ບໍລິຄຳໄຊເຮັດບົດບັນທຶກກັບ 32 ຮ້ານອາຫານ ແລະຮ້ານບັນເທີງ

ໂດຍປະຕິບັດຕາມຄໍາສັ່ງຂອງທ່ານນາຍົກລັດຖະມົນຕີ ເລກທີ 06/ນຍ ລົງວັນທີ 29 ມີນາ 2020 ແລະແຈ້ງການເພີ່ມເຕີມຂອງຄະນະສະເພາະກິດປ້ອງກັນພະຍາດໂຄວິດ-19 ຂັ້ນແຂວງສະບັບເລກ 34/ສພກ.ຂບຊ. ລົງວັນທີ 18 ສິງຫາ 2020, ອີງຕາມທິດຊີ້ນຳເພີ່ມເຕີມກ່ຽວກັບການເພີ່ມທະວີປະຕິບັດບັນດາມາດຕະການຜ່ອນຜັນ, ປ້ອງກັນຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ຮອບສອງ, ມາໃນລະຫວ່າງວັນທີ 14-19 ສີງຫາ 2020 ນີ້, ເຈົ້າໜ້າທີ່ວິຊາສະເພາະໜ່ວຍສະເພາະກິດ ປກສ ແຂວງບໍລິຄໍາໄຊໄດ້ສົມທົບກັບພະແນກຖະແຫຼງຂ່າວວັດທະນາທຳ ແລະ ທ່ອງທ່ຽວແຂວງ ແລະ ຂະແໜງການທີ່ກ່ຽວຂ້ອງ, ລົງເຜີຍແຜ່ແຈ້ງການເພີ່ມເຕີມສະບັບເລກທີ່ 34/ສພກ.ຂບຊ ລົງວັນທີ 18 ສີງຫາ 2020 ວ່າດ້ວຍທິດຊີ້ນໍາເພີ່ມເຕີມກ່ຽວກັບການເພີ່ມທະວີປະຕິບັດບັນດາມາດຕະການຜ່ອນຜັນ,ປ້ອງກັນຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ຮອບສອງໃຫ້ບັນດາເຈົ້າຂອງກິດຈະການ, ຮ້ານອາຫານ ແລະ ຮ້ານບັນເທີງຕ່າງໆພາຍໃນເທສະບານແຂວງຊຶ່ງນຳໂດຍ ທ່ານ ພັນໂທ ສຸກສະຫວັນ ບຸບຜາພັນ ຄະນະພັກກອງບັນຊາການເລຂາພັກຮາກຖານຫົວໜ້າຫ້ອງສັນຕິບານ ປກສ ແຂວງ,ມີທ່ານ ສົນທອງ ວີບຸນກວ້າງ ຮອງຫົວໜ້າພະແນກຖະແຫຼງຂ່າວວັດທະນະທໍາ ແລະທ່ອງທ່ຽວແຂວງພ້ອມດ້ວຍຄະນະສະເພາະກິດຂັ້ນແຂວງປ້ອງກັນໂຄວິດ- 19 ເຂົ້າຮ່ວມ.

  ຈຸດປະສົງການລົງເຄື່ອນໄຫວໜ້າທີ່ວຽກງານຂອງຄະນະສະເພາະກິດໃນຄັ້ງນີ້ກໍ່ເພື່ອເປັນການຈັດຕັ້ງຜັນຂະຫຍາຍບັນດາຄໍາສັ່ງຂອງທ່ານນາຍົກລັດຖະມົນຕີ, ແຈ້ງ ການຂອງຫົວໜ້າຫ້ອງວ່າການສໍານັກງານນາຍົກ ແລະ ແຈ້ງການເພີ່ມເຕີມສະບັບເລກທີ່ 34/ສພກ.ຂບຊ ລົງວັນທີ 18 ສີງຫາ 2020 ວ່າດ້ວຍທິດຊີ້ນໍາເພີ່ມເຕີມ ກ່ຽວກັບການເພີ່ມທະວີປະຕິບັດບັນດາມາດຕະການຜ່ອນຜັນ, ປ້ອງກັນຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19 ຮອບສອງຊຶ່ງເນື້ອໃນໄດ້ແຈ້ງເຖິງພະນັກງານ, ທະຫານ, ຕໍາຫຼວດພໍ່ແມ່ປະຊາຊົນ, ຄົນຕ່າງປະເທດ, ຄົນຕ່າງດ້າວ, ທີ່ດໍາລົງຊີວິດ ແລະດໍາເນີນທຸລະກິດຢູ່ພາຍໃນແຂວງບໍລິຄໍາໄຊໃຫ້ຢຸດໂຈະຊົ່ວຄາວບັນດາກິດຈະການທີ່ມີຄວາມສ່ຽງເຊັ່ນ: ງານລ້ຽງ, ງານດອງ, ງານຊຸມນຸມຊົນທີ່ມີຈຳນວນຄົນຫຼວງຫຼາຍ (ສໍາລັບຮ້ານອາຫານແມ່ນບໍ່ໃຫ້ຈໍາໜ່າຍເຫຼົ້າ, ເບຍ ແລະສີ່ງທີ່ມືນເມົາຕ່າງໆ) ທີ່ເຫັນວ່າມີຄວາມສ່ຽງທີ່ຈະກໍ່ໃຫ້ເກີດການແຜ່ລະບາດຂອງພະຍາດໂຄວິດ-19, ດັ່ງນັ້ນ ຈຶ່ງໄດ້ນໍາເອົາແຈ້ງການສະບັບດັ່ງກ່າວມາເຜີຍແຜ່ໃຫ້ບັນດາເຈົ້າຂອງກິດຈະການ, ຮ້ານອາຫານ ແລະຮ້ານບັນເທິງໃນທົ່ວເທສະບານແຂວງໄດ້ຮັບຮູ້, ເຂົ້າໃຈ ແລະຈັດຕັ້ງປະຕິບັດຢ່າງເຂັ້ມງວດ,ພ້ອມນັ້ນກໍ່ໄດ້ສ້າງບັດບົນທືກກັບບັນດາເຈົ້າຂອງກິດຈະການ, ຮ້ານອາຫານ, ຮ້ານບັນເທິງຕ່າງໆ ຈໍານວນ 32 ຮ້ານ,ຊຶ່ງເນື້ອໃນບົດບັນທືກໄດ້ກໍານົດໃຫ້ເຈົ້າຂອງກິດຈະການປະຕິບັດຕາມຄໍາສັ່ງ ແລະແຈ້ງການຢ່າງເຂັ້ມງວດ, ຖ້າຫາກເຈົ້າຂອງຮ້ານໃດບໍ່ປະຕິບັດກໍ່ຈະນໍາໃຊ້ມາດຕະການຕໍ່ຜູ້ລະເມິດຢ່າງເດັດຂາດດ້ວຍຮູບການເບົາຫາໜັກ, ຖ້າຍັງດື້ດ້ານບໍ່ປະຕິບັດກໍ່ຕ້ອງດໍາເນີນຄະດີ ແລະຢຶດໃບອານຸຍາດດຳເນີນທຸລະກິດ.

 ທັງນັ້ນກໍເພື່ອປຸກລະດົມຂົນຂວຍໃຫ້ບັນດາເຈົ້າຂອງກິດຈະການ, ຮ້ານອາຫານ, ຮ້ານບັນເທິງ ແລະພໍ່ແມ່ປະຊາຊົນທຸກຄົນໃນສັງຄົມໄດ້ມີສ່ວນຮ່ວມໃນການສະກັດກັ້ນ, ກັນການລະບາດ, ຄວບຄຸມ ແລະກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19 ຮອບ 2  ບໍ່ໃຫ້ມີຄວາມສ່ຽງ ແລະແຜ່ລະບາດພາຍໃນແຂວງບໍລິຄໍາໄຊແນໃສ່ເຮັດໃຫ້ທົ່ວສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະປອດໄພຈາກພະຍາດລະບາດໂຄວິດ-19.

--------------

ຂ່າວ: ວິໄລທອງ

ຮູບພາບ: ໜັງສືພິມເສດຖະກິດ-ສັງຄົມ

                   

แชร์