ຍທຂ ເຊກອງມອບຄອມພີວເຕີໃຫ້ເມືອງທ່າແຕງ

  ພິທີມອບ -ຮັບເຄື່ອງຮັບອຸປະກອນເຄື່ອງຄອມພິວເຕີພ້ອມເອວຊີດີ 1 ຊຸດໃຫ້ແກ່ຫ້ອງການໂຍທາ ແລະຂົນສົ່ງເມືອງທ່າແຕງແຂວງເຊກອງໄດ້ຈັດຂຶ້ນໃນວັນທີ 19 ສິງ ຫາ 2020, ທີ່ຫ້ອງການໂຍທາ ແລະຂົນສົ່ງເມືອງລະຫວ່າງ ທ່ານ ທອງເທບ ສຸລິໂຍ ຮອງຫົວໜ້າພະແນກໂຍທາ ແລະຂົນສົ່ງແຂວງເຊກອງເປັນຜູ້ມອບ ແລະຮັບໂດຍ ທ່ານ ສຸພົນ ໄຊສະຫງ່າ ຮອງເຈົ້າເມືອງໆທ່າແຕງຜູ້ຊີ້ນໍາຂົງເຂດເສດຖະກິດ ແລະ ມອບຕໍ່ໃຫ້ຫ້ອງການໂຍທາ ແລະຂົນສົ່ງເມືອງທ່າແຕງເປັນຜູ້ປົກປັກຮັກສາ ແລະຄຸ້ມ ຄອງນຳໃຊ້, ໂດຍຊ້ອງໜ້າຂະແໜງການທີ່ເຊື້ອເຊີນເຂົ້າຮ່ວມເປັນສັກຄີພິຍານ, ລວມມູນຄ່າທັງໝົດ 9,2 ລ້ານກີບ.
    ທ່ານ ທອງເທບ ສຸລິໂຍ ຮອງຫົວໜ້າພະແນກໂຍທາ ແລະຂົນສົ່ງແຂວງເຊກອງໃຫ້ຮູ້ວ່າ: ການມອບ ອຸປະກອນຄອມພິວເຕີພ້ອມເອວຊີດີໃນຄັ້ງນີ້ເປັນການປະກອບສ່ວນຊຸກຍູ້ສົ່ງເສີມໃຫ້ວຽກການບໍລິການ, ໂດຍສະເພາະແມ່ນຫ້ອງການໂຍທາ ແລະຂົນສົ່ງເມືອງເຮັດວຽກງານມີຄວາມວ່ອງໄວທັນການ ແລະຫັນເປັນທັນສະໄໝ ແລະເຂັ້ມແຂງໃນການຮັບໃຊ້ສັງຄົມໃນຂອບເຂດທົ່ວເມືອງ.
  ໂອກາດດັ່ງກ່າວທ່ານ ສຸພົນ ໄຊສະຫງ່າ ຮອງເຈົ້າເມືອງໆທ່າແຕງກໍ່ກ່າວຂອບໃຈ ແລະຮູ້ບຸນຄຸນມາຍັງພະແນກໂຍທາ ແລະຂົນສົ່ງແຂວງເຊກອງທີ່ເຫັນໄດ້ຄວາມສໍາ ຄັນຂອງໜ້າວຽກ, ທັງອໍານວຍຄວາມສະດວກໃນການຈັດຕັ້ງປະຕິບັດໜ້າທີ່ວິຊາສະເພາະວຽກງານໃຫ້ທັນສະໄໝ, ວ່ອງໄວໃນການບໍລິການຮັບໃຊ້ສັງຄົມ, ພ້ອມໃຫ້ຄຳສັນຍາວ່າຈະນຳໃຊ້ອຸປະກອນດັ່ງກ່າວໃຫ້ຖືກຕ້ອງຕາມເປົ້າໝາຍ ແລະຍາວນານ.

------------

ຂ່າວ: ລັດຕະນາ ຄຳສົມພູ

ຮູບພາບ: ໜັງສືພິມເສດຖະກິດ-ສັງຄົມ

แชร์