ສ່ວຍສາອາກອນແຂວງອັດຕະປື ເປີດຂະບວນເສຍຄ່າທໍານຽມທາງ ແລະພາສີທີ່ດິນ

  ໃນວັນທີ 20 ສິງຫາ 2020 ສ່ວຍສາອາກອນປະຈຳແຂວງອັດຕະປືຮ່ວມກັບທະນາຄານການຄ້າຕ່າງປະເທດລາວມະຫາຊົນສາຂາແຂວງອັດຕະປື ແລະ ທະນາຄານພັດທະນາລາວສາຂາແຂວງອັດຕະປືໄດ້ເປີດຂະບວນການຮັບຊໍາລະເສຍຄ່າທໍານຽມທາງ ແລະພາສີທີ່ດິນຜ່ານລະບົບທະນາຄານພາຍໃຕ້ການນໍາພາຂອງທ່ານ ສຸລິພອນ ຟອງສະໝຸດ ຮອງເລຂາໜ່ວຍພັກ, ຮອງຫົວໜ້າສ່ວຍສາອາກອນປະຈຳແຂວງອັດຕະປືພ້ອມດ້ວຍພະນັກງານວິຊາການພາຍໃນສ່ວຍສາອາກອນປະຈຳແຂວງ ແລະພະນັກງານທະນາຄານເຂົ້າຮ່ວມຢ່າງເປັນຂະບວນຟົດຟື້ນ.

  ການເປີດຂະບວນເສຍຄ່າທໍານຽມເສຍຄ່າທາງ ແລະພາສີທີ່ດິນຜ່ານລະບົບທະນາຄານໃນປີ 2020 ນີ້ແມ່ນເປັນຄັ້ງທີ 2 ແລ້ວ, ເພື່ອແນໃສ່ຈັດຕັ້ງປະຕິບັດແຈ້ງການຂອງທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແລະ ຄຳສັ່ງຂອງທ່ານເຈົ້າແຂວງອັດຕະປືກ່ຽວກັບການຊໍາລະຄ່າທຳນຽມທາງ ແລະ ການເສຍພາສີ ທີ່ດິນປະຈຳປີ 2020, ທັງນີ້ກໍເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກແຂວງອັດຕະປືຄັ້ງທີ XI ທີ່ຈະຈັດຂຶ້ນໃນມໍ່ໆນີ້ ແລະສຸມໃສ່ປະຕິບັດໄລຍະມ້ວນທ້າຍຂອງແຜນພັດທະນາເສດຖະກິດ-ສັງຄົມ 5 ປີ, ຄັ້ງທີ VIII ກໍຄືແຜນງົບປະມານແຫ່ງລັດປະຈຳປີ 2020 ໃຫ້ບັນລຸໄດ້ຕາມລະດັບຄາດໝາຍ.

  ທ່ານ ສຸລິພອນ ຟອງສະໜຸດ ໃຫ້ສຳພາດຕໍ່ສື່ມວນຊົນແຂວງວ່າ: ການສ້າງຂະບວນການໃນຄັ້ງນີ້ແມ່ນເຮັດໜ້າທີ່ປຸກລະດົມຊຸກຍູ້ໃຫ້ບັນດາບຸກຄົນ, ນິຕິບຸກຄົນ ແລະ ການຈັດຕັ້ງຕະຫຼອດຮອດປະຊາຊົນບັນດາເຜົ່າໃນຂອບເຂດທົ່ວແຂວງທີ່ນຳໃຊ້ຍານພາຫະນະ ແລະ ເປັນເຈົ້າຂອງກຳມະສິດນຳໃຊ້ທີ່ດິນໄດ້ມີຄວາມຕື່ນຕົວປະກອບສ່ວນພັນທະຂອງຕົນຢ່າງຕັ້ງໜ້າ ແລະຫັນເຂົ້າສູ່ລະບຽບ, ກົດໝາຍດີຂຶ້ນເປັນກ້າວໆ.

  ທ່ານ ສຸລິພອນ ຟອງສະໜຸດ ກ່າວຕື່ມວ່າ: ການຊຳລະຄ່າທຳນຽມທາງ ແລະພາສີທີ່ດິນປະຈຸບັນນີ້ທົ່ວແຂວງອັດຕະປືປະກອບ ມີ 6 ທະນາຄານຄື: ການຄ້າຕ່າງປະ ເທດລາວມະຫາຊົນ, ທະນາຄານພັດທະນາລາວ, ທະນາຄານສົ່ງເສີມກະສິກຳ, ທະນາຄານຮ່ວມທຸລະກິດລາວ-ຫວຽດ, ທະນາຄານຮ່ວມພັດທະນາ ແລະທະນາຄານເອັສທີຈຳກັດສາຂາອັດຕະປື, ສ່ວນບັນດາເອກະສານທີ່ຕ້ອງນຳໄປຢັ້ງຢືນຕໍ່ຄະນະຮັບຜິດຊອບຕາມຈຸດຕ່າງໆປະກອບມີ: ຄ່າທຳນຽມທາງຕ້ອງນຳເອົາທະບຽນພາຫະນະ ແລະປື້ມຕິດການການຂຶ້ນທະບຽນ (ປຶ້ມເຫຼືອງ) ແລະ ຄ່າພາສີທີ່ດິນຕ້ອງນຳເອົາໃບຕາດິນ ຫຼືໃບແຈ້ງເນື້ອທີ່ດິນ, ໃບຕິດຕາມການເສຍພາສີທີ່ດິນ (ກໍລະນີບໍ່ມີໃບຕາດິນ ຫຼືໃບຢັ້ງຢືນສິດນຳໃຊ້) ແລະໃບເກັບເງິນພາສີທີ່ດິນຂອງປີຜ່ານມາ.

 ຈຸດທີ່ໃຫ້ບໍລິການຮັບຊຳລະປົກກະຕິ ແລະຊ່ອງທາງຕ່າງໆມີຊຳລະຜ່ານລະບົບເຄົາເຕີຂອງທະນາຄານຊຳລະຜ່ານແອັບພຣີເຄເຊິ່ນມືຖື (MobileApplication),ຊຳ ລະຜ່ານຕູ້ເອທີເອັມ (ATM), ຊຳລະຜ່ານຕູ້ອັດຕະໂນມັດ (Kiosk), ຊໍາລະຜ່ານສະຖານທີ່ຈຸດ ຕົວແທນບໍລິການທີ່ໄດ້ຮັບອະນຸ ຍາດ (BCOME) ແລະ ທ່ານຍັງ ສາມາດຊຳລະຜ່ານຈຸດບໍລິການຢູ່ສຳນັກງານສ່ວຍສາອາກອນປະຈໍາແຂວງ ແລະສ່ວຍສາອາກອນປະຈຳ 5 ຕົວເມືອງ.

   ຜ່ານການຈັດຕັ້ງປະຕິບັດໄລຍະ 7 ເດືອນກວ່າໃນປີ 2020 ນີ້: ລາຍຮັບຄ່າທຳນຽມທາງປະຈຳປີ 2020 ສາມາດຈັດເກັບລາຍຮັບໄດ້ 544,24 ລ້ານກີບ ເທົ່າກັບ 59,29% ຂອງແຜນການປີ,ທຽບໃສ່ຊ່ວງດຽວປີ 2019 ເທົ່າກັບ 94,96%, ແຕ່ເມື່ອທຽບໃສ່ຂໍ້ມູນພາຫະນະຕົວຈິງທີ່ພະແນກ ຍທຂ ແຂວງສະໜອງໃຫ້ເຫັນວ່າຍັງຕໍ່າສຳລັບລາຍຮັບພາສີທີ່ດິນສາມາດຈັດເກັບໄດ້ 702,52 ລ້ານກີບ ເທົ່າກັບ 39,03% ຂອງແຜນການປີ, ທຽບໃສ່ຊ່ວງດຽວປີ 2019 ເທົ່າກັບ 100,02%, ແຕ່ເມື່ອທຽບໃສ່ຂໍ້ມູນສຳມະໂນທີ່ດິນເຫັນວ່າຍັງຕໍ່າ.

   ສະນັ້ນ, ບັນດາບຸກຄົນ, ນິຕິບຸກຄົນ ແລະການຈັດຕັ້ງຂັ້ນຕ່າງໆ ຕະຫຼອດຮອດປະຊາຊົນບັນດາເຜົ່າທີ່ນຳໃຊ້ຍານພາຫະນະ ແລະເປັນເຈົ້າຂອງກຳມະສິດນຳໃຊ້ທີ່ດິນ ໃນຂອບເຂດທົ່ວແຂວງອັດຕະປືໃຫ້ເປັນເຈົ້າການຮີບຮ້ອນຕື່ນຕົວປະກອບສ່ວນພັນທະຂອງຕົນຢ່າງຕັ້ງໜ້າເວົ້າລວມ, ເວົ້າສະເພາະແມ່ນການເສຍຄ່າທຳນຽມທາງປະຈຳ ປີ ແລະການເສຍພາສີທີ່ດິນປະຈຳປີຕາມຊ່ອງທາງ ແລະຈຸດຕ່າງໆໃຫ້ຖືກຕ້ອງ, ຄົບຖ້ວນ, ທັນຕາມກຳນົດເວລາ.

--------------

ໂດຍ: ຂ,ອັດຕະປື ວັດທະນາ

ຮູບພາບ: #ຫນັງສືພິມເສດຖະກິດສັງຄົມ

แชร์