ເມືອງຊຽງຮ່ອນຝຶກອົບຮົມຜູ້ບໍລິຈາກເລືອດສຸກເສີນ

  ຊຸດຝຶກອົບຮົມອາສາສະໝັກຜູ້ບໍລິຈາກເລືອດກັບທີ່ຫຼື (ສຸກເສີນ) ໄດ້ຈັດຂຶ້ນໃນຂອງວັນທີ 18 ສິງຫາ 2020 ທີ່ຫ້ອງປະຊຸມໂຮງໝໍຊຸມຊົນເມືອງຊຽງຮ່ອນໂດຍການເປັນປະທານຂອງທ່ານ ບຸນຈັນ ແກ້ວວິຊາ ຮອງເຈົ້າເມືອງຜູ້ຊີ້ນຳຂົງເຂດວັດທະນະທຳສັງຄົມ,ມີທ່ານ ວັນ ນະສິງ ມຸງຄຸນສະຫວັດຫົວໜ້າອົງການກາແດງແຂວງໄຊຍະບູລີ ພ້ອມດ້ວຍທີມງານຂອງແຂວງ, ມີສຳມະນາກອນທີ່ມາຈາກບັນດາຂະແໜງການອ້ອມຂ້າງເມືອງເຂົ້າຮ່ວມທັງໝົດ 40 ທ່ານ ຍິງ 10 ທ່ານ.
  ໃນຊຸດຝຶກອົບຮົມໃນຄັ້ງນີ້ສຳມະນາກອນໄດ້ຮັບຮູ້ພາລະບົດບາດຂອງອົງການກາແດງລາວ, ພາລະບົດບາດຂອງຜູ້ບໍລິຈາກເລືອດສຸກເສີນ, ຄວາມຮູ້ພື້ນຖານກ່ຽວກັບພະ ຍາດທີ່ຕິດຕໍ່ທາງເພດສຳພັນ, ການປະຖົມພະຍາບານຂັ້ນພື້ນຖານ, ພະຍາດຕິດຕໍ່ທາງກຳມະພັນ ແລະຄວາມຮູ້ກ່ຽວກັບການບໍລິຈາກເລືອດຈຸດປະສົງໃນການຈັດຊຸດຝຶກ ອົບຮົມໃນຄັ້ງນີ້ເພື່ອປູກຈິດສຳນຶກເຮັດໃຫ້ສັງຄົມກໍ່ຄືຊັ້ນຄົນຕ່າງໆຮັບຮູ້ ແລະເຂົ້າໃຈເຖິງຄວາມໝາຍຄວາມສໍາຄັນຂອງການບໍລິຈາກເລືອດເພື່ອສ້າງໃຫ້ມີຊາວໜຸ່ມອາສາສະໝັກບໍລິຈາກເລືອດກັບທີ່ຢູ່ພາຍໃນ ເມືອງຊຽງຮ່ອນ ໃນເວລາທີ່ມີຄົນເຈັບຕ້ອງການໃສ່ເລືອດດ່ວນບໍ່ວ່າຈະເປັນການເສຍເລືອດຈາກການຜ່າຕັດ, ເກີດລູກ, ເລືອດໄຫຼ ແລະພະຍາດອື່ນໆ, ເພື່ອສ້າງໃຫ້ຮູ້ໄດ້ໜ້າທີ່ຂອງຊາວໜຸ່ມອາສາສະໝັກບໍລິຈາກເລືອດຕໍ່ກັບຂະບວນການປຸກລະດົມບໍລິຈາກເລືອດ ແລະສົ່ງເສີມສຸຂະພາບຊຸມຊົນ.         ພ້ອມກັນນັ້ນສຳມະນາກອນຍັງໄດ້ຂຽນບົດທົດສອບການຮຽນຮູ້, ກວດໝວດເລືອດສະໝັກເປັນອາສາສະໝັກຜູ້ບໍລິຈາກເລືອດສຸກເສີນຈຳນວນ 30 ທ່ານ ຍິງ 8 ທ່ານ .


  ຕອນທ້າຍຊຸດຝຶກອົບຮົມຍັງໄດ້ມອບໃບຍ້ອງຍໍຂອງທ່ານເຈົ້າເມືອງໃຫ້ບຸກຄົນທີ່ມີຜົນງານດີເດັ່ນໃນການປຸກລະດົມຈິດອາສາບໍລິຈາກເລືອດ ແລະຮັບຟັງການໂອ້ລົມຂອງທ່ານຮອງເຈົ້າເມືອງເຊິ່ງທ່ານໄດ້ເນັ້ນໜັກໃຫ້ສຳມະນາກອນຈົ່ງນຳເອົາເນື້ອໃນຈິດໃຈທີ່ໄດ້ອົບຮົມໃນຄັ້ງນີ້ໄປຈັດຕັ້ງປະຕິບັດເຜີຍແຜ່ປຸກລະດົມສັງຄົມໃຫ້ຮັບຮູ້, ເຂົ້າໃຈ ແລະກະກຽມຈິດໃຈເພື່ອປະກອບສ່ວນບໍລິຈາກເລືອດສິ່ງສຳຄັນແມ່ນສືບຕໍ່ໃຫ້ການຮ່ວມມື ແລະເພີ່ມຄວາມຮັບຜິດຊອບໃນການປຸກລະດົມການບໍລິຈາກເລືອດດ້ວຍຄວາມ ສະໝັກໃຈໃຫ້ຫຼາຍຂຶ້ນຜູ້ບໍລິຈາກເລືອດຫຼາຍເທື່ອ ຫຼືຜູ້ເຄີຍບໍລິຈາກເລືອດມາແລ້ວຈົ່ງໄດ້ສືບຕໍ່ບໍລິຈາກ ແລະ ເຮັດບົດບາດໃນການສົ່ງເສີມການບໍລິຈາກເລືອດແບບປອດໄພ, ເປັນແບບຢ່າງທີ່ດີໃນການບໍລິຈາກເລືອດຢ່າງສະໝໍ່າສະເໝີ ແລະຕໍ່ເນື່ອງ, ທັງເປັນຜູ້ບໍລິຈາກເລືອດ, ທັງເປັນຜູ້ປຸກລະດົມຂົນຂວາຍຄົນອຶ່ນໆໃຫ້ມາຮ່ວມບໍລິຈາກແບບຕື່ນຕົວສະໝັກໃຈໂດຍບໍ່ຮຽກຮ້ອງສິ່ງຕອບແທນ ແລະເພື່ອບຸນກຸສົນທັງນີ້ກໍ່ເພື່ອເປັນການສົ່ງເສີມການບໍລິຈາກເລືອດ-ສົ່ງເລືອດກໍ່ຄືຂັ້ນແຂວງ-ຂັ້ນເມືອງແນໃສ່ຕອບສະໜອງຄົນເຈັບທີ່ປີ່ນປົວດ້ວຍຜະລິດຕະພັນເລືອດຢ່າງພຽງພໍ, ປອດໄພ ແລະທັນເວລາ.

------------

ຂ່າວ: ວັນດີ ຄັດດາພອນ

แชร์