ເຕົ້າຮວຍໝາກພ້າວນໍ້າຫອມສວນແມ່ຜະລິດຈາກໝາກພ້າວແທ້ 100%

  ເຕົ້າຮວຍໝາກພ້າວນໍ້າຫອມ “ສວນແມ່” ເປັນອີກໜຶ່ງຜະລິດຕະພັນຂອງຄົນລາວໂດຍມີລົດຊາດທີ່ມີຄວາມແຊບ, ຫອມຫວານຈາກວັດຖຸດິບໝາກພ້າວແທ້ພ້ອມນັ້ນຍັງໄດ້ປອດສານເຄມີ 100% ເພາະໝາກພ້າວດັ່ງກ່າວແມ່ນໄດ້ປູກ ແລະ ບົວລະບັດເອງຊຶ່ງໃສ່ພຽງແຕ່ປຸ໋ຍທຳມະຊາດເທົ່ານັ້ນປະຈຸບັນຕະຫຼາດກຳລັງໃຫ້ຄວາມນິຍົມ ໂດຍສະເພາະການຊື້-ຂາຍທາງຂາຍໃນອອນລາຍ.

  ນາງ ແສງປະເສີດ ທ່ຽງຈັນໄຊ ເຈົ້າຂອງຜະລິດຕະພັນເຕົ້າຮວຍໝາກພ້າວນໍ້າຫອມ “ສວນແມ່” ໃຫ້ສຳພາາດວ່າ: ຂ້ອຍເປັນນັກສຶກສາປະລິນຍາຕີ, ຄະນະເສດຖະສາດຂອງມະຫາວິທະຍາໄລ Greenwich ປະເທດອັງກິດພາຍຫຼັງທີ່ມີການແຜ່ລະບາດຂອງພະຍາດ Covid-19 ກໍບໍ່ສາມາດເດີນທາງກັບໄປສຶກສາຕໍ່ໄດ້ຊຶ່ງຕອນນີ້ແມ່ນກຳລັງກະກຽມການຮຽນທາງ “Online” ກ່ຽວກັບບົດຮຽນຂອງມະຫາວິທະຍາໄລດ້ວຍເປັນຄົນທີ່ມັກເຮັດເຂົ້າໜົມຕ່າງໆໃນເວລາວ່າງໃຫ້ຄົນໃນຄອບຄົວໄດ້ລອງຊິມ, ໂດຍສະເພາະແມ່ນຊ່ວງທີ່ຕ້ອງເວັ້ນໄລຍະຫ່າງທາງສັງຄົມໃນຊ່ວງທີ່ມີການແຜ່ລະບາດຂອງພະຍາດ Covid-19 ຈຶ່ງເຮັດໃຫ້ມີເວລາຢູ່ກັບຄອບຄົວຫຼາຍຂຶ້ນ ແລະຖືເອົາໂອກາດນີ້ລອງເຮັດເຂົ້າໜົມ.

  ຫຼັງຈາກທີ່ແມ່ມັກເອົາໝາກພ້າວສົດໆຈາກສວນມາໃຫ້ຫຼາຍຄົນໄດ້ກິນເພື່ອສຸຂະພາບເປັນປະຈໍານ້ອງເອງກໍໄດ້ເລີ່ມເຮັດເຂົ້າໜົມຈາກໝາກພ້າວຊຶ່ງລົງມືເຮັດເຕົ້າຮວຍໝາກພ້າວອ່ອນຈາກການຮຽນຮູ້ຜ່ານທາງສື່ online ຕ່າງໆ ແລະໄດ້ພັດທະນາເປັນສູດຂອງຕົນເອງພາຍຫຼັງທີ່ໄດ້ລອງເຮັດ ແລະໃຫ້ຄອບຄົວຊິມມາໄດ້ໄລຍະໜຶ່ງຈຶ່ງໄດ້ຕັດສິນໃຈຂາຍຜ່ານທາງອອນລາຍ ແລະໄດ້ຜົນຕອບຮັບທີ່ດີເກີນຄາດຈາກນັ້ນຈຶ່ງສືບຕໍ່ເຮັດເຕົ້າຮວຍໝາກພ້າວມາເລື້ອຍໆ ແລະມີຄວາມສຸກທຸກຄັ້ງທີ່ລູກຄ້າຫຼາຍຄົນກັບມາຊື້ໃໝ່ຈົນກາຍມາເປັນທຸລະກິດເຕົ້າຮວຍໝາກພ້າວນໍ້າຫອມ “ສວນແມ່” ນ້ອຍໆລ້ຽງຊີບຄອບຄົວ.

  ຄວາມພົ້ນເດັ່ນຂອງເຕົ້າຮວຍໝາກພ້າວນໍ້າຫອມ “ສວນແມ່” ກໍຄືໝາກພ້າວນໍ້າຫອມທີ່ມີຄວາມຫອມ, ຫວານ, ມີລົດຊາດທີ່ເປັນເອກະລັກພິເສດ ແລະບໍ່ມີສານກັນ ບູດສາມາດເກັບໄວ້ໄດ້ດົນເຖິງ 4-5 ມື້ໃນຕູ້ເຢັນທີ່ສຳຄັນໝາກພ້າວຮ້ານເຮົາແມ່ນປອດສານເຄມີ 100% ເພາະໄດ້ປູກບົວລະບັດເອງໂດຍໃສ່ພຽງແຕ່ປຸ໋ຍທຳມະຊາດເທົ່ານັ້ນປະຈຸບັນແມ່ນມີຢູ່ 2 ສູດຄື: ສູດ Signature (Origi nal) ແລະສູດບໍ່ມີນໍ້າຕານ (ເພື່ອເພີ່ມທາງເລືອກໃໝ່ໃຫ້ແກ່ລູກຄ້າທີ່ບໍ່ມັກກິນຫວານ, ລູກຄ້າສູງໄວ ແລະລູກຄ້າທີ່ກຳລັງລົດຄວາມອ້ວນ) ຊຶ່ງປົກກະຕິແລ້ວເຕົ້າຮວຍໝາກພ້າວຂອງທາງຮ້ານຈະເນັ້ນຄວາມຫວານຂອງນໍ້າໝາກພ້າວເປັນຫຼັກ ແລະ ມີນໍ້າຕານພຽງ 6% ເທົ່ານັ້ນໃນແຕ່ລະຈອກ ແລະໃນໄວໆນີ້ຈະໄດ້ເພີ່ມສູດໃໝ່ເປັນສະໝຸນໄພສູດອັນຊັນ ແລະໃບເຕີຍ.

  ທ້າຍນີ້ນ້ອງຢາກຂໍຝາກເຊີນຊວນໃຫ້ຄົນລາວທຸກຄົນຫັນມາໃຫ້ການສະໜັບສະໜູນ ແລະສົ່ງເສີມຜະລິດຕະພັນຂອງຄົນລາວໂດຍສະເພາະແມ່ນໄວໜຸ່ມໃຫ້ມີຄວາມຮູ້ຄວາມສາມາດໃນການສ້າງສາພັດທະນາຕົນເອງ ແລະໃຊ້ເວລາວ່າງໃຫ້ເກີດປະໂຫຍດພ້ອມທັງເປັນການປະກອບສ່ວນເຂົ້າໃນການສົ່ງເສີມເສດຖະກິດຂອງຊາດອີກດ້ວຍ ນອກນັ້ນເປົ້າໝາຍຫຼັກຂອງນ້ອງກໍຄືການທີ່ລູກຄ້າໄດ້ກິນຂອງຫວານທີ່ບໍ່ພຽງແຕ່ມີລົດຊາດດີແຕ່ຍັງມີປະໂຫຍດຕໍ່ສຸຂະພາບອີກດ້ວຍຮ້ານເຮົາຈະບໍ່ຢຸດທີ່ຈະພັດທະນາແລະປັບປຸງແກ້ໄຂສິນຄ້າຕາມຄໍາແນະນໍາຕ່າງໆຈາກທາງລູກຄ້າເພື່ອສ້າງຄວາມເຊື່ອໝັ້ນ ແລະຍົກສູງລະດັບຄຸນນະພາບຂອງສິນຄ້າໃຫ້ເພີ່ມຂຶ້ນ ແລະຫວັງວ່າລູກຄ້າຈະສະໜັບສະໜູນສຳລັບລູກຄ້າທ່ານໃດທີ່ສົນໃຈສາມາດຕິດຕໍ່ສັ່ງຊື້ໄດ້ທີ່ເຟສບຸກ: ເຕົ້າຮວຍໝາກພ້າວນໍ້າຫອມ “ສວນແມ່”.

แชร์