ສະມາຊິກສະພາປະຊາຊົນເຄື່ອນໄຫວພົບປະ ປະຊາຊົນ 6 ບ້ານ

  ໃນລະຫວ່າງວັນທີ 19-21 ສິງຫາ 2020 ບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄຳມ່ວນ, ຮ່ວມກັບສະມາຊິກສະປະຊາຊົນເຂດເລືອກຕັ້ງເມືອງບົວລະພາຊຶ່ງນຳໂດຍທ່ານ ນາງ ອາລີ ບົວຈູມ ສະມາຊິກສະພາແຫ່ງຊາດ,ທ່ານ ປອ ເພັດສະໝອນ ພອນວິໄລສັກ ແລະທ່ານ ນາງ ກົງໃຈ ໄຊປັນຍາ ສະ ມາຊິກສະພາປະຊາຊົນແຂວງເຂດເລືອກຕັ້ງເມືອງບົວລະພາໄດ້ພ້ອມກັນລົງເຄື່ອນໄຫວພົບປະອຳນາດການປົກຄອງ, ພໍ່ແມ່ປະຊາຊົນ 6 ບ້ານເຂດເລືອກຕັ້ງເມືອງບົວລະ ພາໃນນັ້ນມີບ້ານລັງຄັງ, ບ້ານທົ່ງຂາມ, ໜອງແສງ, ໜອງບົວ, ບ້ານດຸ ແລະບ້ານນາໂນຊຶ່ງມີຜູ້ເຂົ້າຮ່ວມຮັບຟັງທັງໝົດ 300 ກວ່າຄົນ.

   ການລົງເຄື່ອນໄຫວພົບປະອຳນາດການປົກຄອງພໍ່ແມ່ປະຊາຊົນຂອງ ສສຊ-ສສຂ ຄັ້ງນີ້ເພື່ອນຳເອົາຜົນສຳເລັດຂອງກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ 8 ແລະສະພາປະຊາຊົນແຂວງຄຳມ່ວນຊຸດທີ 1 ເຜີຍແຜ່ໃຫ້ອຳນາດການປົກຄອງ ແລະປະຊາຊົນໄດ້ຮັບຮູ້ຢ່າງເລິກເຊິ່ງຊຶ່ງບັນດາ ທ່ານ ສສຊ-ສສຂ ໄດ້ມີການພັດປ່ຽນກັນເຜີຍແຜ່ວຽກງານຂອງລັດຖະບານເປັນຕົ້ນແມ່ນຮັບຮອງເອົາມະຕິກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະ ມານ 6 ເດືອນຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍປີ 2020 ເຊັ່ນ: ການເຕີບໂຕເສດຖະກິດ, ຄາດໝາຍສູ້ຊົນຂອງຂະແໜງເສດຖະກິດ, ຄາດໝາຍດ້ານວັດທະນະທຳ-ສັງຄົມ, ດ້ານສາທາລະນະສຸກ, ດ້ານແຮງງານສະຫວັດດີການສັງຄົມ, ການພັດທະນາຊົນນະບົດ ແລະແກ້ໄຂຄວາມທຸກຍາກ, ໃນໂອກາດດຽວກັນນີ້ສະມາຊິກສະພາປະຊາຊົນຍັງໄດ້ຮັບຟັງການສະເໜີຂອງປະຊາຊົນກ່ຽວກັບບັນຫາຄວາມຫຍຸ້ງຍາກພາຍໃນບ້ານເປັນຕົ້ນແມ່ນສະຖານທີ່ການຮຽນ-ການສອນ, ບັນຫາເສັ້ນທາງລະຫວ່າງບ້ານຕໍ່ບ້ານ,ບັນຫາລະບົບຊົນລະປະທານ ແລະແນວພັນເຂົ້າ-ພືດ,ໃນລະດູການຜະລິດປີນີ້ປະຊາຊົນບັນດາເຜົ່າເມືອງບົວລະພາໄດ້ປະສົບກັບໄພແຫ້ງ ແລ້ງໃນຊ່ວງຕົ້ນລະດູການຜະລິດປີນີ້, ຊຶ່ງມັນໄດ້ເຮັດໃຫ້ການຜະລິດຂອງປະຊາຊົນບໍ່ໄດ້ຕາມແຜນການທີ່ວາງໄວ້.

   ຕໍ່ກັບບັນຫາດັ່ງກ່າວ ທ່ານ ປອ ເພັດສະໝອນ ພອນວິໄລສັກ ໄດ້ໃຫ້ກຽດພົບປະໂອ້ລົມຕໍ່ອຳນາດການປົກຄອງບ້ານ ແລະປະຊາຊົນຊຶ່ງທ່ານໄດ້ຮຽກຮ້ອງໃຫ້ປະຊາຊົນບັນດາເຜົ່າເອົາໃຈໃສ່ສືບຕໍ່ຮັກສາມູນເຊື້ອໃນການທຳມາຫາກິນເຮັດໃຫ້ບ້ານເມືອງຂອງເຮົາກາຍເປັນແຫຼ່ງຜະລິດບໍ່ແມ່ນບ່ອນບໍລິໂພກພຽງຢ່າງດຽວຖ້າເປັນດັ່ງນັ້ນພວກເຮົາກໍຈະກາຍເປັນຕະຫຼາດໃຫ້ແກ່ພາກສ່ວນອື່ນໂດຍສະເພາະແມ່ນການປູກຝັງ-ລ້ຽງສັດ ແລະ ຮັກສາໄດ້ຄວາມສາມາຄີເປັນປຶກແຜ່ນ, ເພື່ອແນໃສ່ເຮັດໃຫ້ຊິດວິດການເປັນຢູ່ຂອງປະຊາຊົນພາຍໃນບ້ານດີຂຶ້ນເທື່ອລະກ້າວ.

แชร์