂ່າວສານສິນເຊື່ອ, ນະໂຍ ບາຍສິນເຊື່ອໂດຍສະເພາະນະໂຍບາຍສິນເຊື່ອເພື່ອຊຸກຍູ້ຈຸນລະວິສາຫະກິດ,ວິສາຫະກິດຂະໜາດນ້ອຍ ແລະກາງ, ສິນເຊື່ອເພື່ອແກ້ໄຂຜົນກະທົບຈາກໄພພິບັດ ແລະ ພະ ຍາດລະບາດໂດຍສະເພາະສິນເຊື່ອເພື່ອແກ້ໄຂຜົນກະທົບຈາກການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (Covid-19).

 ການພັດທະນາລະບົບຊໍາລະຂອງ ສປປ ລາວ ກໍໄດ້ຮັບການພັດທະນາໄປສູ່ລວງກວ້າງ ແລະລວງເລິກຫຼາຍກວ່າເກົ່າ,ມີການວິເຄາະຄົ້ນຄວ້າບັນດານະໂຍບາຍ,ຫຼັກການ, ລະບຽບການເພື່ອຊຸກຍູ້ວຽກງານດັ່ງກ່າວເຂົ້າສູ່ລະບົບຫຼາຍຂຶ້ນ, ກະຕຸ້ນການພັດທະນາກໍຄືການແຂ່ງຂັນຈາກພາກສ່ວນທະນາຄານ,ສະຖາບັນການເງິນ ແລະນິຕິບຸກຄົນທີ່ບໍ່ແມ່ນທະນາຄານເຊັ່ນ: ບໍລິສັດໂທລະຄົມມະນາຄົມເຮັດໃຫ້ທົ່ວສັງຄົມມີລະບົບການຊໍາລະຫຼາກຫຼາຍຮັບໃຊ້ແນວທາງຂອງພັກ-ລັດຖະບານ ແລະປະຊາຊົນເປັນຕົ້ນບັນ ດາລະບົບການຊໍາລະສະສາງຜ່ານເຄື່ອງມືເອເລັກໂຕຣນິກ (ເຊັ່ນ: ບັດ ATM, ເຄື່ອງຮູດບັດ, ຄອມພິວເຕີ, ມືຖື, QR Code ແລະອື່ນໆ).

  ບັນດາຜົນງານພົ້ນເດັ່ນທັງໝົດທີ່ຍາດມາໄດ້ນັ້ນແມ່ນຍ້ອນໄດ້ຮັບການຊີ້ນໍາ-ນໍາພາຈາກກົມການເມືອງສູນກາງພັກ, ສະພາແຫ່ງຊາດ ແລະລັດຖະບານຢ່າງໃກ້ຊິດ; ບັນດາຄະນະພັກ ທຫລ, ຄະນະຮາກຖານພັກ-ໜ່ວຍພັກກໍຄືສະມາຊິກພັກ-ພະນັກງານ ໄດ້ສຸມສະຕິປັນຍາ ແລະເຫື່ອແຮງປະກອບສ່ວນຢ່າງຕັ້ງໜ້າ, ມີຄວາມສາມັກ ຄີ ແລະເອກະພາບສູງ; ການຄົ້ນຄວ້າສ້າງ ແລະປັບປຸງບັນດາກົດໝາຍ ແລະນິຕິກໍາລຸ່ມກົດໝາຍຢ່າງເປັນປົກະຕິຕໍ່ເນື່ອງເປັນປັດໃຈໜຶ່ງທີ່ພາໃຫ້ມີຜົນສໍາເລັດດັ່ງກ່າວ; ພ້ອມດຽວກັນນັ້ນ;ກໍໄດ້ເອົາໃຈໃສ່ຄົ້ນຄວ້າແລະພັດທະນາເຄື່ອງມືເຂົ້າຮັບໃຊ້ການປະຕິບັດນະໂຍບາຍຕ່າງກໍ່ສໍາຄັນເປັນຕົ້ນແມ່ນການພັດທະນາເຄື່ອງມືຕະຫຼາດລະຫວ່າງທະນາຄານ, ກົນໄກຕະຫຼາດເປີດ, ເຄື່ອງມືໃນການວັດແທກຄວາມສ່ຽງທົ່ວລະບົບທະນາຄານ-ສະຖາບັນການເງິນ, ລະບົບຊໍາລະ-ຫັກບັນຊີ ທີ່ສໍາຄັນຂອງປະເທດ.
  ເຖິງຢ່າງໃດກໍ່ຕາມ; ໃນໄລຍະ 5 ປີຕໍ່ໜ້ານີ້, ຂ້າພະເຈົ້າເຫັນວ່າທັງສະພາບແວດລ້ອມສາກົນ ແລະພາຍໃນປະເທດຂອງພວກເຮົາຍິ່ງຈະມີຫຼາຍດ້ານຍາກທີ່ຈະສາມາດຄາດຕວງໄດ້, ຫຼາຍດ້ານທ້າທາຍ ແລະມີຄວາມຮຽກຮ້ອງຕ້ອງການເພີ່ມຂຶ້ນອີກທະວີຄູນຊຶ່ງຮຽກຮ້ອງໃຫ້ພວກເຮົາຈະຕ້ອງໄດ້ຂຸ້ນຂ້ຽວບຸກທະລຸ. ສະນັ້ນ, ເພື່ອເປັນການກະກຽມຮັບມືກັບສະພາບດັ່ງກ່າວພວກເຮົາຈະຕ້ອງໄດ້ຄົ້ນຄວ້າຢ່າງເລິກເຊິ່ງກ່ຽວກັບທິດທາງ, ຄາດໝາຍສູ່ຊົນ ແລະ ບັນດາໜ້າວຽກຈຸດສຸມທາງດ້ານວິຊາສະເພາະໄປຄວບຄູ່ກັບການກໍ່ສ້າງພັດທະນາບຸກຄະລາກອນ, ປັບປຸງລະບົບການບໍລິຫານລັດ ແລະປັບປຸງການຈັດຕັ້ງ.

--------------

ຂຽນໂດຍ: ຣັດສະໝີ ດວງສັດຈະ

ຮູບພາບ: #ຫນັງສືພິມເສດຖະກິດສັງຄົມ

แชร์