ສ້າງເສດຖະກິດຄອບຄົວປີໜຶ່ງມີລາຍຮັບ 300 ລ້ານກວ່າກີບ

  ການສ້າງເສດຖະກິດຄອບຄົວບໍ່ມີຂີດຈໍາກັດວ່າໜຸ່ມ ຫຼືອາຍຸຈະສູງກໍ່ສາມາດເຮັດໄດ້ເມື່ອມີຈຸດປະສົງເຮັດແທ້ທໍາຈິງ,ດຸໝັ່ນຂະຫຍັນພຽນກໍຈະພາຄອບຄົວຂອງຕົນຮັ່ງມີເຂັ້ມແຂງ ແລະກາຍເປັນຄອບຄົວຕົວແບບໄດ້, ດັ່ງຄອບຄົວຂອງລຸງ ບຸນສົງ ພົມມະຫານ ອາຍຸ 62 ປີ ເປັນພະນັກງານບໍານານປະຈຸບັນຢູ່ບ້ານເມືອງຫານ ເມືອງຫົງສາ ແຂວງໄຊຍະບູລີ, ພາຍໃນຄອບຄົວມີນໍາກັນທັງໝົດ 6 ຄົນແຮງງານຕົ້ນຕໍ 4 ຄົນ ລຸງໄດ້ເວົ້າສູ່ຟັງວ່າ: ໃນເມື່ອກ່ອນໄດ້ເປັນທະຫານໄດ້ຊັ້ນຮ້ອຍເອກແຕ່ປີ 1975-1990 ຈາກນັ້ນກໍໄດ້ຍ້າຍໄປຢູ່ປົກຄອງໃນໄລຍະນັ້ນຊີວິດການເປັນຢູ່ຂອງຄອບຄົວແມ່ນພົບຄວາມຫຍຸ້ງຍາກເນື່ອງຈາກວ່າອາໄສແຕ່ເງິນເດືອນພຽງແຕ່ກຸ້ມຢູ່ກຸ້ມກິນ ນອກຈາກນັ້ນກໍບໍ່ໄດ້ເຮັດຫຍັງເພີ່ມເພື່ອສ້າງລາຍຮັບເຂົ້າໃນຄອບຄົວ, ຈາກສະພາບຄວາມຈິງດັ່ງກ່າວເລີຍປຶກສາຫາລືກັບຄອບຄົວໃນການຊອກຫາອາຊີບເສີມເຂົ້າໃນຄອບຄົວ.

  ເລີ່ມແຕ່ປີ 1991 ແມ່ນໄດ້ລົງທຶນທີ່ຕົນເອງຄອບຄົວສະສົມໄວ້ໃນໄລຍະຜ່ານມາຊື້ດິນ 1 ຕອນ ມູນຄ່າ 6 ລ້ານກີບ ເພື່ອຈົກໜອງປາ 3 ໜອງ, ລາຄາຈ້າງ 6 ລ້ານ ແລະເຊົ່າດິນຂອງບ້ານຊຶ່ງເປັນໜອງລວມບ້ານປີລະ 6 ລ້ານກີບ; ທັງປຸກຄອກໝູຊື້ໝູພັນເຂົ້າມາລ້ຽງຈໍານວນ 25 ໂຕ ມູນຄ່າ 7 ລ້ານ 5 ແສນກີບ, ຊື້ປານິນມາປ່ອຍ 10 ພັນໂຕ, ລ້ຽງໄກ່ 100 ໂຕ, ຜະລິດລູກປານ້ອຍຂາຍ 80 ພັນໂຕຕໍ່ປີ, ໃນໄລຍະນັ້ນແຕ່ລະປີສາມາດຂາຍສັດສ້າງລາຍຮັບໄດ້ 40 ລ້ານກີບຕໍ່ປີ ແລະເຫັນວ່າກິດຈະ ການແມ່ນໄດ້ສ້າງຄວາມສົນໃຈໃຫ້ລູກຄ້າມາຊື້ນັບມື້ນັບຫຼາຍຂຶ້ນ.

   ຕົກມາຮອດປີ 2011 ເນື້ອທີ່ທໍາການຜະລິດຂອງລຸງແມ່ນຖືກໂຄງການໄຟຟ້າຫົງສາສະນັ້ນຄອບຄົວຂອງລຸງໄດ້ຮັບເງິນຊົດເຊີຍຈາກໂຄງການ 145 ລ້ານກີບ,ລຸງຈຶ່ງໄດ້ນໍາເງິນກ້ອນດັ່ງກ່າວລົງທຶນເຂົ້າເຮັດທຸລະກິດເຊັ່ນ: ຕັ້ງຮ້ານສ້ອມແປງລົດ 1 ຮ້ານ, ສ້າງໂຮງງານນໍ້າດື່ມ 1 ແຫ່ງ ໃນໄລຍະນີ້ເຫັນວ່າກິດຈະການດໍາເນີນໄປໄດ້ດີມີລາຍຮັບເຂົ້າຄອບຄົວ,ມາຮອດປີ 2017 ລຸງ ໄດ້ພັກຜ່ອນຮັບເບ້ຍບໍານານຢ່າງເຕັມສ່ວນຈຶ່ງມີເວລາດູແລກິດຈະການຫຼາຍຂຶ້ນຈຶ່ງໄດ້ລົງທຶນເພື່ອຂະຫຍາຍກິດຈະການຕື່ມຄື: ຊື້ດິນຕື່ມຕອນໜຶ່ງເພື່ອຈົກໜອງປາ 2 ໜອງ ປ່ອຍປານິນ 1 ໜອງ, ປ່ອຍປາດຸກພັນ 1 ໜອງ ມີປາທັງໝົດ 50 ພັນໂຕ, ລ້ຽງກົບໃນກະຊັງ 15 ພັນໂຕ, ລ້ຽງແບ້ 30 ໂຕ, ລ້ຽງສັດປີກ 800 ໂຕ ສ່ວນການຈໍາໜ່າຍແມ່ນຂາຍຢູ່ໃນຕະຫຼາດພາຍໃນເມືອງ ແລະແມ່ຄ້າມາຮັບຊື້ຈໍານວນໜຶ່ງ, ສັງລວມແລ້ວຄອບຄົວຂອງລຸງມີລາຍຮັບຈາກທຸລະກິດສ້ອມແປງລົດ, ໂຮງງານນໍ້າດື່ມ ແລະຂາຍສັດລ້ຽງປີໜຶ່ງໄດ້ທັງໝົດ 467 ລ້ານກີບ ເມື່ອຫັກຄ່າຈ່າຍໃຫ້ກໍາມະກອນ, ຄ່າຫົວອາຫານສັດ ແລະຄ່າສິ້ນເປືອງອື່ນໆ ເຫັນວ່າປີໜຶ່ງມີລາຍຮັບເຂົ້າຄອບຄົວ 311 ລ້ານກີບ.

   ຈາກການດໍາເນີນທຸລະກິດທີ່ນ້ອຍກ້າວໄປເຖິງໃຫຍ່ສາມາດເຮັດໃຫ້ຄອບຄົວຂອງລຸງກາຍເປັນຄອບຄົວຕົວແບບໃນການດໍາເນີນທຸລະກິດຕິດພັນກັບການລ້ຽງສັດຊີວິດການເປັນຢູ່ຂອງຄອບຄົວກາຍເປັນຄອບຄົວພົ້ນທຸກ; ຊຶ່ງສະແດງອອກປະຈຸບັນມີເຮືອນຖາວອນຢູ່ 3 ຫຼັງ, ມີລົດໃຫຍ່ 4 ຄັນ, ມີເງິນສົ່ງລູກຫຼານໄດ້ຮຽນຈົນຈົບ ແລະໄດ້ເຮັດວຽກງານທໍາ, ມີເງິນຝາກທະນາຄານເພື່ອໄວ້ຈັບຈ່າຍໃຊ້ສ້ອຍໃນຍາມຈໍາເປັນ.

  ລຸງຍັງກ່າວຕື່ມວ່າ: ໃນຕໍ່ໜ້ານີ້ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມໃຫ້ພຽງພໍໃນການບໍລິໂພກຊີ້ນ, ປາ, ໄກ່ຄອບຄົວຂອງເພິ່ນຈະເພີ່ມປະລິມານຂອງການລ້ຽງສັດໃຫ້ຫຼາຍຂຶ້ນເຊັ່ນ: ລ້ຽງປາໃຫ້ໄດ້ 70 ພັນໂຕ,ລ້ຽງກົບ 50 ພັນໂຕ,ລ້ຽງແບ້ 50 ໂຕ, ງົວ 10 ໂຕ ແລະສັດປີກ 1.000 ໂຕ, ສ່ວນການຂະຫຍາຍກິດຈະການ ແລະເນື້ອທີ່ແມ່ນບໍ່ຂະຫຍາຍຕື່ມອີກຍ້ອນໂຕເອງກໍ່ເຖົ້າແກ່ແລ້ວມີແຕ່ຈະເອົາໃຈໃສ່ບົວລະບັດຮັກສາສັດລ້ຽງໃຫ້ອຸດົມສົມບູນ, ແຂງແຮງໃຫຍ່ໄວ ແລະຂາຍໄດ້ລາຄາດີ.

---------------

ໂດຍ: ບຸນທີ    

ຮູບພາບ: #ຫນັງສືພິມເສດຖະກິດສັງຄົມ

แชร์